46. पौलुस मसीहा विश्वासे बंणे जाओ

शाऊल नांओआ एक आदमें थिया जुणी यीशु गैश भरोसा नी की थिया। जिंया स जवान थिया, तिंया तिनी सित्फनुसा मारणै आड़ै लोगै झिकड़ैया पौहरा किया थिया। बादा का, तिनी विश्वासे लोग तड़फायै थिये। तिनी यरुशलैम शहरा दे घौरै-घौरै जायेकेरे मर्द होर बेटड़ी दुए गिरफ्तार करेकेरे जेला दे पायै थियै। तिंया मुख्य परोहतै शाउला लै दमिश्क नगरा दे जांणै जाजत दैये। तिनी तिंदे मसीह लोगा लै गिरफ्तार करणै लै होर तिन्हा वापस यरुश्लेम शहरा लै आड़णै कठै शाउला का बोला।

तै शाऊलै दमिश्क नगरा लै जांणै यात्रा शुरू किये। तेस नगरा दे पुज्जणै का थोड़ै पैहलै, तेस चउ बाखा सर्गा का एक चमकीला प्रैशा चमका, होर स जमीना गैश पड़ा। शाऊलै कोए बोलदा शुंणा, “ओ शाउल! ओ शाउल! तू मूलै किलै दुःख दैयो?’’ शाउलै पूछा, “ओ प्रभुआ तू कुण आसी?’’ यीशुए तेसलै जबाब दैया, “हाँ यीशु आसी। तू मूलै दुःख दैंदा लागादा!’’

जिंया शाउल उठा तै स हेरे नी सकदा थिया। तेसरै साथीये स दमिशक नगरा लै निंया थिया। शाऊलै चन धैड़ै तिक किछ भी खाया होर पीया नी थी।

द्मिश्का दे हनन्याह नांओआ एक चेला थिया। परमेश्वरै तेसका बोला, “तेस घौरा लै जा जिंदे शाउल ठहरदा। आपणै हाथा तेस गैश डा ताकि स भी का हेरदा लागो।’’ पर हनन्याहै बोला, ओ प्रभु, मौं शुंणादा कि इन्ही आदमियै बिश्वासी लै केड़ै कष्ट देयैदै।’’ परमेश्वरै तेसलै जबाब दैया, “जा! मौं स यहूदी लोगै होर दूजी जातै लोगा मेंझ मेरै नांओआ एलान करणै कठै चुनादा। तेस मेरे नांओए कठै हैन कष्ट झेलणै।’’

तै हनन्याह शाउला गो लै डेया, आपणै हाथ तेस गैश डायै, होर बोला, “यीशुए, जुण इंदा लै आछदी बारी ता गैश प्रकट होआ थिया, तिनी हाँ ता गो लै भेजादा ताकि तू भी का हेरदा लागो, होर पवित्रात्मा ता भरे दैओ।’’ तिंया ही शाउल हेरणै लायक होए गोआ, होर हनन्याह तेसलै बपतिस्मा दैया। तेखा शाउलै खांणै लै खाए होर भी का बलवान होए गोआ।

तिंया का, शाउलै दमिश्क नगरा दे रौंहणैआड़ै यहूदी लोगा मेंझ प्रचार करणा शुरू किया। तिनी बोला, “यीशु ही परमेश्वरा शोरो आसी!’’ यहूदी लोग हैरान थिए, किलैकि शाउलै तो विश्वासी लोगा मारणै कोशिश किये थिये, पर एबै तिनी यीशु गैश विश्वास किया थिया। शाउलै यहूदी लोगा सागे वाद-विवाद किया, तिनी दसा कि यीशु ही मसीह आसी।

हैन धैड़ै का बाद, यहूदी लोगै शाऊला मारणै तरकीब बणाए। तिन्है तेस मारणै कठै नगरै दरवाजै गोलै लोग भेजै। कि तेसरे पौहरेदारे करो पर शाउलै तैसा योजनै बारे दे शुंणे हेरा, होर तेसरै साथियै बचेकेरे निकड़णै दे तेसरे मदद किये। एकी रैचे तिन्है स छाबड़ै दे बशैड़े केरे नगरै दीवारा का उंदै उतारे दैया। द्मिश्क नगरा का बचेकेरे निकड़णै का बाद शाउलै यीशुए बारै दे प्रचार करणा जारी डा।

शाउल प्रेरिता सागे मिड़दा यरुश्लेम शहरा लै डेया, पर सिंयो तेसका डरो थिये। तिंया बरनबास नांओए एकी विश्वासियै शाउल प्रेरिता गोलै निंया। तिनी तिन्हा का दसा कि शाउलै केड़ेकेरे नड्डर होयेकेरे द्मिश्क नगरा दे प्रचार किया था। तेताका बाद, प्रेरितै शाऊल अपनाए लौआ।

एखो विशवासै जुण यरूशलेमै सतावा का भागे गोए थिए सिंयो दूर अंताकिया कस्बै लै डे गोए थियै होर यीशुए बारै दे प्रचार करो थियै। अंताकिया दे रौंहणैआड़ै लोग ज्यादातर यहूदी नी थी, पर पैहली बार, तिन्हा मेंझा का हैन सारै लोग विश्वासी बंणे गोए। बरनबास होर शाउल इन्हा नौंए विश्वासी लै यीशुए बारै दे होर ज्यादा शकेणै कठै तिन्दा लै डेयै होर कलीसियै लोग मजबूत कियै। यीशु गैश भरोसा करणै आड़ै पैहली बारी अंताकिया कस्बै दे ही “मसीह’’ कहलायै।

एकी धैड़ै, अंताकिया कस्बै मसीह लोग ब्रता सागे प्रार्थना करदै लागैदै थिये। पवित्र आत्मै तिन्हा का बोला, “मेरै कठै बरनबास होर शाऊला तेस कामा करणै कठै लग करे दैओ जस करणै कठै मौं सिंयो शादैदै।’’ एतिकठै अंताकियै कलीसियै बरनबास होर शाऊलै कठै प्रार्थना किये होर तिन्हा गैश आपणै हाथ डायै। तिंया तिन्है सिंयो होरी हैन सारी जगहा दे यीशुए बारै दे शुभ संदेशा प्रचार करणै कठै भेजै। बरनबास होर शाऊलै लग-लग जातै लोगा लै शिक्षा दैये, होर हैन सारै लोगै यीशु गैश भरोसा किया।