23. यीशुआ जन्म

यूसुफ नांओए एकी धर्मी मंणछा सागे मरियमै खणोडे होए गोए थिये। जिंया तिनी शुणा कि मरियम गुर्भणे आसी तै स जैणो थिया कि स तेसरा शोरो नी आथी। पर, स मरियमा बदनाम नी करणा चांहदा थिया, तै तिनी तैसा गैश दया करणै होर चुफियै राजीनांवा दैणै बारै सोचे। पर एताका पैहलै कि स एड़ा करदा, एकी स्वर्गदूतै तेसरै सुपनै दे आछेकेरे तेस सागे गल किए।

तिनी स्वर्गदूतै बोला, “ओ यूसुफा, मरियमा आपणी लाड़िए रुपा दे आपणै घौरा लै आड़णै का नी डरी। तैसै पेटा दे जुण शोरो आसी स पवित्र आत्मा बाखा आसी। तैसा एकी शोरू लै जन्म दैणा। तेसरा नांओ यीशु डाया (जेता मतलब आसी, ‘यहोवा बचाओ’), किलैकि तेस लोग तिन्है पापा का बचाणै।”

तै यूसुफै मरियमा सागे बैह किया होर स आपणी लाड़िए रुपा दे घौरा लै आणे, पर तैसै शोरु लै जन्म दैणै तिक तिनी स नी छुँई।

जिंया मरियमा हड़खणैआ समा नेड़ आ, तिंया तैसै होर यूसुफै बैतलहम जाणैआ एक लांबा सफर किया। तिन्हा तिंधा लै जाणा ही पड़णा थिया किलैकि रोमी अधिकारी इस्राएला दे रौहणै आड़ै सभी लोगै गिनते करणा चाहो थियै। सिंयो चाहो थियै सभ लोग तिंधा लै जाओ जिंधे तिन्है पुरखै रौहो थियै। राजा दाऊदा जन्म बैतलहमा दे हुआ थिया, होर स मरियम होर यूसुफा दुइ जैहणया पुरखा थिया।

मरियम और यूसुफ बैतलहमा लै डेऐ, पर तिंधे डागै खुड़ै अलावा तिन्है ठहरणै लै कोए जगहा नी थी। सौही जगहा थिये जिंधे मरियमै आपणै शोरु लै जन्म दैआ। तैसै स घा गैश सताया किलैकि तिंधे तेसरै कठै कोए बिस्तरा नी थी। तिन्है तेसरा नांओ यीशु डाआ।

तैसा रैचे, तिंधे नेड़ ही खेचा दे एखो फवाल आपणी भेड़ै झुंड़ै रखवाले करदै लागैदै थियै। अचानक ही, एक चमकदार स्वर्गदूत तिन्हा गो प्रकट हुआ, होर सिंयो डरे गोए। तिनी स्वर्गदूतै बोला, “डरी नी आथी, किलैकि मूं गो थारी कठै शुभ संदेश आसी। जुण सारै संसारै लोगै कठै होंणा। आज दाउद राजै शहर बैतलहमा दे मसीह, स्वामीआ जन्म हुआदा स ही मसीह प्रभु आसी!”

जाएकेरे तेस शोरु लोड़ो, होर तुम्हा स झिकड़ै दे पलेटादा होर घा गैश सुतादा हेरणा।” अचानक ही, सर्ग स्वर्गदूता केरे भरुए गोआ। सिंयो परमेश्वरै स्तुते करदै लागैदै थियै। तिन्है बोला, “सारा आदर स्वर्गा दे विराजमान परमेश्वरा लै मिड़ो। पृथ्वी दे तिन्हा लोगा लै शान्ते मिड़ो जस गैश स अनुग्रह करो!”

तिंया स्वर्गदूत डे गोए। सिंयो फ्वाल भी आपणी भेड़ा छाड़ेकेरे शोरु भाड़दै डेयै। छेकै ही सिंयो तैसा जगहा दे पुज्जै जिंधे यीशु थिया तिन्है स सुतादा भाड़ा, जेड़ा कि तिनी स्वर्गदूतै बोला थिया। सिंयो हैन खुशी थियै। तिंया सिंयो फवाल वापस आए जिंधे तिन्है भेड़ा थी। तिन्है जुण किछ भी शुणा होर भाड़ा तेस सभी कठै सिंयो परमेश्वरै स्तुते करदै लागैदै थियै।

पूर्व दिशा दे दूर एकी देशा दे कुछ मर्द थियै। तिन्है तारैआ अध्ययन किया थिया होर सिंयो हैन बुध्दिमान थियै। तिन्है एक नोखा तारा सर्गा दे भाड़ा थिया। तिन्है बोला कि एता मतलब आसी कि यहूदियै एकी नौंए राजैआ जन्म हुआदा। तै तिन्है तेस शोरु भाड़णै कठै आपणै देशा का सफर करणैया फेसला किया । एकी लांबै सफरा का बाद, सिंयो बैतलहमा शहरा लै आए होर स घौर मिड़ा जिंधे यीशु होर तेसरै आम्मा-बाब रुकैदै थियै।

जिंया तिन्है मर्दै यीशु आपणी आम्मा सागे भाड़ा तिंया तिन्है घुटनै टेकेकेरे तेसरे उपासना किए। तिन्है यीशु लै मैहँगै तोहफै दियै। तेखा सिंयो घौरा लै वापस आए।