24. यूहन्ना यीशु लै बपतिस्मा दैयो

एलीशिबा होर जकर्याहा शोरो यूहन्ना, बड़ा होएकेरे एक भविष्यव्दक्त्ता बणा। स बौणा दे रहो थिया, होर बौणा मखीर होर रैटै खाओ थिया, होर ऊँटै चांभड़ै केरे बणैदै झिकड़ै पैहनो थिया।

हैन सारै लोग यूहन्नै गला शुणणै कठै बौणा लै आयै। तिनी एड़ा बोलेकेरे तिन्हा लै प्रचार किया, “पश्चाताप करो, किलैकि स्वर्गा राज्य नेड़ आसी!”

जिंया लोगै यूहन्ना संदेश शुणा, तै तिन्हा मेंझा का हैना जैणै आपणै पापा पछतावा किया, होर यूहन्नै तिन्हा लै बपतिस्मा दैया। यूहन्ना भाड़दै हैन सारै धार्मिक अगुवै भी आए, पर तिन्है आपणै पापा पछतावा या अंगीकार नी की।

यूहन्नै धार्मिक अगुवै का बोला, “ओ शैतानै शोरुओ! पछतावा करो होर आपणा व्यवहार बदड़ो। परमेश्वरा हरेक स ड़ाड टुकणा जुण बढ़िया फल नी आणदी, होर तेस सिंयो आगा दे पाणै।” जुण भविष्यव्दक्त्तै बोला थिया यूहन्नै स पूरा किया, “भाड़, छेकै ही मूं ता आगो आपणा संदेशवाहक भेजणा जस तेरी कठै पैंड़ा सकेरणा।”

कुछ धार्मिक अगुवै यूहन्ना का पूछा कि स मसीह आसी। यूहन्नै जवाब दैया, “हाँ मसीह नी आथी, पर स मुखा बाद आछदा लागादा। स एत्रा महान् आसी जै हाँ तेसरै बूटे फिथे खोलणै जोगता भी नी आथी।”

आगलै धैड़ै, यीशु बपतिस्मै लौणै कठै यरदन दरैवा दे यूहन्ना गोलै आ। जिंया यूहन्नै स भाड़ा, तिंया तिनी बोला, “भाड़ो! परमेश्वरा छेलो जस संसारै पाप चकेकेरे निंणै।”

यूहन्नै यीशु का बोला, “हाँ तालै बपतिस्मा दैणै लायक नी आथी। बजाए एतै जरूरी आसी कि तू मुलै बपतिस्मा दैओ।” पर यीशुए बोला, “ता मुलै बपतिस्मा दैणा चहिए, किलैकि करणै कठै सही काम एही आसी।” तै यूहन्नै तेसलै बपतिस्मा दैया, हालांकि यीशुऐ कधी भी पाप नी की थिया।

बपतिस्मा दैणै का बाद जिंया यीशु पाणी का निकड़ेकेरे बाहरा लै आ, तिंया पवित्र आत्मा कबूतरै रुपा दे प्रकट हुआ होर उंदे आछेकेरे तेस गैश रुका। तेस ही समै, परमेश्वरै स्वर्गा का गला की। तिनी बोला, “तू मेरा शोरो आसी। हाँ ता सागे प्यार करो, होर हाँ ताखा हैन खुश आसी।”

परमेश्वरै यूहन्ना का बोला थिया, “पवित्र आत्मा उंदे आछेकेरे जस गैश ठहरे जाणा होर जसलै ता बपतिस्मा दैणा।” सौही परमेश्वरा शोरो आसी परमेश्वर एक ही आसी। पर जिंया यूहन्नै यीशु लै बपतिस्मा दैया, तिंया तिनी परमेश्वर पिता गला करदी बारी शुणा, शोरुऐ परमेश्वर भाड़ा, जुण यीशु आसी, होर यीशुए पवित्र आत्मा भाड़ा।