16. छडैणै आड़ै

यहोशूए मरणै का बाद इस्राएली लोगै परमेश्वरै आज्ञा नी मनी। तिन्है परमेश्वरै बिधी नी मनी, होर तिन्है तेस प्रतिज्ञा कियैदै देशा का, बचैदै कनाने लोग बाहरा लै नी काढ़ी। इस्राएली लोगै आपणै सच्चै परमेश्वर, यहोवा छाड़ेकेरे कनानी लोगै देवतै आराधना करणे शुरु करे दैये। इस्राएली लोगा अझी तिक का कोए राजा नी थी, एतिकठै जसलै जेड़ा ठीक लागा तिनी तेड़ा ही किया।

परमेश्वरै आज्ञा नहीं मनणै द्वारा इस्राएली लोगै एक तरीका शुरु किया जुण कई बारी दोहराया। ए तरीका एहड़ै केरे चला कुछ साला तिक इस्राएली लोग परमेश्वरै आज्ञा नी मनदी थियै, तेखा परमेश्वर तिन्हा लै तिन्है दुश्मनै जरीयै हराये केरे सजा दैओ थिया। इंयो इस्राएली लोगा का तिन्ही सभ चिजा लूटो थियै, तिन्है जायदाद नाश करे दैओ थियै, होर तिना मेंझा का हैन सारै इस्राइली लोग मारो थियै। तेखा जिंया इस्राएली लोगै दुश्मन तिन्हा गैश कई साला तिक अत्याचार करो थियै, तेताका बाद इस्राएली लोगा आपणै पापा का पश्चाताप करो थियै होर परमेश्वरा का तिन्हा बचाणै कठै प्रार्थना करो थियै।

हर बारी जिंया इस्राएली लोगा पश्चाताप करो थियै तिंया परमेश्वरा तिन्हा बचाओ थिया। स एकी छड़ैणै आड़ै जरियै एड़ा करो थिया एक एड़ा आदमे जूण तिन्है दुश्मनै खिलाफ लड़ो थिया होर तिन्हा हराओ थिया। तिंया देशा दे शान्ते हो थिये होर स छड़ैणै आड़ा आदमें तिन्हा गैश धोरैकेरे राज करो थिया। परमेश्वरै तिन्हा लोगा लै बचाणै कठै हैन सारै छड़ैणै आड़ै भेजै। परमेश्वरै नेड़ै ही एक दुश्मन जात, मिद्यानी लोगै जरियै इस्राएली लोगा हराणै कठै भी का एड़ा किया।

तिंया मिद्यानियै साता वर्षा तिक इस्राएली फसला लूटी। इस्राएली लोग हैन डरे गोए थियै, होर सिंयो डवारा दे लूकै गोए ताकि मिद्यानी लोग तिन्हा लोड़े नी सको। अंता दे, तिना बचाणै कठै तिन्है परमेश्वरा का प्रार्थना किए।

तिंदे गिदोन नांवा एक इस्राएले मर्द थिया। एकी धैड़ै, स एकी गुप्त जैगहा दे कणका पटाकदा लागादा थिया ताकि मिद्यानी लोग तैसा चोरै नी सको। यहोवै स्वर्गदूतै गिदोना गोलै आछेकेरे तेसका बोला, “ओ शूरवीर सूरमा, परमेश्वर ता सागे आसी। जा होर इस्राएली लोगा मिद्यानी लोगा का बचा।”

गिदोनै बाबा का मूर्ति लै समर्पित एक वेदै थिये। सभीका पैहले गल जुण परमेश्वरै गिदोना लै करणै कठै बोला स तैसा बेदिआ चोड़ना थिया। पर गिदोन लोगा का ड़रो थिया, तै तिनी रात होंदे नैहड़ै। तिंया तिनी तैसा बेदीयै चोड़ेकेरे छौणै-छौणै कियै। तिनी परमेश्वरै कठै एक नौंए बेदे बणाए होर तेत गैश परमेश्वरा लै बले चढ़ाए।

दूजै धैड़ै दोथी लोगै भाड़ा कि कुणी बेदीयै चोड़ेकेरे छौणै-छौणै करे दैयैदै, एतिकठै सिंयो हैन गुस्सा होए। सिंयो गिदोना मारणै कठै तेसरै घौरा लै डेयै, पर गिदोनै बाबै बोला, “तम्है किलै आपणै देवतै मदद करणै कोशिश करदै लागैदै? जै स देवता आसी तै तेस आपणे रक्शा आपु करणे दैयो!” किलैकि तिनी एड़ा बोला तै लोगै गिदोन नी मारी।

तिंया इस्राएली लोगा लूटणै कठै मिद्यानी लोग भी का आए। सिंयो एत्रै सारै थियै कि तिन्है गिनते भी नी करे सकदै थियै। गिदोनै तिन्है खिलाफ लड़णै कठै इस्राएली लोग एकी बारी सागे शादै। गिदोनै परमेश्वरा का दुई नंशाणै माँग किए ताकि तेसलै वश्वास होए जाओ कि परमेश्वर सची तेसलै इस्राएली लोगा बचाणै कठै बोलदा लागादा।

पैहलै नंशाणै कठै, गिदोनै भेड़ै ऊन जमीना दे डाएकेरे परमेश्वरा का बोला कि दोथका चेओ सिर्फ भेड़ै ऊना गैशा लै पड़ना चाहिए होर जमीना गैश नी पड़ना चाहिए। परमेश्वरै एड़ा ही किया। आगली रैचै, तिनी परमेश्वरा का बोला कि जमीन सीनै होए जाओ पर भेड़ै ऊन शुके रौहे लौणै। परमेश्वरै एड़ा ही किया। इना दुई नशाणै बजहा का, गिदोनै विश्वास किया कि परमेश्वर सची लै चाहो कि स इस्राएली लोगा मिद्यानी लोगा का बचाओ।

तिंया गिदोनै इसाएली सैनिक आपु गोलै शादै होर 32,000 मर्द आए। पर परमेश्वरै तेसका बोला कि इंयो हैन ज्यादै आसी। तै गिदोनै सिंयो सभ 22,000 घौरा लै वापस भेजै जुण लड़णै का डरो थियै। परमेश्वरै गीदोना का बोला इंयो अझी भी हैन ज्यादै आसी। तै गिदोनै 300 सैनिका छाड़ेकेरे सिंयो सभ घौरा लै भेजै।

तैसा रैचै परमेश्वरै गिदोना का बोला, “मिद्यानी लोगै ताम्बू लै जा होर तिन्हा गला करदी बारी शुण। जिंया ता शुंणना कि सिंयो किजै गला करदै लागैदै तै ता तिन्हा गैश हमला करणै का नी डरणी।” एतिकठै तैसा रैचै, गिदोन ऊँदै तिन्है ताम्बू लै डेआ होर एक मिद्यानी सपाहै आपणै साथी लै तैसा गला दसदा शुणा जुण तिनी सुपनै दै भाड़े थिये। तेस मर्दै साथीयै बोला, “एस सुपनैआ अर्थ आसी कि गिदोनै सैना माहरै मिद्यानी सैना हराए दैणे!” जिंया गिदोनै एड़ा शुणा तिंया तिनी परमेश्वरै स्तुते किये।

तिंया गिदोन आपणै सपाही गोलै वापस हटा होर तिन्हा मेंझा का हर एकी का एक-एक करनाड़, एक माटैआ भांडा, होर एक मशाल दैये। तिन्है स ताम्बो घेरा जिंधे मिद्यानी सपाहै सुतैदै थियै। गिदोनै 300 सपाहीयै आपणी मशाला भांडै केरे ढकीदी थी एतिकठै मिद्यानी लोग तिना मशालै प्रशै नी भाड़ै सकै थिये।

तिंया गिदोनै सभी सपाहीयै आपणै माटै भांडै एखी समै दे चोड़ेकेरे नगजैब ही मशालै आग प्रकट किये। तिन्है आपणी करनाड़ा फुकरी होर राड़ा पाई, “यहोवा बाखा गिदोनै तलवार!”

परमेश्वरै मिद्यानी लोग भंगड़ैये दैये ,एतिकठै सिंयो एकी दूजै मारदै-टुकदै लागै। तिंया ही, गिदोनै संदेशा दैणै आड़ै हैन सारै होर इस्राएली मिद्यानी लोगा पिछा करणै कठै तिन्है मदद करणै लै शादणै कठै भेजै। तिन्है तिना मेंझा का हैन सारै मारै दैये होर बाकिया पिछा करेकेरे सिंयो इस्राएल देशा का बाहरा लै काढ़ै। तेस धैड़ै 1,20,000 मिद्यानी लोग मरै। एड़केरे परमेश्वरै इस्राएली लोग बचाए।

तिंया सिंयो लोग गिदोना आपणा राजा बणाणा चाहो थियै, पर गिदोनै तिन्हा का एड़ा नी करणै दैई, पर तिनी तिनाका सिंयो सूनै गहणै माँगै जुण तिना मेंझा का हर एकी मंणछै मिद्यानी लोगा का लूटै थियै। तिन्है लोगै बड़ी संख्या दे गिदोना लै सूना दैया।

तिंया गिदोनै तेस सूनै केरे एक खास प्रकारै झिकड़ै बणाए जेड़ै कि महापरोहत पैहनो थियै। पर लोगै तेसरे आराधना करणे शुरु करे दैये जेड़े कि स एक मूर्ते आसी। तिंया परमेश्वरै भी का इस्राएली लोगा लै सजा दैए किलैकि तिन्है मूर्तिए पूजा किए थिये। परमेश्वरै तिन्है दुश्मन तिन्हा हराणै कठै तैयार किए। अंता दे तिन्है भी का परमेश्वरा का मदद करणै कठै प्रार्थना किए, होर परमेश्वरै तिना गोलै तिना बचाणै कठै एक होर छड़ैणै आड़ा भेजा।

एही गल कई बारी हुए, इस्राएली लोगा पाप करणा, परमेश्वरा तिन्हा लै सजा दैणे, तिन्हा पश्चाताप करणा, होर परमेश्वरा तिन्हा छडैणै कठै कुण भेजणा। कई साला तिक, परमेश्वरै हैन सारै छडैणै आड़ै भेजै जुणी इस्राएली लोग तिन्है दुश्मना का बचाए।

अंता दे, तिन्है लोगै होरी देशा सैंई परमेश्वरा का आपणै कठै एकी राजै माँग किए। सिंयो एक एड़ा राजा चाहो थियै जुण लाम्बा होर शक्त्तिशाली हो, होर जुण युद्धा दे तिन्हा मार्गदर्शन करे सको। परमेश्वरा लै ए विनते पसंद नी आई, पर तिनी तिन्हा लै तेड़ा ही राजा दैआ जेड़े तिन्है माँग किए थिये।