44. पतरस होर यूहन्ना एकी भिखारी चंगा करो

एकी धैड़ै, पतरस होर यूहन्ना मंदरा लै डेयै। एक अपंग मंणछ चोराहै दे भीख मांगदा बैठादा थिया।

पतरसै तेस लैंगड़ै मंणछा बाखा लै हेरा होर बोला, “मुखा तालै दैणै लै ढब्बै तो आथी नी। पर जुण किछ मुखा आसी स मूं तालै दैणा। यीशुयै नाओंए केरै, खड़ी होर हांड-फिर!”

तिंया ही, परमेश्वरै स लैंगड़ा मंणछ ठीक करे दैया। तिनी ओरै -पोरै हांडणा होर छाड़ा लांणी, होर परमेश्वरै स्तुते करणे शुरू किये। मंदरै आंगना दे जुण लोग हाजर थियै सिंयो हैरान थियै।

छेकै ही लोगै एक भीड़ तेस मंणछा हेरदै आयै जुण ठीक होआ थिया। पतरसै तिन्हा का बोला, “ए मंणछ ठीक आसी, पर ऐसा गला दे हैरान नी होई। हाँमै ए आपणी शक्ति केरै ठीक नी की, होर एतिकठै नी कि हाँमै परमेश्वरा आदर करो। बल्कि, ए यीशु आसी जुणी ए मंणछ आपणी शक्ति केरै ठीक किया, किलैकि हामें यीशु गैश विश्वाश करो।”

“सिंयो तुम्है ही लोग आसी जुणी रोमी राज्यपाला लै यीशु मारणै लै बोला। तुम्है स मारे दैया जुण सभी लै जीवन दैयो। पर परमेश्वरै स मरैदै मेंझा का जिउंदा किया। तुम्है नी समझी कि तुम्है किजै करणा लायादा थिया, पर जियां तुम्है तिन्हा कामा करदै लागैदै थिए, तै जुण भविष्यदवक्तै बोला थिया स पूरा होआ। तिन्है बोला थिया कि मसीहा दुःख सहणा ओर मरे जांणा। परमेश्वरै ए एड़ेकेरे होंणे दैया। एतिकठै एबै, पश्चताप करो ओर परमेश्वरा बाखा लै फिरो, ताकि स थारै पापा धोए करे साफ़ करे दैयो।’’

जियां मंदरै अगुवै पतरस होर यूहन्ना ए बोलदै शुणै, तै सिंयो हैन घबराये गोए। एतिक्ठै तिन्है सिंयो गिरफ्तार करेकेरे जेला दे पाए। पर जुण पतरसै बोला थिया तेत गैश हैन सारै लोगै भरोसा किया। यीशु गैश भरोसा करणै आड़ै संख्या बढे केरे लगभग 5000 होए गोए।

आगलै धैडे, यहूदी अगुवै पतरस होर यूहन्ना मुख्य परोहता होर दूजै धार्मिक अगुवै गोलै आंणै। सिंयो तेस मंणछा लौयेकेरे भी आयै जुण अपंग थिया। तिन्है पतरस होर यूहन्ना का पूछा, “कस अधिकारा केरे तुम्है ए अपंग मंणछ ठीक किया?”

पतरसै जवाब दैया, “ए मंणछ जुण थारै सामनै खडुआदा आसी ए यीशु मसीहै सामर्था केरे ठीक होआ। तुम्है यीशु क्रूसा दे चढाया, पर परमेश्वरै स भी का जिउंदा किया! तुम्है स नकारा, पर यीशुयै सामर्थै जरियै मुक्ति पाणेयां दूजा होर कोए पैंडा नी आथी!”

सिंयो अगुवै हैन हैरान थियै कि पतरस होर यूह्न्नै बड़ी हिम्मतै केरे गला कि थी। तिन्है हेरा कि इंयो सिधै साधै होर अनपढ़ मंणछ थियै। पर तेखा तिन्हा लै याद आया कि इंयो मंणछ यीशु सागे रहो थियै। एतिकठै तिन्है तिन्हा का बोला, “हामा तुम्हा लै हैन ज्यादा सजा दैणै जै तुम्है एस यीशुए बारै दे लोगा लै कोइ होर संदेश दैया।” एड़ी हैन जी गला बोलणै का बाद, तिन्है पतरस होर यूहन्ना जांणे दैये।