49. परमेश्वरै नौंए वाचा

एकी स्वर्गदूतै एकी जवान बेटड़ी मरीयमा का बोला कि तैसा परमेश्वरै शोरु लै जन्म दैणा। स अजी कुंवारे थिये, पर पवित्र आत्मा तैसा गैश उतरा होर स गुर्भणे होए। तैसै एकी शोरु लै जन्म दैया जसरा नांओ तैसै यीशु डा। एतिकठै, यीशु परमेश्वर होर मंणछ दुए आसी।

यीशुए हैन सारै चमत्कार कियै जुण दसो कि स परमेश्वर आसी। स पांणी गैश हांडा होर बागर भांण शांत किया। तिनी हैन सारै बमार लोग ठीक कियै होर हैन सारै लोगा का दुष्टात्मा काडी। तिनी मरैदै लोग जिउंदै करे दैये, होर तिनी पांज रोटी दुए माछली पांज हजार लोगा लै खेंणै कठै खांणै दे बदले दैयी।

यीशु एक महान शिक्षक भी थिया। जुण किछ भी तिनी शकेया, स तिनी सिद्ध तरीकै केरे शकेया। जुण स लोगा का करणै लै बोलो स तिन्हा करणा चाहिए किलैकि स परमेश्वरा शोरो आसी। जेड़ा कि, तिनी शकेया तुम्हा लै दूजै लोगा लै तैसा ही रिती केरे प्रेम करणै जरूरत आसी जेड़ा तुम्है आपु सागे प्रेम करो।

तिनी एड़ा भी श्केया कि तुम्हा सभी चिजा का ज्यादा होर आपणी जायदादा का ज्यादा परमेश्वरा सागे प्रेम डांणा चाहिए।

यीशुए बोला कि संसारा दे कसी भी चिजा पांणै का ज्यादा बांका आसी परमेश्वरै राज्य दे होंणा। तेसरै राज्य दे थारा प्रवेश करणै लै जरूरी आसी कि परमेश्वर तुम्हा थारै पापा का बचाओ।

यीशुए बोला कि एखो लोगा स अपनांणा। परमेश्वरा सिंयो लोग बचांणै। पर दूजै लोगा स नी अपनांणी। तिनी ए भी बोला कि एखो लोग बांकी जमीना सैंही आसी, किलैकि सिंयो यीशुए बारै दे शुभ संदेशा अपनाए लौओ, होर परमेश्वर तिन्हा बचाओ। पर एखो लोग पैंडै बंजर जमीना सैंही आसी, परमेश्वरा बचन बेजै सैंही पैंडै दे पड़ो, पर तिंदे किछ भी नी जमदी। इन्है लोगै यीशुआ शुभ संदेश नी अपनायी। सिंयो तेसरै राज्य दे आछणै कठै ना करो।

यीशुए श्केया कि परमेश्वर पापी सागे हैन प्यार करो। स तिन्हा माफ़ करणा चाहो होर तिन्हा आपणै शोरो बनाणा चाहो।

यीशुए ए भी दसा कि परमेश्वर पापा सागे नफरत करो। किलैकि आदम होर हवै पाप किया, एतिकठै तिन्है सारै बंशजै भी पाप किया। एस संसारा दे रौंहणै आड़ै सब मंणछ पाप करो होर परमेश्वरा का दूर आसी। सब मंणछ परमेश्वरै दुश्मन आसी।

पर परमेश्वरै एस संसारा दे रौंहणै आड़ै हर एक मंणछा सागे एसा रीती केरे प्यार किया: तिनी आपणा एकलौता शोरो दैया ताकि परमेश्वर तिन्हा लै सजा नी दैयो जुण तेस गैश भरोसा करो। एतै बजाय, तिन्हा तेस सागे सदा रौहणा।

तुम्है मरणै लायक आसी, किलैकि तुम्है पाप कियादा। परमेश्वरा लै ए सही होंणा कि स तुम्हा लै सजा दैयो, पर यीशुए म्हारी जगहा दे पापै सजा आपु गैश लौये। तिनी यीशु लै क्रूसै मौत दैयेकेरे सजा दैयै।

यीशुए कबै भी पाप नी की, पर तिनी पापै सजा अपनायै कियै, इंदा तिक कि सभीका डरावनै मौतै सजा अपनायै एसा रीति केरे, थारै पाप होर एस संसारा दे रौहणै आड़ै हर एक मंणछै पाप चकणै कठै एक सिद्ध बलिदान थिया। यीशुए परमेश्वरै कठै आपणा बलिदान दैया, एतिकठै परमेश्वर तिन्हा लोगै कसी भी पापा, इंदा तिक कि डरावनै पाप भी माफ़ करो, जुण यीशु गैश बिश्वास डाओ।

भले ही चाहे तुम्है हैन सारै बांकै काम करो, तै एतै जरियै परमेश्वरा तुम्है नी बचाणी। तेसरा साथे बणणै कठै एड़ा किछ भी नी आथी जुण तुम्है करे सको। एतै बजाए, तुम्हा विश्वास करणा चाहिए कि यीशु परमेश्वरा शोरो आसी, होर स थारै बदलै क्रूसा गैश मरे गोआ, होर ए भी कि परमेश्वरै यीशु मरैदै मेंझा का भी का जिउंदा करे दैया। जै तुम्है एत गैश भरोसा करो, तै परमेश्वरा थारै पाप माफ़ करे दैणै।

परमेश्वरा सिंयो सब मंणछ बचाणै जुण यीशु गैश भरोसा करो होर तेस आपणा प्रभो मंजूर करो। पर तेस सिंयो नी बचाणी जुण तेस गैश भरोसा नी करदी। एता कोए मतलब नी आथी कि तुम्है अमीर या गरीब आसी, मर्द या बेटड़े आसी, ठगड़ै या जवान, या तुम्है किंदे रहो। परमेश्वर तुम्हा सागे प्रेम करो होर चाहो कि तुम्है यीशु गैश भरोसा करो कि स थारा साथे बंणे सको।

यीशु तुम्हा शाददा लागादा कि तेस गैश भरोसा करो होर बपतिस्मा लौओ। किजै तुम्है भरोसा करो कि परमेश्वरा एकलौता शोरो, यीशु मसीह आसी? किजै तुम्है भरोसा करो कि तुम्है एक पापी आसी होर ए कि तुम्है परमेश्वरै जरियै तुम्है सजै लायक आसी? किजै तुम्है भरोसा करो कि थारै पापा लै मिटाणै कठै यीशु क्रूसा गैश मरा?

जै तुम्है यीशु गैश होर जुण तिनी थारै कठै कियादा भरोसा करो, होर तेस ग्रहण करो, तै तुम्है एक मसीह आसी! शैतान आपणै न्हैरै राज्य दे एबै तुम्हा गैश राज्य नी करदी। एबै परमेश्वर आपणै प्रैशै राज्य दै तुम्हा गैश राज करो। तिनी तुम्है पाप करणै का रोके दैयैदै, जुण तुम्है किया करो थिये। तिनी तुम्हा लै एक नौंआ, सही जीवन दैयादा आसी।

जै तुम्है एक मसीह आसी तै जुण यीशुए कियादा तेती बजहा का यीशुए थारै पाप माफ कियैदै। एबै, परमेश्वर एक बैरीयै बजाए तुम्हा एक हैन करीबी साथे मनो।

जै तुम्है परमेश्वरै साथे होर प्रभु यीशुए सेवक आसी तै तुम्हा तिन्हा गला पालन करणै इच्छा करणे जुण यीशु तुम्हा का श्केयो। भलै ही तुम्है एक मसीह आसी, शैताना एबै भी पाप करणै कठै थारे परीक्षा करणे। पर परमेश्वर सदा स करो जुण स बोलो कि तेस करणा। स बोलो कि जै तुम्है आपणै पाप मनै लौओ, तै तेस तुम्है माफ करे दैणै। तेस तुम्हा लै पापै खलाफ लड़णै हिम्मत दैणे।

परमेश्वरा तुम्हा लै प्रार्थना करणै लै होर तेसरै बचना पढ़णै लै बोलो। स तुम्हा लै होरी बिश्वासी सागे मिलेकेरे तेसरी आराधना करणै लै भी बोलो। तुम्हा होरी लोगा का भी दसणा कि तिनी थारै कठै किजै कियादा। जै तुम्है इन्हा सभी कामा करो, तै तुम्है तेसरै पाक्कै साथे बंणे जांणै।