38. यीशुआ पकड़ाया जांणा

हर साल, यहूदी लोग फसह पर्व मनाओ थियै। एस त्यौहारा तै मनाओ थियै कि कई शौ साला पैहलै परमेश्वरै तिन्है पुरखै मिस्र देशै गुलामी का आजाद किये थिए। यीशुए जरियै पैहली बारी खुलै रूपा दे परमेश्वरै राज्या प्रचार करणै होर शिक्षा दैणे शुरुआत करणै का लगभग चन साला का बाद, यीशुए आपणै चेलै का बोला कि स तिन्हा सागे यरुश्लेम शहरा दे फसह पर्व मनाणा चाहो। होर ए भी कि स तिंदे मारै दैया जांणा।

यीशुए चेलै मेंझा का एक यहूदा नानोंआ मंणछ थिया। यहूदा का प्रेरितै ढब्बै थैली डांणै जिममेदारे थिये, पर केतरी बारी स थैलै मेंझा का ढब्ब़ै काडे दैओ था। यीशु होर चेलै यरुश्लेमा शहरा दे पुज्जणै का बाद यहूदा यहूदी अगुवै गो लै डेया। तिनी ढब्ब़ै बदलै दे यीशु लै तिन्है हाथ पकड़ाणैया पक्ष डा। स जैणौ थिया कि यहूदी अगुवै नी मन्दै थिए कि यीशु ही मसीह थिया। स जैणौ थिया कि सिंयो तेस मारणा चाहो थियै।

मुख्य प्रोहतै बोलणै केरे यहूदी अगुवै यीशु लै तिन्है हाथा दे पकड़ाणै कठै यहूदा लै चान्दियै ती सिक्कै दैये स तेड़ैकेरे ही हुआ जैड़ा कि भविषयवक्तै बोला थिया कि एड़ा हौंणा। यहूदा मनै गोआ होर ढब्ब़ै लौयेकेरे नाठै गोआ। स यीशु गिरफतार करणै लै तिनी मदद करणै कठै कस मोकै लोढ़दा लागा।

यरुशलेम शहरा दे, यीशुए आपणै चेलै सागे फसह पर्व मनाया। फसह भोजै समै, यीशुए रोटे लौयेकेरे चोढ़े। तिनी बोला, “एसा लओ होर खाओ। ए मेरा शरीर आसी जस हाँ तुम्हा लै दैयो। एस मेरी यादा दे करया।’’ एहड़ै केरै, यीशुए बोला कि स तिन्है कठै मरे जांणा, यानी तिन्है कठै तेस आपणै शरीरै बले चढ़ाये दैणे।

तेखा यीशुए दाखरसा प्याला लोआ होर बोला, “एस पियो। ए नौंइ वाचा मेरा खून आसी जुण संसारै लोगै पापै कठै बहाया जांणा ताकि परमेश्वर थारै पाप माफ़ करो। तुम्है भी सौही करया जुंण किछ हाँ एबै करदा लागादा, ताकि हर बारी जिंया तुम्हा ए पींणा तै तुम्हा हाँ याद करणा।”

तिंया यीशुए आपणै चेलै का बोला, “तुम्हा मेंझा का एकी मंणछा हाँ पकड़वांणा।’’ चेलै हैरान होए, होर पूछदै लागै कि कस एड़ा काम करणा। यीशुए बोला, “मेरा पकड़ाणै आड़ा मंणछ स आसी जसलै मूं ए रोटिआ छौंणा दैंणा।’’ तिंया तिनी स रोटे यहूदा लै दैये।

तैसा रोटी लौंणै का बाद, यहूदा दे शैतान समाये गोआ। यहूदा निकड़ेकेरे यीशु गिरफ्तार करणै कठै यहूदी अगुवै मदद करणै लै नाठे गोआ। स रैचका समा थिया।

खांणै लै खांणै का बाद, यीशु होर तेसरै चेलै जैतून धारा गैशा लै नाठे गोए। यीशुए बोला, “तुम्हा सभी आज रैचे हाँ छाडै दैंणा। किलैकी ए पवित्र शास्त्रा दे लिखादा आसी, ‘मूं फवाल मारंणा होर सारी भेड़ा बछींगुए जांणी।’’’

पतरसै जबाब दैया, “भलै ही बाकि सभ लोग तेरा साथ छाडै दूँग, मूं तेरा साथ कभै भी नी छाडणी!’’ तिंया यीशुए पतरसा का बोला, “शैतान तुम्हा सभी लोए लौंणा चाहो, पर ओ पतरसा, मौं तेरै कठै प्रार्थना कियेदे कि तू भरोसै का भटके नी जाओ। तेखा भी, आज की रैचे, मुर्गे बाशणै का पैहलै ता चन बारी मुखरणा कि तू मूं जैणो ही नी आथी।’’

पतरसै तिंया यीशु का बोला, “बेशक हाँ मरे जाऊं, तै भी मूं कबै तेरै नांओआ का नी मुखरणी!’’ बाकी सभी चेलै भी एड़ा ही बोला।

तिंया यीशु आपणै चेलै सागे गतसमनी नांओए जगहा लै डेया। यीशुए आपणै चेलै का प्रार्थना करणै लै बोला ताकि शैतान तिन्है परीक्षा नी करो। तिंया यीशु आपु प्रार्थना करदा नाठे गोआ।

यीशुए चन बारी प्रार्थना कियै होर बोला, “ओ मेरे पिता, जै होए सको तै ए दु:खा प्याला मूलै पींणै लै नंही दैयी। पर जै लोगै पाप माफ़ करणै कठै कोए होर पैंडा नी आथी, तै तेखा मेरै नी पर तेरे ही मर्जे पुरे हो।’’ यीशु हैन बेचैन थिया होर तेसरा पसीना खुनै बूंदा सैंही थिया। तेसलै एस दु:खा दे ताकत दैंणे कठै परमेश्वरै एक स्वर्गदूत भेजा।

हर बारी प्रार्थना का बाद, यीशु आपणै चेलै गो लै बापस हटा, पर सिंयो सूते गोए थिए। जिंया यीशु चिती बारी वापस हटा तै यीशुए बोला, “उठे जाओ! मेरा पकड़ाणै आड़ा मूं नेड़ पुज्जे गोआदा।’’

यहूदा यहूदी अगुवै, सपाही होर मंणछै एक बड़ी भीड़ा सागे आया। तिन्है तलवारा होर डंडै लोएदै थिए। यहूदै यीशु नेड़ आछेकेरे तेसका बोला, “ओ गुरुआ, नमस्कार,’’ होर तेसलै झीण दैये। तिनी यीशु लै गिरफ्तार करणै आड़ै मंणछै कठै होर यहूदी अगुवै गो यीशु प्रकट करणै कठै एड़ा किया था। तिंया यीशुए बोला, “ओ यहूदा, किजै तू एकी झीणै केरे मूं पकड़ान्दा लागादा?’’

जिंया सिंयो सपाहै यीशु पाकड़दै लागैदै थिए, तै पतरसै आपणे तलवार काडे होर मुख्य परोहतै एकी दासा कान टुके दैया। यीशुए बोला, “तलवारा दूर कर! हाँ आपणै पिता का मेरा बचाव करणै कठै स्वर्गदूतै एकी सेना लै अर्ज करे सको। पर मूं आपणै पिते आज्ञा मंनणे।’’ तिंया यीशुए तेस मंणछा कान ठीक करे दैया। तिंया सारै चेलै यीशु छाडेकेरे भागे गोए।