48. यीशु ही प्रतिज्ञा कियादा मसीह आसी

जिंया परमेश्वरै दुनिया बंणाए तै सब किछ हैन बांका थिया। कोए पाप नी थी। आदम होर हवा एकी दूजै सागे प्रेम करो थिये, होर सिंयो परमेश्वरा सागे प्रेम करो थिये। कोए बमारे होर मौत नी थी। परमेश्वर एड़े ही दुनिया चाहो थिया।

शैतानै किड़ै जरियै बगीचै दे हवा सागे गला की, किलैकि स तैसा लै धोखा दैणा चाहो थिया। तिंया हवा होर आदमै परमेश्वरै खिलाफ पाप किया थिया। किलैकि तिन्है पाप किया था एतिकठै संसारा दे रौंहणै आड़ै सब मंणछ मरो।

किलैकि आदम होर हवै पाप किया था, एतिकठै किछ होर बुरा भी होआ। सिंयो परमेश्वरै दुश्मन बंणे गोए। जेतै परिणाम-स्वरूप, तिंया का हर एकी मंणछै पाप कियादा। हर एक मंणछै जन्मा का ही पाप कियादा। हर एक मंणछ जन्मा का ही परमेश्वरा दुश्मन आसी। परमेश्वर होर लोगा मेंझ शांते नी थी। पर परमेश्वर शान्तिए स्थापना करणा चाहो थिया।

परमेश्वरै प्रतिज्ञा किये कि हवै एकी बंशजा शैताना मुंड झेचणा। तिनी ए भी बोला कि शैताना तेसरे घुंडे डसणे। दूजै शब्दा दे, शैताना मसीह मारणा, पर परमेश्वरा स भी का जिउंदा करे दैणा। एतका बाद, मसीहा शैतानै शक्ते सदा लै खत्म करे दैणे। कई साला का बाद, परमेश्वरै प्रकट किया कि स मसीह यीशु आसी।

परमेश्वरै नूहा लै एक जहाज बंणाणै कठै बोला ताकि स तैसा प्रलय का आपणै परिवारा बचाये सको जस परमेश्वर भेजणै आड़ा थिया। कि एहड़े केरे परमेश्वरै सिंयो लोग बचाए जुण तेस गैश भरोसा करो थिये। एड़केरे, सिंयो सब के सब परमेश्वरै जरियै मारे डांणै लायक थिये किलैकि तिन्है पाप किया था। पर परमेश्वरै तिन्हा सभी बचाणै कठै यीशु भेजा जुण तेस गैश भरोसा करो।

कई शो साला तिक, परोहत परमेश्वरा लै बलिदान चढ़ांदै रौहै। ए दसो कि मंणछै पाप किया, होर ए कि सिंयो परमेश्वरै जरियै सजा दैणै लायक थिये। पर सिंयो बलिदान तिन्है पाप माफ़ नी करे सको थियै। यीशु सभी का बड़ा मुख्य परोहत आसी। तिनी स किया जुण कोए भी परोहत नी करे सकदा थिया। तिनी सिर्फ बलिदान होंणै कठै आपणे बले दैये जुण हर कसियै पाप मिटाए सको थिया। तिनी मनै लोआ किया कि परमेश्वर तिन्हा सभीयै पापा कठै तेसलै सजा दैयो, एती बजहा का, यीशु सिद्ध मुख्य परोहत थिया।

परमेश्वरै अब्राह्मा का बोला, “मूं तेरै जरियै संसारै सभी कुलै लोगा लै आशीष दैणे।’’ यीशु एस ही अब्राह्मा बंशज थिया। परमेश्वर अब्राहमै जरियै सभी कुलै लोगा लै आशीष दैओ, किलैकि जुण यीशु गैश भरोसा डाओ परमेश्वर तिन्हा सभी पापा का बचाओ। जिंया इंयो मंणछ यीशु गैश भरोसा करो, तै परमेश्वर तिन्हा अब्राह्मा बंशज मनो।

परमेश्वरै अब्राह्मा का बोला कि स आपणा एकलौता शोरो, तेसरै कठै बलिदान करे दैयो। पर तेखा परमेश्वरै इसहाकै बदलै दे बली करणै कठै एक छेलो दैया। हांमै सब आपणै पापै कठै मारे डांणै लायक थिए! पर परमेश्वरै म्हारी जगहा दे मरणै कठै यीशु बलिदानै रूपा दे दैया। एती बजहा का ही हाँमै यीशु लै परमेश्वरा छेलो बोलो।

जिंया परमेश्वरै मिस्र देशा गैश आखरी मुसीबत भेजे तै तिनी हर एक इस्राएली परिवारा का बोला कि सिंयो एकी छेलुए बले करो। तेस छेलू दे कोए दोष नी होंणा चाहिए, तै तिन्हा आपणै दरवाजै चौखटा गैश होर कनारे दे तेसरा खून लांणा थिया। जिंया परमेश्वरै स खून हेरा तै स तिन्है घौरा का आगो बड़े गोआ होर तिन्है पैहलकै शोरो नी मारी। जिंया स हुआ तै परमेश्वरै तेता लै फसह पर्व बोला।

यीशु फसह पर्वे एकी छेलू सैंही आसी। तिनी कबै भी पाप नी की, एतिकठै तेसदै किछ भी गलत नी थी। स फसह पर्वे समै दे मरा। जिंया कोए यीशु गैश भरोसा करो, तिंया यीशुआ खून तेस मंणछै गुनाहे कीमत चुकाओ। ए एड़ा आसी जेड़ा कि परमेश्वर तेस मंणछा का आगो बड़े गोआ, किलैकि स तेसलै सजा नी दैंदी।

परमेश्वरै इस्राएली लोगा सागे एक वाचा बैने, किलैकि सिंयो एड़ै लोग थिए जुण परमेश्वरै आपणै होंणै कठै चुनैदै थिए। पर एबै परमेश्वरै एक एड़ै वाचा बैने जुण सभी लै आसी। जै कसी भी जाता कोए भी मंणछ एसा नौंइ वाचा अपनाओ, तै स परमेश्वरै लोगा मेंझ शामिल होए जाओ। स एड़ा एतिकठै करो किलैकि स यीशु गैश भरोसा डाओ।

मूसा एक एड़ा भविष्यवक्ता थिया जुणी परमेश्वरा बचन बड़ी सामर्था सागे प्रचार किया थिया। पर यीशु सभी भविष्यवदकतै मेंझ सभी का बड़ा आसी। स परमेश्वर आसी, एतिकठै जुण किछ भी तिनी किया होर बोला सिंयो परमेश्वरै काम होर बचन थिये। एतिकठै पवित्र–शास्त्र यीशु लै परमेश्वरा बचन बोलो।

परमेश्वरै राजा दाउदा का प्रतिज्ञा किये थे कि राजै रूपा दे तेसरा एक बंशज परमेश्वरै लोगा गैश हमेशा राज करणा। यीशु परमेश्वरा शोरो होर मसीह आसी, एतिकठै स राजा दाउदा बंशज आसी जुण हमेशा लै राज करे सको।

दाउद तो इस्राएला राजा थिया, पर यीशु सारै संसारा राजा आसी! स भी का आछणा होर हमेशा लै न्याय होर शान्ति सागे आपणै राज्य गैश शासन करणा।