19. भविष्यव्दक्त्ता

परमेश्वर सदा इस्राएली लोगा गोलै भविष्यद्वक्त्ता भेजदा रौहो थिया। भविष्यद्वक्त्ता परमेश्वरा का संदेश शुणो थियै होर तेखा तेस लोगा का दसो थियै।

जिंया अहाब इस्राएलै राज्य गैश राजा थिया तो तेस समै एलिय्याह भविष्यद्वक्त्ता थिया। अहाब एक बुरा आदमे थिया। तिनी लोग यहोवा परमेश्वरा का छाडेकेरे होरी झूठै देवतै आराधना करणै कठै लोग मजबूर कियै थियै जस देव्तैआ नांओ बाल देवता थिया। एतिकठै एलिय्याहै अहाबा का बोला कि परमेश्वर तिन्हा लोगा लै सजा दैणे आड़ा थिया। तिनी तिनाका बोला, “जिंया तिक हाँ भी का पाणी होंणै लै नी बोलू तिंया तिक इस्राएल राज्य दे पांणे नी हुणी होर ना ही पाड़ा पड़नी।” एसा गलै अहाबा एत्रा रुष्ठ करै देया कि तिनी एलिय्याह मारणैआ फैसला लौआ।

तै परमेश्वरै एलिय्याह का बोला कि स बौणा लै जायेकेरे आहाबा का लुकै जाओ। एलिय्याह बौणा दे तैसा बाएया गो पुज्जा जिंधा लै जाणै कठै परमेश्वरै तेसलै बोला थिया। धैड़ दोथी होर धैड़ उडै, पंछे एलिय्याह लै रोटी होर मीट आणो थियै। एस पूरै समै दे, अहाब होर तेसरे सैना एलिय्याह लोढ़दै लागे रौहै, पर सिंयो तेस लोड़ै नी सकै।

पाणी ना होंणै बजहा का कुछ समै का बाद स बा शुके गोए। एतिकठै एलिय्याह नेड़ ही एकी देशा लै डेआ। तेस देशा दे एक गरीब विधवा थिये जसरा एक शोरो थिया। तिना गो खाणैलै लगभग खत्म हुए गोए थिये किलैकि तिंधे कोए फसल नी हुई थिये। पर तेखा भी, तैसै बिटड़ियै एलिय्याहे देखभाड़ किए, एतिकठै परमेश्वरै तैसै होर तैसै शोरुए जरुरता पूरी की, एती बजहा का तैसा आटैया भांडा होर तैसै तेलै कुप्पे कधी भी खाली नी हुई। तेस पूरै अकालै दौरान तिनाका खाणैलै थिये। एलिय्याह तीन साला तिक तिंधे रौहा।

साढ़ै चन साला का बाद, परमेश्वरै एलिय्याह का बोला कि तेस भी का पांणे बरशणा। तिनी एलिय्याह लै वापस इस्राएलै राज्यै लै जायेकेरे अहाबा सागे गला करणै लै बोला। एतिकठै एलिय्याह अहाबा गोलै डेया। जिंया अहाबै स भाड़ा तिंया तिनी बोला, “अच्छा तू आसी, समस्या पैदा करणै आड़ा!” एलिय्याहै जवाब दैया, “समस्या पैदा करणै आड़ा तो तू आसी! तौं यहोवा छाड़े हेरादा। सौही सच्चा परमेश्वर आसी, पर तू बाल देवतै आराधना करदा लागादा। एबै ता इस्राएल राज्यै सभ लोग कर्मेल पर्वता गोलै आड़णै पड़णै।”

तै सभ लोग कर्मेलै धारा गैशा लै डेये। सिंयो मर्द भी आऐ जुण बोलो थियै कि सिंयो बाल देवतै संदेश बोलो। सिंयो बाल देवतै 450 भविष्यद्वक्तै थिऐ। एलिय्याहै लोगा लै बोला, “कभै तिक तुम्हा आपणै मन फिराए डाणै? जै यहोवा परमेश्वर आसी तै तेसरे आरधना करो। जै बाल देवता परमेश्वर आसी तै तेस पूजो।”

तिंया एलिय्याहै बाल देवतै भविष्यव्दक्ता का बोला, “एकी पशु बलि करेकेरे तेसरा मास बलिदान होंणै कठै एकी बेदी गैश डाओ, पर तेत आग नी लाइ। तेता का बाद मूं भी तेड़ा ही करणा, होए एकी लग बेदी गैश मूं स मास डाणा। तै जै परमेश्वर बेदी गैश आग शोटूंग तै तुम्हा जैणणा कि स सच्चा परमेश्वर आसी।” तिंया बाल देवतै भविष्यव्दक्तै एक बले त्यार किए पर तेत आग नी लाइ।

तिंया बाल देवतै भविष्यव्दक्तै बाल देवतै का प्रार्थना किये, “ओ बाल देवतैया, म्हारे शुण!” पूरै धैड़ै तिन्है प्रार्थना किए होर राड़ा पाई होर इंद तिक कि आपुलै चाकू केरे टुकदै लागै, पर बाल देवतै जवाब नी दैई, होर तिनी कोए आग नी शोठी।

बाल देवतै भविष्यव्दक्त्तै बाल देवतै का प्रार्थना करणै लै लगभग पूरे धैड़े लाए। अंता दे तिन्है प्रार्थना करणे बंद किये। तिंया एलिय्याहै दूजै पशुआ मास परमेश्वरै वेदी गैश डाआ। तेताका बाद, तिनी लोगा लै पाणिए बड़ै-बड़ै भांड़ै केरे तेस बलिदाना गैश पांणी शोटणै लै तिंया तिक बोला जिंया तिक कि मास, छिड़ी, होर इंधा तिक कि वेदीये ओरु-पोरुए जमीन पूरी रीति केरे सिने नी होइ।

तिंया एलिय्याहै प्रार्थना किये, ओ यहोवा, अब्राहम, इसहाक, होर याकूबै परमेश्वर, हामालै दसो कि तुम्है इस्राएलै परमेश्वर आसी होर एड़ा भी कि हाँ तेरा दास आसी। मुलै जवाब दै जेतकरे कि इन्हा लोगा जेंणै लोंणा कि कि तू ही सच्चा परमेश्वर आसी।

तिंया ही, सर्गा का आग पड़े होर तेतकेरे मास, छिड़ी, जाना, माटा, होर इंधा तिक कि वेदीया ओरु-पोरुआ पाणे भी फुकूऐ गोआ। जिंया लोगै एड़ा भाड़ा, सिंयो जमीना दे पड़ै होर तिन्है बोला, “यहोवा ही परमेश्वर आसी! यहोवा ही परमेश्वर आसी!”

तिंया एलिय्याहै बोला, “बाल देवतैया एक भी भविष्यव्दक्त्ता बचे केरे नी जांणा चाहिए!” एतिकठै लोगै बाल देवतै भविष्यव्दक्त्तै पाकड़ै होर तिंदा का लग जै निंयै होर सिंयो मारे डायै।

तिंया एलिय्याहै आहाब राजै का बोला, “छेकै आपणै घौरा लै जा, किलैकि बारश होंणै आड़ै आसी।” छेकै ही सर्गा दे बादड़ घोरुए, होर हैन बारश लागणा शुरु होए गोए। यहोवा तेस शुकै खत्म करदा लागादा थिया। एतकेरे प्रकट हुआ कि यहोवा ही सच्चा परमेश्वर आसी।

जिंया एलिय्याहै आपणा काम खत्म करे हेरा, तिंया परमेश्वरै एलीशा नांवा एक मर्द आपणा भविष्यव्दक्त्ता होंणै कठै चुना। परमेश्वरै एलीशै जरियै हैन सारै चमत्कार किऐ। एक चमत्कार नामाना सागे हुआ। स एकी दुश्मनै सैना सरदार थिया, पर तेसलै चांभड़ीया एक बुरा रोग लागा थिया। नामानै एलीशै बारै दै शुणादा थिया, तै स एलीशा गोलै आ होर तेसका तेस ठीक करणै अर्ज किये। एलीशै नामाना का बोला कि जायेकेरे यरदन दरैओए पाणी दे साता बारी डुबकी ला।

तिंया नामाना लै गुस्सा आ। तिनी एड़ा करणै कठै ना किए, किलैकि ए तेसलै मुर्खता आड़ा काम लागो थिया। पर बादाका तिनी आपणा मन बदड़ा होर जायेकेरे यरदन नदियै पाणी दे साता बारी डुबकी लाई। जिंया आखिरी बारी डुबकी लायेकेरे स पाणी का बाहरा लै निकड़ा तै तिंया परमेश्वरै स ठीक किया।

परमेश्वरै इस्राएली लोगा गोलै होर हैन सारै भविष्यव्दक्त्ता भेजै। तिन्है सभी लोगा लै मूर्ति पूजा बंद करणै कठै बोला। एताका अलावा, तिना एक दूजै सागे न्यायपूर्वक व्यवहार करणा चहिए होर एकी दुजै गैश दया करणे चहिए। तिन्है भविष्तव्दक्त्तै लोगा लै चेतावने दैए कि तिन्हा बुरै काम करणै छाड़े दैणै चहिए होर एतै अलावा परमेश्वरै गला मनणी चहिए। जै तिन्है लोगे एड़ा नी किया तै परमेश्वरा सिंयो दोषे मनेकेरे तिन्हा न्याय करणा, होर तिन्हा लै सजा दैणै।

ज्यादातर समै, तिन्है लोगै परमेश्वरै आज्ञा पालन नी की। हमेशा ही तिन्है भविष्तव्दक्त्ता सागे बुरा व्यवहार किया होर इंधा तिक कि कभै-कभै सिंयो मारै भी। एकी बारी, तिन्है यिर्मयाह भविष्यव्दक्त्ता शुकै कुएँ दे पा होर स तिंधे मरणै कठै छाड़ा। स कुएँ पैंदा दे चिकरै दे दाबुआ। पर तिंया राजै लै तेस गैश दया आए होर तिनी आपणै सैनिका लै आदेश दैया कि यिर्मयाह मरणै का पैहलै तेस कुएँ का बाहरा लै काढ़ो।

भविष्यव्दक्त्तै परमेश्वरा बाखा बोलणा जारी डाआ भले ही लोगै तिन्हा सागे नफरत किये। तिन्है लोगा लै चेतावने दैये कि जै सिंयो पश्चाताप नी करो तै परमेश्वरा तिन्हा नाश करणा। तिन्है लोगा लै एड़ा भी याद दला कि परमेश्वरै तिना गोलै मसीहा भेजणै प्रतिज्ञा कियेदे।