47. फिलिप्पी शहरा दे पौलुस होर सीलास

जिंया शाऊलै पूरै रोमी सम्राज्य दे यात्रा किये तै तिनी आपणा रोमी नांओ “पौलुस” इस्तेमाल करणा शुरू करे दैया। एकी धैड़ै, पौलुस होर तेसरा साथे सीलास फिलिप्पी शहरा दे यीशुए बारै दे शुभ संदेश शुणांणै कठै डेयै। सिंयो नगरा का बाहरे दरैयोए कनारे दे एकी जगहा लै डेयै जिंदे लोग प्रार्थना करणै लै कठै होए थिए। तिंदे सिंयो लुदिया नांओए एकी बेटड़ी सागे मिलै जुण एक व्यपारे थिए। स परमेश्वरा सागे प्यार करो थिये होर तेसरे आराधना करो थिए।

परमेश्वरै स बेटड़े लुदिया यीशुए बारै दे संदेशा गैश भरोसा करणै लै तैयार किये। पौलुस होर सीलासै तैसा लै होर तैसै टबरा लै बपतिस्मा दैया। तैसै पौलुस होर सीलासा लै आपणै घोरै रुकणेया छांदा किया, एतिकठै सिंयो तिंदे रुके गोए।

पौलुस होर सीलास लोगा सागे बार-बार तैसा जगहा दे मिड़ो थिए जिंदे यहूदी लोग प्रार्थना किया करो थिए। धैड़ जिंया सिंयो तिंदा लै जाओ थिए तै एक दासीये शोरे जुण दुष्टात्मै काबू दे थिए तिन्हा पीछा करो थिए। एसा दुष्टात्मै मददै केरे स लोगा लै तिन्हा भविष्य दसो थिए, एतिकठै स भविष्य दसणै केरे आपणै स्वामीए कठै हैन धन कमाया करो थिये।

तिन्है जांदे समै ए दासे शोरे राड़ा लाओ थिए, “इंयो मर्द परम प्रधान परमेश्वरै सेवक आसी। इंयो तुम्हा लै मुक्ति पांणैया पैंडा दसदै लागैदै!’’ स धैड़ एड़ा करो थिये जेतकेरे पौलुस तंग होए गोआ।

अंता दे, एकी धैड़ै जिंया तैसै दासी शोरियै राड़ना शुरू किया, तै पौलुसै तैसा बाखा लै मुंह करेकेरे तैसा भीतरै दुष्टात्मा का बोला, “यीशुए नांओए केरे एसा मेंझा का निकड़े जा।’’ तैस ही समै तैसै दुष्टात्मै स छाडे दैये।

तैसा दासी शोरियै स्वामें हैन गुस्सै होए गोए। तिन्है जैणे लौआ कि तैसा दुष्टात्मै बगैर स दासे शोरे लोगा लै भविषय नी दसे सकदे थिए। एता मतलव था कि लोगा एबै तैसै स्वामी लै ढब्बै नी दैणी कि स तिन्हा लै भविष्य दसो की तिन्हा सागे किजै होंणा।

एतिकठै तैसा दासी शोरियै स्वामीए पौलुस होर सीलास रोमी अधिकारी गोलै निंयै। तिन्है पौलुस होर सिलास जिक्कै, होर तेखा सिंयो जेला दे पाये दैये।

तिन्है पौलुस होर सीलास जेलै एड़ै हिस्सै दे डायै जिंदे सभी का ज्यादै सपाहै थियै। इंदा तिक कि तिन्है तिन्है पैर काठै बड़े टुकड़ै दे जोड़े दैये। पर पौलुस होर सीलास आधी रैचै समै, परमेश्वरै स्तुतियै गांणै गांदै लागैदै थिए।

अचानक ही, एक डरावने जाजरे होये! जेलै सारै दरवाजै खुले गोए, होर सारै कैदी जंजीरा खुलेकेरे पड़े गोइ।

तिंया दरोगा खड़ुए गोआ। तिनी हेरा कि जेलै दरवाजै खुलैदै थिए। तिनी सोचा कि सारै कैदे बचेकेरे भागे गोए थिए। स डरे गोआ कि तिन्है भागणै बजहा का रोमी अधिकारी स मारे डांणा, एतिकठै स आपु लै मारणै कठै तैयार होए गोआ! पर पौलुस तेस हेरेकेरे चिल्लाया, “रुके जा! आपु लै नुक्सान नी पजैड़ी। हाँमै सब इथी आसी।’’

तिनी दरोगै कामब्दी पौलुस होर सीलासा गो लै आछेकेरे पूछा, “मुक्ति पांणै कठै हाँ किजै करु?’’ पौलुसै जबाब दैया, “प्रभु यीशु गैश भरोसा कर, तै ता होर तेरै टबरा मुक्ते पांणे।’’ तिंया तिनी दरोगै पौलुस होर सीलास आपणै घौरा लै निंयै होर तिन्है घाव धोयै। पौलुसै तेसरै घोरै सभी टबरा लै यीशुए बारै दे शुभ संदेश शुणाया।

दरोगै होर तेसरै परिवारै यीशु गैश भरोसा किया, एतिकठै पौलुस होर सीलासै तिन्हा लै बपतिस्मा दैया। तिंया दरोगै पौलुस होर सीलासा लै खांणे लै खैये, होर सिंयो सागे ख़ुशी होए।

आगलै धैड़ै नगरै अगुवै पौलुस होर सीलास जेला का आजाद कियै होर फ़िलिप्पी शहरा का नाठे जांणै लै बोला। पौलुस होर सीलास लुदिया होर एखो होरी साथी सागे मिड़ै होर तेताका बाद नगरा का निकड़े गोए। यीशुए बारै दे शुभ संदेश फैलदा गोआ, होर कलीसिया बड़दे गोए।

पौलुस होर बाकी मसीह अगुवै हैन सारै नगरै यात्रा किये। तिन्है लोगा लै यीशुए बारै दे शुभ संदेश शुणाया। तिन्है कलीसियै विश्वासी लै बढ़ावा दैणै होर शिक्षा दैणै कठै कई चिठ्ठी लिखी। एता मेंझा का एखो चिठ्ठी बाइबलै कताबा बंणे गोई।