37. यीशु लाजरा मरैदै मेंझा का जिउंदा करो

लाजर नांओआ एक मंणछ थिया। तेसरी दुए बैहणा थी जिन्है नांओ मरियम होर मार्था थिया। सिंयो सब यीशुए गहरै साथे थियै। एकी धैड़ै, कुणी यीशु का दसा कि लाजर हैन बीमार थिया। जिंया यीशुए ए शुणा तै तिनी तिन्हा का बोला, “ए बमारे मरणै कठै नी आथी पर परमेश्वरै महिमै कठै आसी, ताकि लोग परमेश्वरा आदर करो।’’

यीशु आपणे साथी लाजरा सागे प्यार करो थिया, तेखा भी जिंया तिनी शुंणा कि लाजर बीमार आसी, तै भी जस जगहा दे स थिया तिंदे तिनी दुई धैड़ै तिक इन्तजार किया। तिन्हा दुई धैड़ै का बाद, तिनी आपणै चेलै का बोला, “आछो, वापस यहूदिया नगरा लै चालो।’’ चेलै जबाब दैया, “पर ओ गुरुआ, एबै किछ ही समै पैहलै तिंदे लोग ता मारै डांणा चाहो थियै!’’ यीशुए बोला, “म्हारा साथी लाजर सूते गोआ, होर मूं स झैड़णा।’’

यीशुए चेलै जबाब दैया, “ओ प्रभुआ, जै लाजर सूतादा आसी, तै स ठीक होए जांणा।’’ तिंया यीशुए तिन्हा का साफ़-साफ़ बोले दैया, “लाजर मरै गोआदा। मूलै ख़ुशी आसी कि हाँ तिंदे नी थी, ताकि तुम्है मूं गैश भरोसा करे सको।’’

जिंया यीशु लाजरै ग्रांवा दे पूजा तै लाजरा मरैदै पैहलै का ही चार धैड़ै होए गोए थिये, मार्था यीशु का मिड़दै बाहरा लै आये होर बोला, “ओ प्रभुआ जै तू इंदे होंदा तै मेरा भाए नी मरणी थिया। पर हाँ भरोसा करो कि जुण किछ ता परमेश्वरा का मांगणा स तेस तालै दैणा। ’’

यीशुए तैसा लै जबाब दैया, “पुनरुत्थान होर जीवन हाँ आसी। जुण कोए मूं गैश भरोसा डाओ जै स मरे भी जाओ तै भी जिए जांणा। जुण कोए मूं गैश भरोसा करो स कबै भी नी मरणी। किजै तू एसा गला गैश भरोसा करो?” मार्थै जबाब दैया, “ओ प्रभुआ हाँ भरोसा करो कि तू परमेश्वरा शोरो मसीह आसी।’’

तिंया मरियम आये। तैसै यीशुए पैरा दे पड़ेकेरे बोला, “ओ प्रभुआ, जै तू इंदे हौंदा तै मेरा भाए नी मरणी थिया।’’ यीशुए तैसाका पूछा, “तुम्है लाजर किंदे डायादा।’’ तिन्है तैसाका बोला, “कब्रा लै। आछ होर भाड़े लो।” तिंया यीशु चिंगदा लागा।

स कब्र एक डवार थिया जेतै दरवाजै गैश एक पाथर डायादा थिया, जिंया यीशु कब्रा गो पूज्जा तै तिनी तिन्हा का बोला, “पाथरा हटाए दो।” पर मार्थे बोला, “तेस मरैदै चार धैड़ै होए गोए। तेतका शड़ैन आछो होंणे।’’

यीशुए तैसालै जबाब दैया, “किजै मौं तुम्हा का नी बोली थिया कि जै तुम्है मूं गैश भरोसा करो तै तुम्हा परमेश्वरै सामर्थे काम भाड़णै ?’’ एतिकठै तिन्है पाथर हटाए दैया।

तिंया यीशुए उबै स्वर्गा बाखा लै हेरेकेरे बोला, “ओ पिता, मेरी शुणणै कठै हाँ तेरा धन्यावाद करो। हाँ जैणौ कि तू सदा मेरे शुणो, पर मौं ए इंदे खड़ुएदै इन्हा सभ लोगै मदद करणै कठै बोला ताकि इंयो बिश्वास करो कि तौं हाँ भेजादा।’’ तिंया यीशुए हाक पाए, “ओ लाजरा, कब्रा मेंझा का बाहरा लै निकड़े आछ!’’

तै लाजर कब्रा बाहरा लै निकड़े आया! स एबै भी चादरै केरै पड़ैठुआदा थिया। यीशुए तैसाका बोला, “एसा चादरा काडणै लै तेसरे मदद करो होर तेस आजाद करो।’’ एस चमत्कारै केरे हैन सारै यहूदीयै यीशु गैश बिश्वास किया।

पर यहूदियै धार्मिक अगुवै यीशु का इर्ष्या डांदै लागै, एतिकठै सिंयो तरकीब बंणाणै कठै सब सागे कठै होए कि केहड़े केरे यीशु होर लाजरा मारै दैयो।