39. यीशु गैश मुकदमा चालो

एबै ए आधी रैचेया समा थिया। तिन्है सपाहियै यीशु मुख्य परोहतै घौरा लै आंणा, किलैकि स यीशु का सवाल करणा चाहो थिया। पतरस दूरा का तिन्हा पिछो-पिछो आछदा लागादा थिया। जिंया सपाहियै यीशु घौरा भीतरा लै निंया, तै पतरस बाहरे रुकेकेरे आग सेक्दा लागा।

घौरा भीतरे, यहूदी अगुवै यीशु गैश मुकद्मा चलाया। तिन्है तेसरै खिलाफ झूठी गला बोलणै कठै झूठै गवाह आंणै। हांलाकि, तिन्ही गला नी मीड़दी थी एकी दूजै सागे, एतिकठै यहूदी अगुवै ए साबित नी करे सकै कि स कस गला दोषी थिया। यीशुए किछ भी नी बोली।

अंता दे, मुख्य परोहतै सीधै यीशु बाखा लै हेरेकेरे बोला, “हाँमा लै दस कि किजै तू ही जिउंदै परमेशवरा शोरो मसीह आसी?’’

यीशुए बोला, “हाँ आसी, होर तुम्हा हाँ परमेश्वरा सागे बैठादा होर स्वर्गा का आछदा भी भाड़णा।” “मुख्य परोहतै आपणै झिकड़ै छेके दैये किलैकि जुण यीशुए बोला थिया स तैसा गला गैश हैन गुस्सा होआ थिया। स होरी अगुवै गैश चिल्लाया, “हाँमा लै ए बोलणै कठै कसी होरी गवाहै जरूरत नी आथी कि इनी मंणछै किजै कियादा! तौं आपु ही स ए बोलदा शुणे हेरा कि स परमेश्वरा शोरो आसी। तेसरै बारै दे थारा किजै फैसला आसी?’’

सभी यहूदी अगुवै मुख्य परोहता लै जबाब दैया, “स मरणै लायक आसी।’’ तिंया तिन्है यीशुए आखै दे पाट्टे बैने दैए, तेस गैश थूका, स जिक्का, होर तेसरा मजाक उड़ाया।

होर पतरस, जिंया स घौरा का बाहरे न्हैड़दा लागादा थिया। तिंया स एकी दासीये हेरा। तैसै तेसका बोला, “तू भी यीशु सागे थिया!’’ पतरसै ना करे दैये। बादा का, कुंणी होरी दासीये भी ए ही गल बोले, हो पतरसै भी का नां किये। अंता दे, एखो लोगै बोला, “हाँमै जैंणो कि तू यीशु सागे थिया किलैकि तुम्है दुए गलील नगरा का आसी।’’

तिंया पतरसै बोला, “जै हाँ एस मंणछा जैणदा तै परमेश्वर मूलै श्राप दैयो!’’ तिंया ही पतरसै कसमा खांणै का बाद, एक मुर्गा बाशा। यीशुए पिछु बाखा लै मुड़ेकेरे पतरस हेरा।

पतरस तिंदा का नाठे गोआ होर हैन जोरै-जोरै चिंगदा लागा। तेस ही समै, यीशु पकड़ांणै आड़ै यहूदै हेरा कि यहूदी अगुवै यीशु लै मौतै सजा दैये। यहूदा हैन दु;खी होए गोआ होर जायेकेरे आपु लै फांसे दैये।

तेस देशा राज्यपाल पिलातुस थिया। स रोम देशै कठै काम करो थिया। यहूदी अगुवै यीशु तेस गोलै आंणा। सिंयो चाहो थिए कि पिलातुस तेसलै मोतै सजा दैयेकेरे तेस मारे दैयो। तिंया पिलातुसै यीशु का पूछा, “किजै तू यहूदिया राजा आसी?’’

यीशुए जबाब दैया, “तौं सच ही बोलादा। पर मेरा राज्य एस संसारा नी आथी। जै हौंदा तै मेरै दास मेरै कठै लड़ायै करदै। हाँ संसारा दे परमेश्वरै बारै दे सच दसणै कठै आयादा। हर एक मंणछ जुण सचा सागे प्यार करो स मेरे शुंणो।’’ पिलातुसै बोला, “तै सच किजै आसी?’’

यीशु सागे गला करणै का बाद, पिलातुसै बाहरा लै भीड़ा गोलै जायेकेरे बोला, “मौं एड़े कोए बजहा नी पायी कि ए मंणछ मारणै लायक हो।’’ पर यहूदी अगुवै होर भीड़ै चिल्लायेकेरे बोला, “तेस क्रूसा गैश चढ़ाये दैओ!’’ पिलातुसै जबाब दैया, “स किछ भी गलत करणैया दोषी नी आथी।’’ पर सिंयो होर भी जोरै-जोरै चिल्लान्दै लागै। तिंया पिलातुसै चीती बारी बोला, “स दोषे नी आथी!’’

पिलातुस डरे गोआ कि तैसा भीड़ा झगड़ा शुरू करे दैणा, एतिकठै स सपाहियै जरियै यीशु क्रूसा गैश चड़ाणै कठै मनै गोआ। रोमी सपाहियै यीशु लै कोड़ै लायै, होर तैस लै राजै सैंही झिकड़ै फणैये, होर तैसरै मुंडा गैश कांडै केरे बणायादा ताज डाया। तिंया सिंयो ए बोलेकेरे तेसरा मजाक करदै लागै, “हेरो, यहूदी लोगा राजा!’’