35. दयालु बाबै कथा

एकी धैड़ै, यीशु तिन्हा हैन जै लोगा लै शिक्षा दैंदा लागादा थिया जुण तेसरी शिक्षा शुणणै लै कठै होए थिये। इंयो लोग कर लौणै आड़ै होर सागे होर भी लोग थिये जुणी मूसै ब्यवस्था पालन करणै कोशिश नी की थिये।

कुछ धार्मिक अगुवै हेरा कि यीशु इन्हा लोगा सागे एक साथी सैंही गला करदा लागादा थिया। एतिकठै तिन्है एकी दूजै का ए बोलणा शुरू किया कि स गलत करदा लागादा थिया। यीशुए सिंयो गला करदै शुणै, एतिकठै तिनी तिन्हा लै ए कथा दसे।

“एक मंणछ थिया जसरै दुए शोरो थियै। माठड़ै शोरुए आपणै बाबा का बोला, ‘ओ बाबा, मूलै एबै ही आपणी जायदादा हिस्सा चाहिए!’ तै बाबै आपणै दुई शोरु मेंझ आपणै जायदाद बांडे दैये।’’

“तिंया ही माठड़ै शोरुए आपणा सब किछ कठै करेकेरे दूर देशा लै नाठे गोआ होर पापी जीवन जिणै कठै आपणा सारा धन बर्बाद करे दैया।”

“एताका बाद, जिंदे माठड़ा शोरो थिया तेस देशा दे एक भयंकर नकाड़ पड़ा, होर तेसका खांणै लै खरीदणै कठै ढब्ब़ै नी थी। एतिकठै तेसलै जुण काम मीड़ा स सूअरा चराणैआ थिया। स ऐतरा दु:खी होर भूखा थिया कि स सूअरै खांणै लै खांणा चाहो थिया।’’

“अंता दे, तिनी माठड़ै शोरुए आपु का बोला, ‘हाँ इंदे किजै करदा लागादा? मेरे बाबै दासा का खांणै कठै हैन सारा आसी, तेखा भी हाँ इंदे भूखा मरदा लागादा। मूं आपणै बाबा गोलै बापस जांणा होर आपणै बाबा का अर्ज करणे कि मूं आपणै एकी दासा सैंई डा।’’’

“तै तिनी माठड़ै शोरुए बापस आपणै बाबै घौरा लै जांणा शुरू किया। जिंया कि स दूर ही थिया, तेसरै बाबै स हेरा होर तेस गैश तरस खाया। स दौड़ै केरे आपणै शोरु गोलै डेया होर स तेसरै गौड़ै मिड़ा होर स चूमा।”

“तिनी शोरुए बोला, ‘ओ बाबा, मौं परमेश्वरै होर तेरै खिलाफ पाप कियादा। हाँ तेरा शोरो कहलांणै लायक भी नी आथी।’”

“पर तैसरै बाबै आपणै सेवका का बोला, ‘छेकै जायेकेरे सभी का बांकै झिकड़ै लौयेकेरे आछो होर मेरे शोरु का फणैओ! तेसरी गुन्ठी दे मुंदडे होर तेसरै पैरा दे बूट फणैओ। तेखा सभी का बांका पशो टुको ताकि हाँमै जश्न मनाओ, किलैकि मेरा शोरो मरे गोआ थिया, पर एबै जिउंदा आसी! स लुखे गोआ था, पर एबै हाँमा लै स मिड़े गोआ!’’’

“एतिकठै लोगै जश्न मनाणा शुरू किया। किछ समा बीतणै का बाद, बडड़ा शोरो खेचा दे काम करेकेरे घौरा लै आया। तिनी गांणै होर नाचणै आवाज शुणे होर हैरान होआ कि ए किजै होंदा लागादा थिया।’’

“जिंया बडड़ै शोरु का पता लागा कि सिंयो एतिकठै जश्न मनांदै लागैदै थियै किलैकि तेसरा भाये घौरा लै आये गोआ थिया, तै स हैन गुस्सा होआ होर घौरा भीतरा लै नी आई। तेसरै बाबै बाहरा लै आछेकेरे तेसका तिन्हा सागे जश्न मनांणै अर्ज किये, पर तिनी नां किये।’’

“तिनी बडड़ै शोरुए आपणै बाबा का बोला, ‘इन्हा सारी साला दे मौं तेरे कठै विश्वासै सागे काम किया! कबै भी तेरे गल नी टाड़ी। पर तौं मूलै एक माठे बाकरे भी नी दैई ताकि हाँ आपणै साथी लै धाम दैए सकू। पर तेरै इनी शोरुए तेरा धन बुरै कामा करणै दे बर्बाद करे दैया। होर एबै जिंया स आयादा आसी तै तेसरै कठै जश्न मनाणै लै तौं सभी का बांका पशो मारे दैया।’’’

“बाबै जबाब दैया, ‘ओ मेरै शोरुआ, तू सदा मूं सागे आसी, होर जूण किछ मेरा आसी स सभ तेरा आसी। पर हाँमा लै जश्न मनांणा ठीक आसी किलैकि तेरा भाए मरे गोआ थिया, पर एबै स जिउंदा आसी। स लुके गोआ थिया। पर एबै हाँमै स पाए हेरा।’’’