50. यीशु मसीह वापस हटो

करीब दूई हजार साला का, दुनिया दे सभी जगहा दे ज्यादा का ज्यादा लोग मसीह यीशुए बारै दे शुभ संदेश शुंणदै लागैदै। कलीसियै लोग तरक्की करदै लागैदै। यीशुए बादा कियादा कि तेस संसारै अंता दे बापस हटणा। जबकि स अजी बापस नी आथी आयादा, तै भी तेस आपणा बादा पूरा करणा।

जिंया कि हाँमै यीशुए वापस हटणै प्रतीक्षा करो, परमेश्वर हाँमा का एसा रीति केरै जिंदगी जिंणै इच्छा करो जुण पवित्र आसी होर जुण तेसरा आदर करो। स एड़ा भी चाहो कि हामै होरी का भी तेसरै राज्य बारै दे दसो। जिंया यीशु संसारा दे रौह्न्दा लागादा थिया तिंया तिनी बोला, “मेरे चेलै संसारा दे सभी जगहै लोगा लै परमेश्वरै राज्य बारै दे शुभ संदेशा प्रचार करणा, होर तिंया अंत आछे जांणा।”

हैन सारी जातै लोगै अजी तिक यीशुए बारै दे शुभ संदेश नी आथी शुंणादा। स्वर्गा लै वापस जांणै का पैहलै, यीशुए आपणै चेलै का लोगा लै शुभ संदेश शुणांणै लै बोला जुणी ए कबै भी आथी नी शुंणादा। तिनी बोला, “जाओ होर सभी जातै लोगा चेलै बंणाओ! होर “लूड़णै लै खेच पाक्के गोयैदै!’’

यीशुए ए भी बोला, “कसी मंणछा सेवक आपणै स्वामी का बड़ा नी होंदी। एसा संसारै ख़ास मंणछै मूं सागे नफरत किये, होर मेरी बजहा का तिन्हा तुम्है भी दु;खी करेकेरे मारे डांणै। एसा संसारा दे तुम्है दु;खी होंणै, पर मजबूत बंणो, किलैकि मौं शैतान हराये दैयादा जुण एसा संसारा गैश राज करो। जै तुम्है अंता तिक मेरे भरोसै लायक बंणे रहो, तै परमेश्वरा तुम्है बचांणै!’’

यीशुए आपणै चेलै समझाणै कठै एक कथा शुंणाए कि जिंया संसारा अंत होंणा तै लोगा सागे किजै होंणा। तिनी बोला, “कसी मंणछै आपणै खेचा दे बांका बेजा बोआ। जिंया स सुतादा थिया तै तेसरा दुश्मन आया होर कंणकै बेजै मेंझ जंगली बेजैआ पौधा बोए दैया, होर तेखा स नाठे गोआ।’’

“जिंया पौधै दे टीप आयै तै सेवकै तेस मंणछा का बोला, ‘ओ स्वामी, तौं तो आपणै खेचा दे बांका बैजा बोआ थिया, तै तेखा एत जंगली पौधै किलै आसी?’ तिनी मंणछै जबाब दैया, ‘सिर्फ मेरै दुश्मन ही तेस बौंणा चाहूँग । ए मेरा कोई दुश्मन आसी जुणी एड़ा काम कियादा।’”

“तिन्है सेवकै आपणै स्वामी लै जबाब दैया, ‘किजै हाँमा जंगली पौधै पटे दैणै चाहिए?’ तिनी स्वामियै बोला, ‘नहीं। जै तुम्है एड़ा करुँग तै तुम्हा एखो कणक भी पटे दैणै। कटाईयै समै तिक न्हैड़ो। तेखा जंगली पौधै पुड़ै बैने केरे कठा करो ताकि तुम्है तिन्हा फुके सको। पर कंणका मेरे खौड़ा लै लौयेकेरे आछो।’’’

चेलै एसा कथा मतलव नी समझी, एतिकठै तिन्है यीशु का तैसा कथा समझाणै अर्ज किये। यीशुए बोला, “बांका बेजा बौंणै आड़ा मंणछ मसीहा दर्शाओ। खेच संसारा दर्शाओ। बांका बेजा परमेश्वरै राज्य लोगा दर्शाओ।’’

“जंगली पौधै तेस दुष्ट मंणछा, शैतानै लोगा दर्शाओ। तेस मंणछा दुश्मन शैताना दर्शाओ, जुणी जंगली पौधे बौए थिए। कटाए एस संसारै अंता दसो, होर कटाई करणै आड़ै परमेश्वरै स्वर्गदूता दर्शाओ।’’

“जिंया एस संसारा अंत होंणा तिंया स्वर्गदूता सिंयो सभ लोग कठै करणै जुण शैतानै आसी। तिन्हा स्वर्गदूता सिंयो हैन ताती आगै दे शोटणै। तिंदे तिन्हा लोगा भयंकर दु;खा दे चिंगणा होर दांद पिशणै। पर जुण लोग धर्मे आसी, जुणी यीशुआ अनुसरण कियादा, सिंयो तेसरै परमेश्वर पितै राज्य दे सूरजा सैंही चमकणै।’’

यीशुए ए भी बोला कि संसारा अंत होंणै का पैहलै स संसारा दे वापस हटणा। स तेस ही तरीकै केरे बापस आछणा जेड़ेकेरे स डेया था। मतलव, तेसका असली शरीर होंणा, होर स सर्गा दे बादड़ा गैश सवार होयेकेरे आछणा। जिंया यीशु आछणा, तै हर एक मसीह जन जुण मरे गोयैदै सिंयो मरैदै मेंझा का जिउंदै होए जांणै होर तेस सागे सर्गा दे मिड़णै।

तिंया जुण मसीह एबै भी जिउंदै आसी सिंयो सर्गा लै उठायै जांणै होर तिन्हा दूजै मसीह लोगा सागे शामल होए जांणै जुण मरैदै मेंझा का जिउंदै होंणै। सिंयो सभ तिंदे यीशु सागे होंणै। तेताका बाद, यीशु आपणै लोगा सागे रौंहणा। जिंया तिन्हा सागे रौहणा तै तिन्हा गो हमेशा लै पूरे शान्ते होंणे।

यीशुए तेस गैश भरोसा करणै आड़ै सभी मंणछा लै जीवना मुकुट दैणै प्रतिज्ञा कियेदे। तिन्हा हमेशा लै परमेश्वरा सागे हर एकी चिजा गैश राज करणा। तिन्हा गो सच्चे शान्ते होंणे।

पर परमेश्वरा तिन्हा सभीया न्याय करणा जुण यीशु गैश भरोसा नी करदी। तेस सिंयो नरका दे पांणै। तिंदे तिन्हा चिंगणा होर दांद पिशणै, होर सिंयो हमेशा दु;खी रौंहणै। कबै भी नी हिशणै आड़ै आगा सिंयो क्ब्ल्लै फुकणै, होर कीड़ै तिन्हा खांणै का कबै भी नी रुखणी।

जिंया यीशु वापस हटणा, तै तेस पूरी रीति केरै शैतान होर तेसरा राज्य नष्ट करे दैंणा। तेस शैतान नरका दे पांणा। तिंदे शैतान सदा फुकदा रौहणा, तिन्हा सभी सागे जुणी परमेश्वरै गला मंनणै का बजाय शैताना पिछो हांडणा चुना थिया।

किलैकि आदम होर हव्वै परमेश्वरै आज्ञा नी मनी थिए होर पाप एस संसारा लै आंणा थिया, परमेश्वरै तिन्हा लै श्राप दैया होर तिन्हा खत्म करणैया फैसला लौआ। पर कसी धैड़ै परमेश्वरा एक नोंआ स्वर्ग होर एक नोंए संसारै रचना करणे जुण सिद्ध होंणा।

यीशु होर तेसरै लोग तेस नोंए संसारा दे रौंहणै, होर तेस सदा लै सभी चीजा गैश राज करणा। तेस लोगै आखै का हर एक आशो टुशणै। एबै कोए भी दु;खी या परेशान नी होंणी। तिन्हा चिंगणा नी आथी। सिंयो बमार नी होंणी या मरणै नी आथी। होर तिंदे किछ भी बुराए नी होंणी। यीशु आपणै राज्य दे न्यायपूर्वक, होर शान्ति सागे राज करणा। स सदा लै आपणै लोगा सागे रौंहणा।