17. दाऊदा सागे परमेश्वरै वाचा

शाऊल इस्राएला पैहला राजा थिया। स लांबा होर बांका थिया, जेड़ा सिंयो लोग चाहो थियै बाख तेड़ा ही थिया। इस्राएली लोगा गैश आपणै शासनै पैहलै किछ वर्षा तिक शाऊल एक बढ़िया राजा थिया। पर बादा का स एक दुष्ट आदमे बणे गोआ जुणी परमेश्वरै गला नी मनी, तै परमेश्वरै एक होर मंणछ चुना जुण एकी धैड़ै तेसरी जैगहा दे राजा बणणा थिया।

तिंया परमेश्वरै दाऊद नांवा एक जवान इस्राएली शोरो छांटेकेरे एकी धैड़ै शाऊलै जैगहा दे राजा बणाणै कठै तयार करणा शुरु किया। दाऊद बैतलहम नगरा दे रौहणै आड़ा एक फवाल थिया। कई समै दे, दाऊदै शेर होर भालो दुए मारै डायै थियै किलैकि दाऊदै द्वारा रखवाली करदै समै तेसरै बाबै भेड़ा लै तिन्है हमला किया थिया। दाऊद एक नम्र होर धर्मे मंणछ थिया। तिनी परमेश्वरा गैश भरोसा किया होर तेसरी गला मनी।

जिंया दाऊद अजी जवान शोरो ही थिया, तिनी राक्सा सेंए लांबै-चौड़ै आदमी गोलियतै खिलाफ लड़ाए लड़े। गोलयत एक हैन शक्तिशाली सैनिक थिया। स हैन तगड़ा होर लगभग चन मीटर लांबा थिया! पर परमेश्वरै गोलियता मारणै होर इस्राएली बचाणै कठै दाऊदै सहायता किये। एताका बाद, दाऊदै इस्राएलिए दुश्मना गैश कई बारी जीत हासल कियै। दाऊद एक बड़ा सैनिक बणै गोआ होर तिनी हैना सारी लड़ाई दे इस्राएली सपाहीया मार्गदर्शन किया। लोगै तसरे हैन तारीफ किये।

लोगै दाऊदा सागे एत्रा प्यार किया कि शाऊल तेसका जलन डांदा लागा। अंता दे शाऊल तेस मारणा चाहो थिया, एतिकठै दाऊद शाउल होर शाउलै सपाही का लुकणै कठै स बौणा लै भागे गोआ। एकी धैड़ै, जिंया शाऊल होर तेसरै सपाहै दाऊदा लोड़दै लागैदै थिये तिंया शाऊल एकी डवारा लै डेया ए स डवार थिया जेत दाऊद लुकादा थिया, पर शाऊलै नी स भाड़ी। दाऊद शाऊला पिछो तेसरै हैन नेड़ा लै डेया होर तेसरै झिकड़ै का एक शाटे टुके लौए। बादाका, जिंया शाऊल डवारा का निकड़ा तिंया दाऊदै तेसलै हाक पाए होर स पाकड़ेदे झिकड़ै शाटे दसे। एड़केरे शाऊलै जैणे हेरा कि दाऊदै राजा बणणै कठै तेस मारणै लै ना करे दैये।

कुछ समै का बाद, शाऊल युद्धा दे मरे गोआ, होर दाऊद इस्राएला राजा बणे गोआ। स एक बढ़िया राजा थिया, होर सभ लोग तेस सागे प्यार करो थियै। परमेश्वरै दाऊदा लै आशीष दैये होर स सफल राजा बणाया। दाऊदै कई युद्ध लड़ै, होर परमेश्वरै इस्राएलै दुश्मना हराणै कठै तेसरे मदद किए। दाऊदै यरूशलेम जितेकेरे स आपणे राजधाने बणाए, जिंधे स रौहा होर तिन्ही राज किया। दाऊद चाड़ीए साला तिक राजा रौहा। एस समै दौरान, इस्राएल सामर्थी होर धनवान बणै गोआ।

दाऊद एक मंदर बणाणा चाहो थिया जिंधे सारै इस्राएली लोग परमेश्वरै आराधना करे सको थियै होर तेसरी कठै बले चढ़ाए सको थियै। लगभग 400 साला ओरै। सिंयो लोग मूसै बणाऐदै मिलापा आड़ै ताम्बू दे परमेश्वरै आराधना करो थियै होर परमेश्वरै कठै बले चढ़ाओ थियै।

पर तिंधे नातान नांवा एक भविष्यद्वक्ता थिया। परमेश्वरै स दाऊदा का एड़ा बोलणै कठै भेजा: “तौं हैन सारै युद्ध लड़ैदै, एतिकठै तू मेरी कठै एस मंदरा नी बणाए सकदा। तेरै शोरु ए बणाणा। तैभी मूं तालै आशीष दैणे। तेरै एकी वंशजा सदा तिक मेरै लोगा गैश राजै रुपा दे राज करणा।” सदा तिक राज करणै आड़ा स दाऊदा एकमात्र वंशज मसीह थिया। मसीह परमेश्वरा चुनादा मंणछ थिया जस संसारै लोग तिन्है पापा का बचाणै ।

जिंया दाऊदै नातान भविश्य्दवक्ता संदेश शुणा तिंया तिनी परमेश्वरा धन्यवाद किया होर स्तुते किये। परमेश्वर तेसरा प्रभाव बढ़ांदा लागादा थिया होर तेसलै हैन सारी आशीषा दैंदा लागादा थिया। बेशक, दाऊद नी जैणदी थिया कि परमेश्वरा इंयो सभ गला कभै पूरी करणी। एबै हामै जैणो कि इस्राएली लोगा एकी लांबै समै तिक, लगभग 1,000 साला तिक मसीह आछणैया इंतजार करणा पड़णा।

दाऊदै कई वर्षा तिक सही तरीकै केरे आपणै लोगा गैश राज किया। तिनी बड़े विश्वासा सागे परमेश्वरै गला मनी होर परमेश्वरै तेसलै आशीष दैये। मना, आपणै जीवनै अंता दे तिनी परमेश्वरै खिलाफ भयंकर पाप किया थिया।

एकी धैड़ै दाऊदै आपणी कोठी का बाहरा बाखा लै हेरा होर एक बांके बेटड़े नांहदे भाड़े। स तैसा नी जैणदी थिया, पर तिनी पता किया कि तैसा नांओ बेतशेबा थिया।

आपणे नजर हटाणे बदलै, दाऊदै तैसा आपु गोलै आड़णै कठै एक आदमे भेजा। तिनी तैया सागै नजायज सम्बध बंणाये होर स वापस घौरा लै भेजे दै। थोड़े समै का बाद बेतशेबै एड़ा बोलेकेरे दाऊदा लै समाद भेजा कि स गुर्भणे आसी।

बेतशेबा लाड़ा ऊरिय्याह नांओआ एक मंणछ थिया। स दाऊदै बढ़िया सैनिका मेंझा का एक थिया। एस समै स युद्धा करदा बाहरा लै डेयादा थिया। दाऊदै ऊरिय्याह युद्धा का वापस शादेकेरे तेसलै आपणी लाड़ी सागे रौहणै कठै बोला। पर होर सैनिक युद्धा दे थियै तै ऊरिय्याहै घौरा लै जाणै लै ना किए। तै दाऊदै ऊरिय्याह युद्धा लै वापस भेजा होर सेनापति का तेस युद्धा दे एड़ी जैगहा दे डाणै लै बोला जिंधे दुश्मन सभी का शक्तिशाली थियै ताकि स मारा जाओ। तै एड़ा हुआ कि ऊरिय्याह युद्धा दे मरे गोआ।

ऊरिय्याहै युद्धा दे मरणै का बाद दाऊदै बेतशेबा सागे बैह किया। बादा का, तैसै दाऊदै शोरु लै जन्म दैया। दाऊदै जुण किया तेतकेरे परमेश्वर हैन रुष्ठ थिया, तै तिनी नातान भविष्यद्वक्ता दाऊदा गोलै एड़ा बोलणै कठै भेजा कि तेसरा पाप केत्रा बुरा थिया। दाऊदै आपणै पापा का पश्चाताप किया होर परमेश्वरै स माफ किया। आपणै बाकी जीवना दे, आपणै कठण समै दे भी दाऊद परमेश्वरा पिछो-पिछो चला होर तेसरी गला मनी।

पर दाउदा शोरो मरे गोआ। एड़केरे परमेश्वरै दाऊदा लै सजा दैए। एतै अलावा, दाऊदै मरणै तिक, तेसरै आपणै परिवारै कुछ लोगै तेसरै खिलाफ लड़ाए लड़े, होर दाऊदा आपणे सामर्थ कम होए गोए थिये। पर परमेश्वर विश्वासा लायक थिया होर एबै भी तिनी एड़ा किया जुण तिनी दाऊदा सागे करणैआ वादा किया थिया कि तेस करणा, भले ही दाऊदै तेसरे आज्ञा नी मनी थिये। बादा का, दाऊदै और बेतशेबै दूजा शोरो हुआ, होर तिन्है तेसरा नांओ सुलेमान डाआ।