20. गुलामी बाखा लै वापस हटणा

इस्राएली होर यहूदी राज्यै लोगै दुइयै परमेश्वरै खिलाफ पाप किया। तिन्है स वाचा चोड़ा जुण परमेश्वरै तिना सागे सीनै धारा दे किया थिया। परमेश्वरै तिन्हा लै पश्चाताप करणै होर भी का तेसरे आराधना करणै कठै चेतावने दैणै कठै आपणै भविष्यव्दक्त्ता भेजै, पर तिन्है तिन्ही गला मनणै का ना किये।

तै परमेश्वरै तिन्है दुश्मना लै तिन्हा नाश करणै कठै सक्षम करणै जरियै दुइ राज्यै लै सजा दैये। अश्शूर एक होर देश थिया जुण हैन शक्त्तिशाली होए गोआ थिया। सिंयो दूजै देशै प्रति हैन निर्दयी भी थियै। तिन्है आछेकेरे इस्राएलै राज्या नाश करे दैया। अश्शूरे आछेकेरे इस्राएलै राज्यै दे हैन सारै मंणछ मारै, जुण चाहा स लूटा, होर देशै कई हिस्सै फूके दैये।

अश्शूरी देशै लोगै सभ अगुवै, अमीर लोग, होर एड़ै लोग जुण मँहगी चिजा बणाये सको थियै इसाएल देशा का कट्ठै कियै होर तिन्है सिंयो अश्शूर देशा लै निंयै। इस्राएला देशा दे ऐबै थोड़े जै ही गरीब इस्राएली लोग बचै थियै।

तेखा अश्शूरी लोगै तेस देशा दे रौहणै कठै बाहरड़ै देशै लोग आणै। तिन्है बाहरड़ै देशै लोगै सिंयो नगर भी का बणाए। जुण इस्राएली लोग तिंधे बचै थियै तिन्हा सागे तिन्है बैह किये। इना लोगै वंशज सामरे कहलाए।

यहूदी राज्यै लोगै भाड़ा कि केड़केरे परमेश्वरै तेस गैश विश्वास ना करणै होर तेसरी गला ना मनणै बजहा का इस्राएली राज्यै लोगा लै सजा दैये थियै। पर तैभी तिन्है कनानी देवतै मूर्तिये उपासना किए। परमेश्वरै तिन्हा लै चेतावनी दैणै कठै भविष्यव्दक्त्ता भेजै, पर तिन्है तिनी गला शुणणै का ना किये।

लगभग 100 साला बाद अश्शूरी लोगै इस्राएलै राज्या नाश किया। परमेश्वरै बेबीलोना राजा, नबूकदनेस्सर यहूदै राज्यै लै हमला करणै लै भेजा। बेबीलोन एक शक्त्तिशाली देश थिया। यहूदा राजा नबूकदनेस्सरा दास बणणै होर हर साल तेसलै हैन सारै ढबैया भुगतान करणै कठै सहमत हुए गोआ थिया।

पर कुछ साला बाद, यहूदै राजै बेबीलोनै खिलाफ झगड़ा किया। तै बेबीलोनै लोगै वापस आछेकेरे यहूदै राज्यै दे हमला किया। तिन्है यरूशलेम नगरा दे कब्जा किया, मंदरा नाश करे दैया, होर नगरा होर मंदरा खजाना लूटे केरे निंया।

झगड़ा करणै वजहा केरे यहूदै राजै लै सजा दैणै कठै, नबूकदनेस्सरै सैनिकै राजैया शोरो तेसरै समनै मारा होर तेखा स कांणा करे दैया। एताका बाद, तिन्है राजा निंया ताकि स बेबीलोनै जेला दे मरे जाओ।

नबूकदनेस्सर होर तेसरी सैनै यहूदै राज्यै लगभग सारै लोग बेबीलोना लै निंयै, सिर्फ सभीका गरीब लोग तिंधे छाडै ताकि सिंयो खेचा दे फसला उगाओ। समै एस काला लै गुलामे बोलो जेतदै परमेश्वरै लोग प्रतिज्ञा कियैदै देशा का बाहरा लै निकड़णै कठै मजबूर कियै थे।

भलै ही परमेश्वरै आपणै लोगा लै तिन्है पापै कठै गुलामी दे निणै जरियै सजा दैये, तैभी स तिन्हा लोगा या आपणै वादै नी भूली थिया। परमेश्वरै आपणै लोगै निगराने करणै जारी डाए होर आपणै भविष्यव्दक्त्तै जरियै तिन्हा सागे गला करदा रौहा। तिनी वाया किया कि सत्तर साला बाद, तिन्हा भी का प्रतिज्ञा कियैदै देशा लै वापस हटणा।

लगभग सत्तर साला का बाद, फारसै राजै कुस्रूए बेबीलोन हराया, एतिकठै बेबीलोनै साम्राज्यै बजाए फारसै साम्राज्यै कई देशा गैश राज किया। इस्राएली लोग ऐबै यहूदी कहलाओ थियै। तिन्हा मेंझा का हैना जैणै आपणे पूरे जिंदगे बेबीलोना दे बिताए हेरे थिये। सिर्फ थोड़ै जै ठगड़ै यहूदी लोगा लै ही यहूदा देश याद थिया।

फारसी लोग हैन शक्तिशाली थियै, पर तिन्है आपणै जीतैदै लोगा गैश दया किये थे। फारसी लोगा राजा बणणै का थोड़ै समै का बाद, कुस्रूए आज्ञा दैये कि कोए भी यहूदे जुण यहूदा लै वापस जाणा चाहो, स फारसा का निकड़ेकेरे वापस यहूदा लै जाए सको। इंधा तिक कि तिनी तिन्हा लै मंदर भी का बणाणै कठै ढबै भी दैये। तै गुलामीए सत्तर साला बाद, यहूदिया एक माठा झुण्ड यहूदा दे यरूशलेम नगरा लै वापस आ।

जिंया सिंयो लोग यरूशलेमा दे पुज्जै तिंया तिन्है मंदर होर नगरै चउ बाखै दवाल भी का बणाये। फारसी लोग अझी भी तिन्हा गैश शासन करो थियै पर एकी बारी भी का वादा कियैदै देशा दे रौंहदै लागैदे थियै होर मंदरा दे उपासना करदै लागैदै थियै।