42. यीशुआ स्वर्गा लै बापस हटणा

जस धैड़ै परमेश्वरै यीशु मरैदै मेंझा का जिउंदा किया था, तेसरै दुए चेलै एकी दुजै ग्राओंआ लै चालैदै थिए। हांडदी बारी सिंयो जुण यीशु सागे होआ थिया, तेसरै बारै दे गला करदै लागैदै थिए, तिन्हा लै आशा थिए कि स मसीह थिया, पर तेखा भी स मारे हेरा थिया। ऐबै सिंयो बेटड़ी बोलो कि स भी का जिउंदा होए गोआ। सिंयो नी जैणदी थियै कि कस गला गैश विश्वास करणा चाहिए।

यीशुए तिन्हा गोलै आछेकेरे तिना सागे हांडणा शुरू किया, पर तिन्है नी स पछैणी। तिनी पूछा कि सिंयो कसरै बारै दे गला करदै लागैदै थिए। तिन्है तेसलै पिछलै धैड़ै दे यीशु सागे होई दी सभी घटनै बारै दे बोला। तिन्है सोचा कि सिंयो कस परदेसी सागे गला करदै लागैदै जसका पता नी आथी कि येरुशलेम शहरा दे किजै होआदा थिया।

तेखा यीशुए तिन्हा लै समझाया कि परमेश्वरा वचन मसीहै बारै दे किजै बोलो। पर हैन पैहलै, भविष्यदवक्तै बोला थिया कि दुष्ट लोगा मसीह दु;खी करणा होर मारणा। पर भविष्यदवक्तै एड़ा भी बोला थिया कि स चितैहै धैड़ै जिउंदा होए जांणा।

जियां सिंयो तेस नगरा दे पुज्जै जिंदे सिंयो दुए लोग ठहरणा चाहो थियै, तिंया तिक धैड़ा उडै गोआ थिया होर रैच होंणै आड़ै थिए। तिन्है यीशु लै भी आपु सागे तिंदे ठहरणै कठै छांदा किया, तेखा स तिन्हा सागे एकी घौरा लै डेया। आपणै बैड़कै खांणै खांदे सिंयो बैठै गोए। यीशुए एक रोटे लौए और तेतै कठै परमेश्वरा धन्यवाद दैया, होर तेखा स चोड़े। अचानक, तिन्हा का जैणुआ कि स यीशु थिया। पर स तेस ही समै, स तिन्ही आखै गो का छपत होए गोआ।

तिन्है दुई जैहणै एकी दूजै का बोला, “स यीशु थिया! एतिकठै जियां तिनी हामा का परमेश्वरा बचन समझाया थिया तिंया हामै हैन ख़ुशी थिए!” तिंया ही, सिंयो निकड़े केरे बापस यरूश्लेम शहरा लै डेयै। जियां सिंयो पुज्जै तिन्है सभी चेलै का बोला, “यीशु जिउंदा आसी! हामै स हेरा!”

जियां चेलै गला करदै लागैदै थिए, यीशुए अचानक तैस कमरै दे तिन्हा लै दर्शन दैये। तिनी बोला, तुम्हा लै शांती मिड़ौ! चेलै सोचा कि ए कोए भुत थिया, पर यीशुए बोला, “तुम्है किलै डरदै लागैदै? तुम्है एड़ा किलै नी सोछदी कि हाँ सच्ची लै ही, यीशु आसी? मेरे हाथ पैरा हेरौ। भुता का एड़ा शरीर नही होंदी जेड़ा मुखा आसी। “एड़ा दसणै कठै कि स भुत नी आथी तिनी कुछ खांणै लै माँगा। तिन्है तेस ले एक मछड़ीआ टुकड़ा दैआ, और तिनी स खाया।

यीशुए बोला, “मेरै बारै दे जुण किछ भी परमेश्वरा बचन बोलो स होयेकेरे रौहंणा। मौं तुम्हा का बोले हेरा थिया तेसरा होणा जरुरी आसी।” तेखा यीशुए परमेश्वरा वचन तिन्हा का बढ़िया ढंगै केरे समझाया। तिनी बोला, “हैन पैहलै भविष्यदवक्तै लिखा थिया कि मूं, मसीहा दुःख उठाणा पड़णा, मरणा पड़णा और चितैहै धैड़ै मरैदै मेंझा का जिउंदा होणा।’’

“तिन्है भविष्यदवक्तै एड़ा भी लिखादा थिया कि मेरै चेलै परमेश्वरै बचनै घोषणा करणे। तिन्हा सभी लोगा लै आपणै पापा का मन फिराणै कठै बोलणा। जै सिंयो एड़ा करुँग तै परमेश्वरा तिन्है पाप माफ़ करणै। मेरै चेलै एस संदेशा प्रचार यरुशलेम शहरा का शुरू करणा। तेखा त्तिन्हा सभी जैघा लै होर सभी जातै मेंझा लै जांणा। तुम्है सभ मेरी गलै होर कामै गवाह आसी जुण मौं बोला होर किया थिया, होर तेतै सभीयै भी जुण मूं सागे होआ।’’

आगलै चाड़ी धैड़ै दे, यीशुए आपणै चेलै लै कई बारी दर्शन दैये। एकी बारी तो तिनी एकी ही समै दे पांजा शो का ज्यादा मंणछा लै दर्शन दैये! तिनी कई तरीकै केरे आपणै चेलै का दसा कि स जिउंदा थिया, होर तिनी तिन्हा लै परमेश्वरै राज्य बारै दे शिक्षा दैये।

यीशुए आपणै चेलै का बोला, “परमेश्वरै मूलै स्वर्ग होर पृथ्वीए सभी मंणछा गैश राज करणैया हक दैयादा। एतिकठै हाँ एबै तुम्हा लै आज्ञा दैओ: जाओ सब जातीयै लोगा चेलै बणाओ। एड़ा करणै कठै, तुम्हा तिन्हा लै पिता, पुत्र और पवित्र आत्मै नाओंए केरे बपतिस्मा दैणा। जुण किछ मौं तुम्हा लै आज्ञा दैयीदी सिंयो सभ गला मनणी भी तुम्हा तिन्हा सभी लै शकैणी। याद डाया, मूं सदा तुम्हा सागे रौहंणा।’’

यीशुए मरैदै मेंझा का जिउंदै होंणे का चाड़ी धैड़ै का बाद, तिनी आपणै चेलै का बोला, “जिंया तिक कि मेरा पिता तुम्हा लै सामर्थ नी दैओ तिंया तिक तुम्है यरूशलेम शहरा दे रुके रहो। तेस तुम्हा गैश पवित्र आत्मै भेजणै जरियै एड़ा करणा।” तेखा यीशु स्वर्गा ले नाठे गोआ, होर एकी बाद्ड़ै स तिन्ही नजरा का चोरे हेरा। स्वर्गा दे यीशु सभी चीजा गैश राज करणै लै परमेश्वरै दैहणी बाख बैठा।