41. परमेश्वर यीशु लै मरदै मेंझा का जिउंदा करो

सपहियै जरियै यीशु क्रुसा दे चढ़ाणै का बाद, यहूदीयै अगुवै पिलातुसा का बोला, “तिनी झूठै, यीशुए बोला थिया कि तेस चन धैड़ै का बाद मरैदै मेंझा का जिउंदै होए जांणा। कसी लै ए पता करणै कठै तेसरी कब्रै पौहरेदारे करणे लागणै कि किंदे तेसरै चेलै तेसरे ल्हाश चोरे केरे नी निंयो। जै तिन्है एड़ा किया तै तिन्हा बोलणा कि यीशु मरैदै मेंझा का जिउंदा होआ।’’

पिलातुसै तिन्हा यहूदी अगुवै लै बोला, “कुछ सपाही नियो, होर जेड़ेकेरे तुम्है करे सको तेहड़े केरे कब्रै पौहरेदारे करो।” एतिकठै तिन्है तैसा कब्रै मुखा गो एक पाथरा गैश मोहर लाये। तिन्है एड़ा पता करने कठै तिंदे सपाहै बशैड़े दैये कि कोए भी तेसरे ल्हाश चोरे नी सको।

यीशु मरणै का बादका धैड़ा सब्ता धैड़ा थिया। कोए भी मंणछ सब्तै धैड़ै काम नी करे सको थिया, एतिकठै यीशुआ कोए भी साथे तैसा कब्रा गोलै नी आई थिया। पर सब्ता का आगलै धैड़ै, दोथी भैगा सागे, एखो बेटड़ी यीशुए कब्रा गोलै जांणे कठै तयार होई। सिंयो तेसरी ल्हाशा दे होर इत्र लाणा चाहो थी।

तिन्हा बेटड़ीए पूज्जणै का पैहलै, कब्रा गो एक बड़े जाजरे होए। स्वर्ग का एकी स्वर्गदूतै आछेकेरे स पाथर हटाये दैया जेतेकेरे कब्रा मुख्यद्वार ढकादा थिया होर तेत गैश बैठे गोआ। ए स्वर्गदूत प्रैशै सैंही चमकदा लागादा थिया। कब्रा गो जुण सपाहै थिए तिन्है स हेरा। सिंयो एतरै डरै कि मरैदै मंणछा सैंही जमीना दे पड़े गोए।

जिंया सिंयो बेटड़ी कब्रा गो पुज्जी तै तिनी स्वर्गदूतै तिन्हा का बोला, “डरी नी। यीशु इंदे नी आथी। स मरैदै मेंझा का जिउंदा होए गोआ, जेडा कि तिनी बोला थिया की स जिन्दा होणा! कब्रा दे लोड़ो होर भाड़ो।“ तिन्है बेटड़ीयै कब्रा भीतरे जिंदे यीशुए ल्हाश डायेदे थिये तिंदे लोड़ा होर भाड़ा कि तिंदे तेसरे ल्हाश नी थी!

तेखा तिनी स्वर्गदूतै तिन्हा बेटड़ी का बोला, “जायेकेरे तेसरै चेलै का बोलो, ‘यीशु मरैदै मेंझा का जिउंदा होए गोआ होर तेस तुम्हा का आगो आगो गलील नगरा लै जांणा।’’’

सिंयो बेटड़ी स्वर्गदूतै गला शुंणेकेरे हैरान हुई होर हैन खुशी होई। सिंयो चेलै लै एसा खुशखबरी शुणाणै कठै दौड़ी।

जिया सिंयो बेटड़ी चेलै लै ए खुशखबरी शुंणाणै कठै पैंडै दे जांदी लागीदी थी, तै यीशुए तिन्हा बेटड़ी लै दर्शन दैयै। सिंयो तेसरै पैरा दे पड़ी। तिंया यीशुए बोला, “डरी नी आथी। जाओ होर मेरै चेलै लै गलील नगरा लै जांणै कठै बोलो। तिन्हा हाँ तिंदे हेरणा।”