15. प्रतिज्ञा कियादा देश

आखिरकार, एबै स समा आए गोआ थिया कि इस्राएली लोग प्रतिज्ञा कियैदै देश, कनाना दे प्रवेश करो। तेस देशा दे यरीहो नांवा एक नगर थिया। तेतै रखवाड़ी करणै कठै तेतै चउ बाख पाक्की दवाला थी। यहोशूऐ तेस नगरा लै दूए जासूस भेजै। तेस नगरा दे राहाब नांओऐ एक वैश्या रौहो थियै। तैसै इंयो दुए जासूस लकोऐ थियै, होर तेखा बादा का तैसै नगरै लोगा का बचेकेरे निकड़णै लै तिन्है मदद किये थिये। तैसै एड़ा तै किया थिया किलैकि स परमेश्वरा गैश भरोसा डाओ थिये। तिन्है दूई जासूसै राहाबा सागे वादा किया कि जस समै इस्राएली लोगा यरीहो नगर नाश करणा तै तैस समै हामा तेरे होर तेरे परिवारै रक्षा करणै।

इस्राएली लोगा प्रतिज्ञा कियैदै देशा दे प्रवेश करणै कठै यरदन दरैओ टपणा थिया। परमेश्वरै यहोशू का बोला, “परोहता पैहलै जाणे दै।” जिंया परोहतै यरदन दरैवा दे आपणै पैर डाए तिंया दरैवा पांणे बैहणा बंद होए गोआ, जेतकेरे कि इस्राएली लोग दरैवा का दूजी बाखा लै शुकी जमीना गैशा लै जाये सको।

जिंया इसाइली लोगै यरदन दरैओ पार करे लोआ तिंया परमेश्वरै यहोशू लै बोला कि यरीहोआ दे हमला करणै कठै तयार रहो, हालांकि स हैन मजबूत नगर थिया। परमेश्वरै तिना लोगा का बोला कि तिन्है परोहत होर सैनिक छ: धैड़ै तिक तेस नगरै चउ बाखा एकी बारी फेरी लाया। तै परोहतै होर सैनिकै तेड़ा ही किया।

तिंया सातवै धैड़ै, इस्राएली लोगै तेस नगरै चउ बाख साता बारी फेरै लायै। तिन्है नगरै चउ बाख सातवे फेरै दैणै का बाद, परोहतै आपणी करनाड़ा फूकरी होर सैनिकै उछटै आवाजा दे परमेश्वरै जयजयकार कियै। एतिकठै एड़ा ही किया।

तिंया यरीहोए चउ बाखा दवाला ढुड़े गोई! जेड़े परमेश्वरै आज्ञा दैये थिये इस्राएली लोगै नगरै हरेक चिजा नाश कर दैया। तिन्है सिर्फ राहाब होर तैसा परिवार छाड़ा, जुण इस्राएली लोगा हिस्सा बंणे गोआ थिया। जिंया कनाना दे रौहणै आड़ै होरी लोगै शुणा कि इस्राएली लोगै यरीहोआ नाश करे दैयादा, तै सिंयो डरे गोऐ कि इस्राएली लोगा तिन्हा गैश भी हमला करणा।

तिंया परमेश्वरै इस्राएली लोगा लै आज्ञा दैये थिये कि कनाना दे रौहणै आड़ी कसी भी जातियै लोगा सागे शान्तिकेरे समझौता नी करी। पर गिबोनी नांओऐ एकी कनानी जातियै लोगै यहोशू का झूठ बोला कि सिंयो कनान देशा का दूर एकी जैगहै रौहणै आड़ै आसी। तिन्है यहोशू सागे शान्तियै समझौतै विनते किये। यहोशू होर होरी इस्राएली अगुवै परमेश्वरा का नी पुछी कि तिन्हा किजै करणा चहिए। एतै बजाए, तिन्है गिबोनी सागे शान्तिया समझौता किया।

तेखा चन धैड़ै का बाद, इस्राएली लोगा का पता लागा कि गिबोनी लोग कनान देशा दे ही रौहो थियै। सिंयो गुस्सा होऐ किलैकि गिबोनी लोगै तिन्हा लै धोखा दैया थिया। पर तिन्है तिना सागे कियादा शान्तिया समझौता बणाए डाआ किलैकि स परमेश्वरै सामनै कियादा था। तिंया कुछ समै बाद, कनान देशा दे रौहणै आड़े एक होर जाते, एमोरियै राजै शुणा कि गिबोनियै इस्राएली लोगा सागे समझौता करे हेरादा, तै तिन्है आपणी-आपणी सेना कठै करेकेरे एक बड़े सेना बणाए होर गिबोनी लोगा गैश हमला करे दैया। गिबोनी लोगै तिन्ही मदद करणै कठै यहोशू लै एक संदेशा भेजा।

तै यहोशूऐ इस्राएली लोगै सेना कठै किए होर गिबोनी लोगा तिक पुज्जणै कठै सिंयो सारी राते हांडदै रौहै। दोथी भैगा तिन्है एमोरिए सेना हैरान करे दैए होर तिन्हा गैश हमला किया।

तेस धैड़ै परमेश्वर इस्राएली लोगै कठै लड़ा। तिनी एमोरी लोग उलझाये डाए होर तिनी बड़ै-बड़ै शौरुए दाणै केरे हैन सारै एमोरी लोग मारे डाए।

परमेश्वरै सूरज भी सर्गा दे एकी जैगहा दै रोके डा ताकि इस्राएली लोगा युद्धा करणै लै पूरा समा मिले जाओ ताकि सिंयो एमोरी लोगा पूरै तरीकै केरे हराए दैओ। तेस धैड़ै, परमेश्वरै इस्राएली लोगै कठै एक बड़े जीत हासिल किये।

परमेश्वरै तिन्हा सैनै लोगा हराणै का बाद, हैन सारै कनानी जातिए लोग इस्राएली गैश हमला करणै कठै कट्ठै हुए। यहोशू होर इस्राएलियै हमला करेकेरे तिन्हा खात्मा किया।

इना युद्धा का बाद, परमेश्वरै इस्राएलै हरेक गोत्रा लै प्रतिज्ञा कियैदै देशा दे तिन्हा भाग दैया। तिंया परमेश्वरै इस्राएला लै तेसरी सारी सिंवा दे शान्ते प्रदान किये।

जिंया यहोशो ठगड़ा हुआ तिंया तिनी इस्राएलै सभ लोग शादै। तिंया यहोशुऐ तिन्हा लोगा लै याद दला कि तिन्है तैसा वाचा पालन करणै प्रतिज्ञा किए थिये जुण परमेश्वरै तिन्हा सागे सिनै धारा गैश बाँधे थिये। तिन्है लोगै परमेश्वरै प्रति विश्वासयोग्य रौहणे होर तेसरी बिधिया पालन करणैया वादा किया थिया।