21. परमेश्वर मसीह भेजणै प्रतिज्ञा करो

जिंया परमेश्वरै संसार बणाया थिया, स जैणो थिया कि तेस बादाका कस धैड़ै मसीह भेजणा पड़णा। तिनी आदम और हव्वा सागे प्रतिज्ञा किये कि तेस एड़ा करणा। तिनी बोला हव्वा का एकी वंशजा जन्म लौणा जस किड़ैआ मुंड झेचणा। जुणी किड़ै हव्वा लै धोखा दैया थिया स शैतान थिया। परमेश्वरा मतलब थिया कि मसीहा पूरी रीति केरे शैतान हराए दैणा।

परमेश्वरै अब्राहमा सागे प्रतिज्ञा किये थिए किआ कि तेसरै जरियै संसारै सभी जातियै लोगा आशीष पांणे। परमेश्वरा बादाका कस समै दे मसीह भेजणै जरियै ए प्रतिज्ञा पूरे करणे। तेस मसीहा संसारै हर एक जातियै लोग तिन्है पापा का छुड़ाणै।

परमेश्वरै मूसा सागे प्रतिज्ञा किये थिये कि भविष्य दे तेस मूसा सैंई एक होर भविष्यव्दक्त्ता भेजणा। ए भविष्यव्दक्त्ता मसीह होंणा। एड़केरे, परमेश्वरै भी का प्रतिज्ञा किये कि तेस मसीह भेजणा।

परमेश्वरै राजा दाऊदा सागे प्रतिज्ञा किये थिए कि तेसरा एक वंशज मसीह होंणा। स राजा होंणा और परमेश्वरै लोगा गैश तेस सदा तिक राज करणा।

परमेश्वरै यिर्मयाह भविष्यव्दक्त्ता सागे गल किए होर बोला कि एकी धैड़ै तेस एक नौंए वाचा बांधणे। स नौंए वाचा इस्राएला सागे सीनै धारा दे बाँधीदी पराणी वाचा सैंई नी हुणी। जिंया लोगा सागे तेस आपणे नौंए वाचा बाँधणे, तिंया तेस तिन्हा गैश आपु व्यक्त्तिगत रूपा केरे प्रकट होंणा। हर एकी मंणछा तेस सागे प्यार करणा होर तेसरी व्यवस्था पालन करणै इच्छा डाणे। परमश्वरै बोला कि ए तेसरी व्यवस्था तिन्है दिला दे लिखणै सैंई होंणा। सिंयो तेसरै लोग होंणे, होर परमेश्वरा तिन्है पाप माफ करणै। स मसीह होंणा जस तिन्हा सागे स नौंए वाचा बाँधणे।

परमेश्वरै भविष्यव्दक्त्तै एड़ा भी बोला कि मसीह एक भविष्यव्दक्त्ता होंणा, एक परोहत होर एक राजा होंणा। एक भविष्यव्दक्त्ता स मंणछ आसी जुण परमेश्वरै वचना शुणो होर तेखा लोगा गैश परमेश्वरै संदेशै घोषणा करो। जस भेजणै परमेश्वरै प्रतिज्ञा किये थिए स मसीह एक सिध्द भविष्यव्दक्त्ता होंणा। मतलब तेस मसीह परमेश्वरै संदेश धोरै केरे शुणणै, होर सिंयो धोरेकेरे समझणै, होर तेस लोगा लै सिंयो संदेश धोरै केरे दसणै।

इस्राएली परोहतै लोगै कठै परमेश्वरा आगो बले चढ़ाणा जारी डाआ। इंयो बली लोगै पापै कठै तिन्हा लै परमेश्वरै जरियै सजा दैणै जैगहा दे चढाइदी थी। परोहतै लोगा लै प्रार्थना भी किए। पर, स मसीह सिध्द महा परोहत होंणा जुण परमेश्वरा लै दैणै कठै एक सिध्द बलिऐ रुपा दे आपु चढ़णा। मतलब, तेस कधी पाप नी करणी, होर जिंया तेस आपु बली चढ़णा, तेखा संसारा दे कोए भी होर बले चढ़ाण जरूरी नी होंणी।

लोगै झुंडा गैश राजा होर प्रधान राज करो, होर कभै-कभै सिंयो पाप भी करो। राजा दाऊदै सिधा इस्राएली लोगा गैश राज किया, पर राजा दाऊदै वंशजा मसीहा पूरै संसारा गैश राज करणा, होर तेस सदा तिक राज करणा। एताका अलावा, तेस हमेशा न्यायपूर्ण रीति केरे राज करणा, होर सही फेसलै लौणै।

परमेश्वरै भविष्यव्दक्त्तै मसीहै बारै दे हैन सारी गला बोली। मनै लओ कि, मलाकी भविष्यव्दक्त्तै बोला कि मसीहा आछणै का पैहलै एक होर भविष्यव्दक्त्ता आछणा। स भविष्यव्दक्त्ता हैन महत्वपूर्ण होंणा। एतै अलावा, यशायाह भविष्यव्दक्त्तै लिखा कि मसीहा एकी कँवारी का जन्म लौणा। होर मीका भविष्यव्दक्त्तै बोला कि मसीहा बैतलहम नगरा दे जन्म लौणा।

यशायाह भविष्यव्दक्त्तै बोला कि मसीहा गलीली जैगहा दे वास करणा। जुण लोग हैन दु:खी आसी मसीहा तिन्हा लै शान्ते दैणे। तेस कैदे आजाद करणै। मसीहा बमार होर जुण शुणे नी सकदै, भाड़े नी सकदै, बोले नी सकदै, या हाँडे नी सकदै सिंयो भी ठीक करणै।

यशायाह भविष्यव्दक्त्तै एड़ा भी बोला कि लोगा मसीह सागे नफरत करणे होर तेस अपनांणै का ना करणे। होरी भविष्यव्दक्त्तै बोला कि मसीहा एक साथे तेसरै खिलाफ उठणा। जकर्याह भविष्यव्दक्त्तै बोला कि तेसरै एस साथी एड़ा करणै कठै दूजै लोगा का चाँदियै ती सिक्के लौणै। एतै अलावा, एखो भविष्यव्दक्त्तै बोला कि लोगा मसीह मारणा, होर एड़ा कि तिन्हा तेसरै झिकड़ै आपु मेंझ बांडड़ै कठै पर्ची पांड़ी।

परमेश्वरै भविष्यव्दक्त्तै एड़ा भी बोला कि मसीह केड़केरे मरणा। यशायाहै भविष्यवक्तै भविषयवांणे किये कि लोगा मसीहा गैश थुकणा, तेसरा मजाक उड़ाणा, होर स जिकणा। तिन्हा स छोपणा होर तेस बड़ै दु:खा होर पीड़ा दे मरणा, जबकि तिनी किछ भी गलत नी हूणी कियादा।

भविष्यदवक्त्तै एड़ा भी दसादा कि मसीहा पाप नी करणी। स सिध्द होंणा। पर स एतिकठै मरणा परमेश्वरा तेसलै होरी लोगै पापै बजहा का सजा दैणे। तेसरै मरणै केरे लोग परमेश्वरा सागे मेल करणै लै सक्षम होंणै। एतिकठै परमेश्वर चाहो कि मसीह मरो।

भविष्यव्दक्त्तै एड़ा भी दसा कि परमेश्वरा मसीह मरैदै मेंझा का जिंओंदा करणा। ए एड़ा दसो कि ए सभ नौंइ वाचा बाँधणै परमेश्वरै तरकीब थिये, ताकि स तिन्हा लोगा बचाए सको जुणी तेसरै विरुध्द पाप कियादा।

परमेश्वरै भविष्यव्दक्त्ता गैश मसीहै बारै दे हैन सारी गला प्रकट की, पर मसीह तिन्हा भविष्यव्दक्त्ता मेंझा का कसीयै जीवनकाला दे नी आई थिया। इन्हा आखिरी भविषयवांणीए दैणै का 400 का ज्यादी साला बाद, सही समै दे, परमेश्वरै मसीह एस संसारा लै भेजा भेजणा।