43. कलीसियै शुरुआत हो

यीशुए स्वर्गा लै वापस जांणै का बाद, चेलै येरुश्लेम शहरा दे ही रुकै जेड़ा कि यीशुए तिन्हा लै करणैया हुक्म दैयादा थिया। तिंदे विश्वासे लोग लगातार सागे पार्थना करणै लै कठै हो थियै।

हर साल, फसह पर्व का पजाह धैड़ै का बाद, यहूदी लोग पिन्तेकुस्त नाओंआ एक ख़ास धैड़ा मनाओ थियै। पिन्तेकुस्त स समा थिया जिंया लोग कंणका लूंणनैया त्यौहार मनाओ थियै। सारी पृथ्वीयै यहूदी लोग पिन्तेकुस्तै धैड़ै मनाणे कठै यरुश्लेम शहरा लै आयै थिए। ऐस साल, पिन्तेकुस्त मनाणैया समा यीशुए स्वर्गा लै नाठे जाणै का करीब एकी हप्तै का बाद आ थिया।

जस समै सभ बिश्वासी लोग कठै थियै, होर जस घौरै सिंयो थियै अचानक ही स तेज बागरियै आवाजा केरे भरुए गोआ। तिंया आगै लुपी सैंही शुजणै आड़ा किछ सभी विश्वासियै मुंडा गैश प्रकट होआ। सिंयो सब पवित्र आत्मा केरै भरुए गोए होर तिन्है अन्य भाषा दे परमेश्वरै स्तुते किये। सिंयो इन्हा भाषा नी जैणदी थियै। इंयो सिंयो भाषा थी जस बोलणै लै तिन्हा लै पवित्र आत्मै सामर्थ दैये थियै।

जियां यरुश्लेम शहरा दे रौहंणै आड़ै मंणछै स हाला शुणा, तै सिंयो भीड़ै रूपा दे एड़ा हेरणै कठै सभ सागे आए कि ए किजै होंदा लागादा थिया। तिन्है विश्वासी लोग परमेश्वरै जरियै कियैदै बड़े- बड़े कामै घोषणा करदै शुणै। सिंयो हैरान थियै किलैकी भलै ही सिंयो लग-लग देशा का थियै होर कई लग-लग भाषा बोलो थियै सिंयो तिन्हा कामा आपणी ही भाषा दे शुणैया करो थिए। चेलै इस्राएला का थियै होर अरामी, इब्रानी, या यूनानी भाषा बोलो थियै, पर लोग आपणी आपणी मातृभाषा दे शुंणदै लागैदै थियै कि परमेश्वरै किजै-किजै कियादा।

तिन्हा मेंझा का एखो लोगै बोला कि सिंयो चेलै नशै दे थियै। पर पतरस खड़ा होआ और तिन्हा का बोला, “मेरे गल शुणो! इंयो लोग नशै दे नी आथी! एतै बजाय, जुण तुम्है हेरदै लागैदै स सौही आसी जुण योयल भविष्यवदक्तै बोला थिया कि एड़ा होंणा: परमेश्वरै बोला, ‘अन्तै धैड़ै दे, मूं आपणा आत्मा दैणा।’”

“ओ इस्राएली लोगो, यीशु एक एडा मंणछ थिया जुणी ए दसणै कठै कि स कुण थिया हैन सारै नोखै काम कियै थिए। तिनी परमेश्वरै सामर्थै केरै हैन सारै हैरानी आड़ै काम किये थियै। तुम्है ए सभ जैणौ भी, किलैकि थारै इंयो काम हेरैदै आसी। पर तुम्है स क्रूसा गैश चढाया!”

“यीशु मरे गोआ पर परमेश्वरै स मरैदै मेंझा का जिउंदा किया। इनी स गल पूरै किये जुण एकी भविष्यदवक्तै लिखै थियै: ‘ता आपणा पवित्र मंणछ कब्रा दे शड़णै नी दैणी।’ हामै गवाह आसी कि परमेश्वरै यीशु भी का जिउंदा करे दैया।’’

“परमेश्वर पितै ऐबै यीशु लै आपणै दैहणी बाख बशैड़ै केरे आदर दैआ। होर यीशुए म्हारै कठै पवित्र आत्मा भेजादा जेड़े कि तिनी प्रतिज्ञा किये थिये कि तेस भेजणा। पवित्र आत्मा ही तिन्हा कामा होंणे दैओ जुण तुम्है हेरैदै होर शुणदै लागैदै।’’

तुम्है स मंणछ, यीशु क्रुसा दे चढ़ाया। पर सही तौरा दे तुम्है जैणे लौओ कि परमेश्वरै यीशु तिन्हा सभी चीजा गैश प्रभु होर मसीह दुए ठहरयादा आसी!’’

पतरसै गला शुणणै आड़ै लोग तेसरै जरियै बोलीदी गला केरै भीथरै आत्मा तिक हीले गोए थिए। एतिकठै तिन्है पतरस होर चेलै का पूछा, “ओ भाईयो, हामा किजै करणा चाहिए?” " पतरसै तिन्हा लै जवाब दैआ, “तुम्हा मेंझा का सभ जैणै आपणै पापा मनो ताकि परमेश्वर थारै पाप माफ करो, होर यीशु मसीहै नाओंए केरै बपतिस्मा लौओ। तियां तेस तुम्हा लै वरदानै रूपा दे पवित्र आत्मा भी दैणा।’’ "

पतरसै जुण बोला तेत गैश लगभग चन हजार मंणछै भरोसा किया होर यीशुए चेलै बणे गोए। तिन्है बपतिस्मा लौआ होर यरूशलेमै कलीसिया भाग बंणे गोए।

जियां प्रेरितै तिन्हा लै शिक्षा दैये तै विश्वासियै लगातार शुणा। सिंयो हमेशा एकी दूजै सागे मिड़दै रहो थिए होर सागे खांणै लै खाओ थिए, होर तिन्है हमेशा एकी दूजै लै प्रार्थना किये। तिन्है मिले केरे परमेश्वरै स्तुते किये होर जुण किछ भी तिन्हा का थिया स तिन्है एकी दूजै सागे बांडा। नगरै सभ लोग तिन्है प्रति बढ़िया सोच डाओ थिए। हर धैडै, ज्यादै का ज्यादै लोग विश्वासी बणदै गोए।