22. यूहन्ना जन्‍म

बितैदै समै दे, परमेश्वरै आपणै भविष्यव्दक्त्तै सागे गला की थी एतिकठै सिंयो लोगा सागे गल करे पाए थियै। पर तेस समै का लौएकेरे तेखा 400 साला बीतणै तिक तिनी तिन्हा सागे गला नी की। तिंया परमेश्वरै जकर्याह नांओऐ भविष्यव्दक्ता गोलै एक स्वर्गदूत भेजा। जकर्याह होर तेसरे लाड़े एलीशिबा परमेश्वरा आदर करो थियै। सिंयो हैन ठगड़ै हुए गोए थियै, होर तेसरे कोए भी शोरो जमादा नी थी।

तिनी स्वर्गदूतै जकर्याह का बोला, “तेरी लाड़िऐ एक शोरो होंणा। तू तेसरा नांओ यूहन्ना डाया। परमेश्वरा स पवित्र आत्मा केरे परिपूर्ण करणा, होर यहून्ना लोग मसीहा अपनांणै कठै तैयार करणै।” जकर्याहै जवाब दैया, “हाँ होर मेरे लाड़े शोरु पैदा करणै कठै हैन ठगड़ै आसी! हाँ केड़केरे जैणु कि तुम्है मुखा सच बोलदै लागैदै?”

तिनी स्वर्गदूतै जकर्याह लै जवाब दैया ,“ता गोलै एस शुभसंदेश शुणाणै लै हाँ परमेश्वरै भेजादा। किलैकि तौं मूं गैश विश्वास नी की, एतिकठै शोरुए जमणै तिक तू बोलै नी सकदा।” तिंया ही, जकर्याहै मुँहा का आवाज निकड़णे बंद हुए। तिंया स स्वर्गदूत जकर्याह गो का नाठे गोआ। एताका बाद, जकर्याह घौरा लै वापस आ होर तेसरे लाड़े गुर्भणे रौहे।

जिंया एलीशिबा छह महीनै गुर्भणे थिये, तै सौही स्वर्गदूत अचानक एलीशिबै रिश्तेदारा गैश प्रकट हुआ, जसरा नांओ मरियम थिया। मरियम कँवारे थिये होर बैह होंणै कठै यूसुफ नांओऐ मर्दा सागे तैसै खणोड़े होए गोए थिये। स्वर्गदूतै बोला, “ता गैश परमेश्वरै दया होयदै तू गुर्भणे रौहणे होर ता एकी शोरु लै जन्म दैणा। तू तेसरा नांओ यीशु डाया। स सर्व-शक्त्तिमान परमेश्वरा शोरो होंणा होर तेस सदा तिक राज करणा।”

मरियमै जवाब दैया, “ए केड़केरे होंणा, किलैकि हाँ तो कँवारे आसी?” तिनी स्वर्गदूतै स समझाए, “पवित्र आत्मा ता गैश आछणा, होर परमेश्वरै सामर्थ ता गैश छाया करणै। तै स शोरो पवित्र होंणा, और स परमेश्वरा शोरो होंणा।” जुण तिनी स्वर्गदूतै बोला तेस गैश मरियमै विश्वास किया।

एड़ा हुणै का एकदम बादा का, मरियमें जायेकेरे एलीशिबा सागे मुलाक़ात किये। जेड़े ही मरियमै तैसा लै नमस्ते किए, एलीशिबा शोरो पेटा भिथरे चुकदा लागा। तिन्है कठै परमेश्वरै जुण किया थिया तेतै बारै सिंयो बेटड़ी साओगे खुशी हुई। एलीशिबा सागे चन महीनै दे रौहणै का बाद, मरियम घौरा लै वापस आए।

एताका बाद, एलीशिबै आपणै शोरु लै जन्म दैया। जकर्याहै होर एलीशिबै तेस शोरुआ नांओ यूहन्ना डाआ, जेड़ा कि तिनी स्वर्गदूतै हुक्म दैया थिया। तिंया परमेश्वरै जकर्याह बोलणै सामर्थ दैये। जकर्याहै बोला, “परमेश्वरै स्तुते हो, किलैकि तिनी आपणै लोगै सहायता करणै याद डाए! ओ मेरै शोरुआ, तू सर्व-शक्त्तिमान परमेश्वरा भविष्यव्दक्त्ता होंणा। ता लोगा लै दसणा कि केड़केरे आपणै पापा का माफे पाए सको!”