18. बांडुआ दा राज्य

दाऊद राजै चाड़ीए साला तिक इस्राएल गैश राज किया। तेखा स मरे गोआ, होर तेसरै शोरु सुलैमानै इस्राएला गैश राज करणा शुरू किया। परमेश्वरै सुलैमाना सागे गल किए होर तेसका पूछा स सभीका ज्यादा किजै चाहो कि परमेश्वर तेसरै कठै करै। सुलैमानै परमेश्वरा का माँगा कि परमेश्वर तेस हैन बुद्धिमान बणाऐ दो। ऐसा गलै परमेश्वर हैन खुश किया, एतिकठै परमेश्वरै सुलैमान संसारा सभी का बुद्धिमान मंणछ बणायै दैया। सुलैमानै हैन सारी ज्ञानै गला शिखी होर स एक बुद्धिमान राजा थिया। परमेश्वरै स हैन धनवान भी बणायै दैया थिया।

यरूशलेम नगरा दे सुलैमानै स मंदर बणाया जेतै कठै तेसरै बाबै योजना बणाए थिये होर समान कट्ठै किया थिया। ऐबै लोग मिलापा आड़ै ताम्बूए बजाए मंदरा दे परमेश्वरै आराधना करो थियै होर तेसरी कठै बले चढ़ाओ थियै। परमेश्वर आछैकेरे मंदरा दे हाजर रहो थिया, होर स तिंधे आपणै लोगा सागे वास करो थिया।

पर सुलैमानै दूजै देशै बेटड़ी सागे प्यार किया। तिनी हैन सारी, लगभग 1,000 बेटड़ी सागे बैह करेकेरे परमेश्वरै आज्ञा उलंघन किया इना मेंझा का हैन सारी बेटड़ी पराए देशा का आइदी थी होर आपु सागे आपणै देवतै भी आणैदै थियै होर तिन्है आराधना करणे जारी डाए। जिंया सुलैमान ठगड़ा हुआ तिंया तिनी भी तिन्है देवतै आराधना किये।

एती वजहा केरे परमेश्वर सुलैमाना का रुष्ठ थिया। तिनी बोला कि तेस इस्राएल देश दुइ राज्य दे बाँडेकेरे तेसलै सजा दैणे। तेस सुलैमानै मरणै का बाद एड़ा करणा थिया।

तेखा सुलैमानै मरणै का बाद, तेसर शोरो रहबाम राजा बणा। इस्राएल देशै सभ लोग तेस आपणै राजै रूपा दे स्वीकार करणै कठै कट्ठै हुए। तिन्है रहबामा का शकैत किये जैड़ै सुलैमानै तिनाका हैन कठण मेहनत करायै थिये होर हैन सारै कर बसुलै थियै। तिन्है रहबामा का विनते किये कि तिनाका कम काम करवाया।

पर रहबामै तिन्हा लै बड़ी मूर्खता केरे जवाब दैया, “तुम्है बोलो कि मेरै बाबै सुलैमानै तुमाका कठण परिश्रम करवादा। पर मूं तुमाका तेसका भी ज्यादा कठण परिश्रम करवाणा, होर मूं तुम्हा लै तेसका भी ज्यादै दु:ख दैणै।”

जिंया लोगै स एड़ा बोलदा शुणा तिंया तिना मेंझा का कईयै तेसरा विरोध किया। दस गोत्रै स छाडे दैआ; तेस सागे ऐबै सिर्फ दुए गोत्र ही बचैदै थियै। इनै दुई गोत्रै आपु लै यहूदा राज्य बोला।

बाकियै दस गोत्रै यारोबाम नांओआ एक मंणछ आपणा राजा बणाये दैया। इंयो गोत्र देशै उत्तर-पूर्वी हिस्सै दे थियै। तिन्है आपुलै इस्राएला राज्य बोला।

पर यारोबामै परमेश्वरै खिलाफ बगावत किये होर लोगा का पाप करवाया। तिनी आपणै लोगा द्वारा आराधना करणै कठै दुए मूर्ति बणाई। सिंयो ऐबै यहूदै राज्यै यरूशलेमा दे परमेश्वरै मंदरा दे तेसरी आराधना करदै नहीं डेयै।

यहूदा और इस्राएलै राज्यै लोग दुश्मन बणै गोए होर बार-बार एकी दूजै खिलाफ युद्ध करदै लागै।

इस्राएलै नौंऐ राज्यै दे, सारै ही राजै दुष्ट थियै। इना मेंझा का कई राजै तिन्है जैगहा दे राजा बणणै इच्छा ड़ाणै आड़ै होरी इस्राएलीए जरियै मारैदै थिए।

इस्राएल राज्यै सारै ही राजै होर हैन सारै लौगै मूर्तिए पूजा किये। जिंया तिन्है एड़ा किया, तिन्है परमेश्वरै नजरा दे हैन सारै पाप किये थे जैड़ै कि तिन्है कई बारी वेश्या सागे नजायज सम्बध बंणाये इंधा तिक कि कई बारी मूर्ति आगो शोरुए बले चढ़ाए।

यहूदा राज्यै राजै, दाऊदै वंशज थियै। इना राजै मेंझा का कई भलै आदमे थियै जुणी सही ढंगै केरे राज किया होर परमेश्वरै आराधना किए। पर यहूदै हैन सारै राजै दुष्ट थियै। तिन्है दुष्टता सागे राज किया, होर मूर्तिए आराधना किए। इंदा तिक कि इना मेंझा का कुछ राजै झूठै देवतै आगो आपणै शोरो बलि चढ़ाए। यहूदै हैन सारै लोगै भी परमेश्वरै खिलाफ बगावत किए होर होरी देवतै आराधना किये।