36. यीशुआ रूप बदलणा

एकी धैड़ै, यीशुए आपणै चन चेलै, पतरस, याकूब, होर यूहन्ना आपु सागे निंयै। (ए यूहन्ना नांओआ चेला स मंणछ नी आथी जुणी यीशु लै बपतिस्मा दैया था।) सिंयो प्रार्थना करणै कठै एक उछटी धारा गैशा लै डेयै।

जिंया यीशु प्रार्थना करदा लागादा थिया तै तेसरा मुंह सूरजा सैंही चमकदा लागा। तेसरै झिकड़ै परैशै सैंही शेतै होए गोए, जेड़ा संसारा दे कोए करे सको तेताका भी बढ़ेकेरे शेता।

तिंया यीशु गो मूसा होर एलिय्याह भविषयद्वक्ता प्रगट होए। इंयो मंणछ एस संसारा दे सैकड़ो साला पैहलै रहो थियै। तिन्है यीशु सागे तेसरै मरणै बारै दे गला की, किलैकि यीशु मसीह छेकै ही यरुश्लेमा दे मरे जांणा थिया।

जिंया मूसा होर एलिय्याह यीशु सागे गला करदै लागैदै थियै तिंया पतरसै यीशु का बोला, “ओ प्रभुआ म्हारा इंदे रौंहणा ठीक आसी। जै तेरे मर्जे आसी तै हाँमै इंदे चन बेदी बंणाइए, एक तेरै कठै, एक मूसै कठै, होर एक एलिय्याहै कठै।’’ पर पतरस ए नी जैणदी थिया कि स किजै बोलदा लागादा।

जिंया पतरस बोलदा ही लागादा थिया, तै एक चमकिला बादड़ उंदै आछेकेरे तिन्हा गैश छाये गोआ। तेखा तिन्है बादड़ा मेंझा का एक आवाज शुंणे। तिनी बोला, “ए मेरा प्यारा शोरो आसी जस सागे हाँ प्यार करो। हाँ तेसका खुश आसी। तेसरे शुंणो।’’ जिंया तिन्है चन चेलै स आवाज शुंणे सिंयो हैन डरे गोए होर मुंहै बल जमीना गैश पड़े गोए।

तिंया यीशुए सिंयो छुए होर बोला, “डरी नी आथी। उजै उठो।’’ जिंया तिन्है चउ बाखा लै हेरा, तै यीशु का सिवाए आपु सागे होर कोए नी हेरी।

यीशु होर सिंयो चन चेलै धारा गैशा का उंदै उतरे गोए। तिंया यीशुए तिन्हा लै आज्ञा दैयेकेरे बोला, “एबै इंदे जुण होआ तेतै चर्चा कसी सागे नी करी। हाँ छेकै ही मरे जांणा होर भी का मरैदै मेंझा का जिउंदा होए जांणा। तेताका का बाद, तुम्है लोगा का बोले सको।’’