40. यीशुआ क्रूसा गैश चढ़ाया जांणा

यीशुआ मजाक करणे का बाद, सिपाहियै स क्रूसा गैश चढ़ाणै लै निंया। तिन्है स क्रूस तेस का ही चकणे दैया जेत गैश तेस मरणा थिया।

तिन्है सपाहियै यीशु तैसा जगहा लै आंणा जुण “खोपड़े’’ कहलाओ होर तेसरै हाथा पैरा दे क्रूसा गैश परेगा ठोके दैयी। पर यीशुए बोला, “ओ पिता, इन्हा माफ़ कर, किलैकि इंयो नी जैणदी कि इंयो किजै करदै लागैदै।’’ तिन्है एक पाटड़े भी तेसरै मुंडा गैश टाँगे दैए। तेत दे लिखादा थिया, “यहूदी लोगा राजा’’ पिलातुसै तिन्हा का एड़ा ही लिखणै लै बोला थिया।

तेखा सपाहीयै यीशुए झिकड़ै आपु मेंझ बांडणै कठै पर्ची पायी। जिंया तिन्है एड़ा किया तै तिन्है स भविष्यवाणे पूरे किये जेतदै बोला थिया, “तिन्है मेरै झिकड़ै आपु मेंझ बांडे दैये, होर मेरै झिकड़ै कठै पर्ची पायी।’’

तिंदे दुए डाको भी थिए, जुण सपाहीयै तेस ही समै क्रूसा गैश चढ़ायै थिए। तिन्है सिंयो यीशुए दुई बाख डायै थिए। तिन्हा मेंझा का एकी डाकुयै यीशुआ निंदा करेकेरे बोला कि जै तू मसीह आसी तै हांमा होर आपु लै बचा, पर दूजै बोला, “किजै तालै डौर नी आथी कि परमेश्वरा तालै सजा दैणै? हाँमै तो हैन सारै बुरै कामा करेकेरे दोषी ठह्राएदै आसी, पर ए मंणछ बेकसूर आसी।‘’ तेखा तिनी यीशु का बोला, “जिंया तू आपणै राज्य लै आछणा तै दया करेकेरे मूं याद डाया।’’ यीशुए जबाब दैया, “आज ही तू मूं सागे स्वर्गलोका दे होंणा।’’

तै यहूदी अगुवै होर भीड़ै बाकी लोगै यीशुए निंदा करेकेरे बोलदे लागै। तिन्है तेसका बोला, “जै तू परमेश्वरा शोरो आसी, तै एस क्रूसा का उंदै उतर होर आपु बचाये लौ! तै हाँमा ता गैश भरोसा करणा।’’

तिंया तेस पूरै देशा सर्ग सारा न्हैरा होए गोआ, बल्कि स धैड़ैआ मेंझका समा थिया। ए द्पोहरकै समै न्हैरा होआ थिया होर चन घंटै तिक एड़ा ही रौहा थिया।

तिंया यीशुए जोरै बोला, “पूरा होआ! ओ पिता, हाँ आपणे आत्मा तेरै हाथा दे सौंपो।’’ तिंया तिनी आपणा मुंड झुकाया होर आपणै प्राण छाडे दैये। जिंया स मरा तै एक जाजरे होये। होर मंदरा स पर्दा जुण परमेश्वरै उपस्थिति का लोगा लग करो थिया उपरा का तोड़ा तिक छेकुए केरे दुए भाग होए गोआ।

आपणी मौते जरियै, यीशुए संसारै लोगा लै परमेश्वरा गोलै आछणैया पैंडा खोले दैया। जिंया यीशुए पौहरेदारे करणै आड़ै एकी सपाहीयै जुण किछ होआ थिया ए सब भाड़ा तै तिनी बोला, “सच्ची ही, ए मंणछ बेकसूर थिया। ए परमेश्वरा शोरो थिया।’’

तिंया युसूफ होर नीकुदेमुस नांओए दुए अगुवै आयै। सिंयो भरोसा करो थिए कि यीशु ही मसीह थिया। तिन्है पिलातुसा का यीशुए ल्हाश माँगे। तिन्है तैसरे ल्हाश कपड़ै दे पड़ेटे। तिंया तिन्है स एकी जाना दे टुकेकेरे बंणाइदी कब्रा लै निंया होर तेत भीतरे डाये दैया। तिंया तिन्है तैसा कब्रा दरवाजा बंद करणै कठै तेतै मुखा गैश एक बड़ा पाथर डाया।