45. स्तिफनुस और फिलिप्पुस

पैहलै मसीह अगुवै मेंझ स्तिफनुस नाओंआ एक मर्द थिया। सभ लोग तेसरा आदर करो थिये। पवित्र आत्मै तेसलै हैन सामर्थ होर अक्ल दैयेदे थिये। स्तिफनुसै हैन सारै चमत्कार कियै थियै। जियां तिनी यीशु गैश भरोसा करणै शिक्षा तिन्हा लै दैये तिंया हैन सारै लोगै तेस गैश विश्वाश किया।

एकी धैड़ै, स्तिफनुस यीशुए बारै दे शिक्षा दैंदा लागादा थिया, होर एखो एड़ै यहूदी लोग आए जुणी यीशु गैश विश्वास नी की थिया होर तेस सागे बहस-बसाए करणे शुरू किये। सिंयो हैन गुस्सै होए, तै सिंयो धार्मिक अगुवै गोलै डेयै होर तेसरै बारै दे झूठ बोला। तिन्है बोला, “हाँमै स्तिफनुस मूसा होर परमेश्वरै बारै दे गलत गला बोलदा शुणा!” एतिकठै धार्मिक अगुवै स्तिफनुस गिरफ्तार किया होर स मुख्य परोहता गोलै होर यहूदियै होरी अगुवै गोलै आंणा। होर भी झूठै गवाह आयै होर तिन्है स्तिफनुसै बारै दे झूठ बोला।

मुख्य परोहतै स्तिफनुसा का पूछा, “किजै इंयो लोग तेरै बारै दे सच बोलदै लागैदै?” स्तिफनुसै मुख्य परोहता लै जवाब दैणै कठै हैन गला बोलणी शुरू करे दैयी। तिनी बोला कि अब्राहमै समै का यीशुए समै तिक परमेश्वरै इस्राएली लोगै कठै हैन चमत्कारी काम कियै। पर लोगै सदा परमेश्वरै आज्ञा नी मनी। स्तिफनुसै बोला, “तुम्है लोग परमेश्वरै विरुद्ध हठी होर झगड़ा करणै आड़ै आसी। तुम्है सदा पवित्र आत्मा स्वीकार नी की, जैड़ा कि म्हारै पूर्वजै पवित्रात्मा सदा स्वीकार नी की थिए होर सदा तेसरै भविष्यवक्ता मारे दैये थिए। पर जुण तिन्है किया थिया तैती तुलना दे तुम्है होर भी हैन बुरा कियादा! तुम्है मसीह मारे दैया!”

जिंया तिन्है धार्मिक अगुवै ए शुणा, तै सिंयो एतरै गुस्सै होए गोए कि तिन्है आपणै कान बंद करे लौए होर जोरै-जोरै चिल्लाए। तिन्है सित्फनुस रगड़े केरे नगरा का बाहरा लै निंया होर तेस मारणै कठै तेसलै पाथरै बाए।

जिंया सित्फनुस मरदा लागादा थिया, स चिल्लाये उठा, “ओ यीशु, मेरी आत्मा ग्रहण कर!’’ तिंया स आपणै घुटनै बला दे पड़ा होर भी का चिल्लाये उठा, “ओ प्रभु, एस पापा तिन्हा गैश नी आंणी। तेखा स मरे गोआ।

तेस धैड़ै, यरुश्लेम शहरा दे रौहंणै आड़ै हैन सारै लोगै यीशु मंनणै आड़ै लोगा लै कष्ट देणै शुरू करे दैयै एतिकठै विश्वासै लोग दूजी जगहा लै भागे गोए। पर एतै बावजूद भी, जिंदे किंदे भी सिंयो डेयै तिन्है यीशुए वचनै बारै दे प्रचार किया।

फिलिप्पुस नांओआ यीशुआ एक बिश्वासी थिया। जेड़ा कि होरी हैन सारै विश्वासीयै किया था स भी यरुश्लेम शहरा का भागे गोआ। स सामरिया नांओए जगहा लै नाठे गोआ। तिंदे तिनी लोगा मेंझ यीशुए बारै दे प्रचार किया। हैन सारै लोगै परमेश्वरा गैश भरोसा किया होर मुक्ते पाये। एकी धैड़ै, फिलिप्पुसा गोलै परमेश्वरा बाखा एक स्वर्गदूत आया होर तेसलै बौंणा लै जांणै कठै होर सड़का दे हांडणै कठै बोला। फिलिप्पुस तिंदा लै नाठे गोआ। जिंया स तैसा सड़का दे हांडदा लागादा थिया, तै तिनी आपणै रथा दे एक आदमे आपणै रथा दे जांदा हेरा। ए मंणछ कूश देशा एक ख़ास अधिकारे थिया। पवित्र आत्मै फिलिप्पुसा का बोला कि जायेकेरे तेस मंणछा सागे–सागे चाल होर तेस सागे गला कर।

एतिकठै फिलिप्पुस रथा गोलै डेया। तिनी शुणा कि स कूश देशा आदमे परमेश्वरा बचन पढ़दा लागादा थिया। जुण यशायाह भविष्यदवक्तै लिखादा थिया स तेस पढ़दा लागादा थिया। स पढ़दा लागादा थिया, “तिन्है स बध करणै आड़ी छेलु सैंही निंया, होर जेड़ा एक छेलो शांत हो, तिनी एक शब्द भी नी बोली। तिन्है तेस सागे गलत व्यवहार किया होर तेसरा आदर नी की। तिन्है तेसरै प्राण लौए।’’

फिलिप्पुसै तेस कूश देशै लोगा का पूछा, “जुण तू पढ़दा लागादा किजै तू तेस समझो भी?’’ तिनी कूश देशै लोगै जबाब दैया, “नही। जिंया तिक कोए मूखा एस नी समझाओ, तिंया तिक हाँ एस समझे नी सकदा। दया करेकेरे मूं गो आछेकेरे बैठ। यशायाह ए आपणै बारै दे लिखदा लागादा थिया या कस होरियै बारै दे?’’

फिलिप्पुस रथा दे चढे केरे बैठे गोआ। तिंया तिनी तेस कूश देशै लोगा लै ए दसा जुण यशायाहै यीशुए बारै दे लिखादा था। फिलिप्पुसै परमेश्वरै वचनै हैन सारै होरी भागै भी चर्चा किये। एड़ै केरे, तिनी तेस आदमी लै यीशुए बारै दे शुभ संदेश शुणाया होर तिनी आदमियै यीशु गैश भरोसा किया।

फिलिप्पुस होर स कूश देशा लोग आछदी बारी पांणी गो लै आयै। तिनी कूश देशै लोगै बोला, “हेर इंदे पांणे आसी! किजै हाँ बपतिस्मा लौए सको?’’ होर तिनी सारथी लै रथ रोकणै लै बोला।

तै सिंयो पांणी मेंझा लै डेयै, होर फिलिप्पुसै तेस कूशी लोगा लै बपतिस्मा दैया। जिंया सिंयो पाणी का बाहरा लै आयै, तिंया पवित्रात्मै अचानक ही फिलिप्पुस चकेकेरे कस होरी जगहा लै निंया। तिंदे फिलिप्पुसै लोगा लै यीशुए बारै दे बोलणा जारी डा।

स कूश देशा आदमे आपणै घौरै यात्रा दे आगो बड़े गोआ। स ख़ुशी थिया कि स एबै यीशुए बारै दे जैणो थिया।