1. परमेश्वरे संसार बढ़ाऊवो

परमेश्वरे सबी कै पैहले संसारे सब चिज़ा ऐणें करे बढ़ाऊवे। तैवे छआ दिन दै संसारे अज़ौ ज़ौ कुछ एऊ संसारा दै आ सें सब चिज़ा ऐणें करे बढ़ाऊवी। ज़ैबी परमेश्वरे ज़ौ पृथुवी बढ़ाऊवे तैथा बाद पृथुवे न्हैरे अज़ौ शुन्नी पड़ी दै तै, किल्हैकि ऐबी सेके परमेश्वरे कोई वी चीज़ नेईं ती बढ़ाऊवे दै। पर परमेश्वरे आत्मा पाणीं मैंथे मंडराऊवा त।

परमेश्वरे बोलो, “प्रैशो हअ!” अज़ौ तेवीये प्रैशो हुअ। तेखो परमेश्वरे शाऔ कि ज़ौ प्रैशो बढीया त अज़ौ तैवुये तैथा लै “दिन” नांव देनो। तैवु प्रैशे कै न्हैर अलग कीयो अज़ौ तैवे न्हैरे लै “राचो” नांव देनो। परमेश्वरे संसार बणांणे पेहले दिना दै प्रैशो बढ़ाऊव।

परमेश्वरे संसारा बढ़ाऊणें दुज्ज़ै दिना दै बोलो,“पाणीं मांझी चैईं एक अंतर हुअ।” अज़ौ एक अंतर हुअ। परमेश्वरे एऊ अंतरा लै “सरग” बोलो।

चन्नुये दिन दै परमेश्वरे बोलो,“पाणीं एकी जागा दी कठ्ठे चैईं हुअ अज़ौ शुक्को माट्अ चैईं धिषुअ।” तैवे शुक्कै माट्टै लै “पृथवे” नांव बोलो अज़ौ पाणीं लै “समुंदर” नांव देनो। परमेश्वरे शाऔ कि ज़ुंण बी तैवे बड़ाऊवोद स बढीया त।

तेखो परमेश्वरे बोलो,“ऐया पृथुवी दै चैईं सवी रंगै बूट झाटअ लूंगे।” अज़ौ तेणों ही हुअ। तेखो परमेश्वरे शाऔ कि ज़ौ तैवे बढ़ाऊव स सब बढीया त।

परमेश्वरे संसार बणांणें चौथे दिन बोलो ,“सरगा दै चैईं प्रैशो हुअ।” अज़ौ तेवीये सुरज़, ज़ोथ अज़ौ तारे प्रकट हुये। ज़ै परमेश्वरे पृथुवी दै प्रैशे दैणें लै बढ़ाऊवे अज़ौ दिन अज़ौ राचो दै,बर्ष अज़ौ मौसमा दी फरक हंणैं तैईं बढ़ाऊवे। परमेश्वरे शाऔ कि ज़ौ बी तैवे बढ़ाऊव स सब बढीया त।

पाँज़ुये दिन परमेश्वरे बोलो, “ज़िंऊँदे ज़ीब चैईं पाणीं मांझ़ी भरूये अज़ौ सरगा दै चैईं ऊड़दे च़ड़कु।” ऐणं करे बढ़ाऊवे परमेश्वरे पाणीं दै तैरने वाड़े कई रंगै ज़ीब-ज़ंतु अज़ौ च़ड़कु। परमेश्वरे शाऔ कि स सब बढिया त अज़ौ तिन्ना लै बर्गत देने।

संसारा बणांणें छाऊये दिन परमेश्वरे बोलो,“माट्टे मैंथे रणैं वाड़ै केई रंगे ज़ानवर चैईं पैदा हुये।” अज़ौ परमेश्वरे ज़ेणं बोलो तेणों ही हुओ। तिन्ना मांझ़ी कै कुछ ज़ानबर धाचणां वाड़े तै, कुछ तै रिंगड़े वाड़ै ज़ीब, अज़ौ कुछ ज़ानबर तै ज़ांगला दै रणैं वाड़ै। परमेश्वरे शाऔ कि स सब बड़िया त।

तेखो परमेश्वरे बोलो, “आऔ एबैं बड़ावंण मारे आदमी आपणैं ज़ैयों अज़ौ आप्पू साही एकी ज़ैयों। स थोआ पृथुवी दै अज़ौ सबी ज़ानबरा दै आपण हक।”

तेखो परमेश्वरे माट्टो चैको अज़ौ तेथा कै आदमी बड़ाऊवो। तैवु दै ज़िंऊंण दैणें तैईं सांस फूकरो। तैवु आदमीय नांव आदम त। परमेश्वरे तैवु आदम रोणैं तैईं एक बगीच़ो बढ़ाऊव अज़ौ तैवु बगीचे दै आदम थोओ तैवु बगीचे निगराणे करने तैईं।

तैवु बगीचे मांझ़ परमेश्वरे दि खास्अ बूट लाये – ज़िंदगी दैणें वाड़ बूट अज़ौ भले- बुरैय ज्ञैना दैणें वाड़ बूट। परमेश्वरे आदमा लै ऐणं हुकम देनो,“तू एऊ बगीचेय सबी बूटे फड़ खाई सका, पर ज़ुंण भलै या बुरैय ज्ञयान देणें वाड़ बूट आ, ऐऊ बुटे फड़ा कैबी ना खाये, किल्हैकि ज़ैऊ दिन दै तू एऊ बूटे फड़ा खा तैवु दिन दै तू पाक्कै दै मरा।

तेखो परमेश्वरे बोलो, “आदमो एकली रोणों ठीक नेईं ” पर कोई बी ज़ानबर आदमो साथी ना हुए सको।

तैईं परमेश्वरे आदमा लै गणें नींज़ दैनी। तेखो परमेश्वरे आदमैं-एक पाशड़ गाढैय एक छैऊड़े बड़ाऊवे। तेखो परमेश्वरे स छैऊड़े आदमा बिढ़ै आणें।

ज़ैबी आदमे स छैऊड़े शाये आदमे बोलो,“वाह! ज़ौ त मूँईं साही आ! ऐया लै ‘छैऊड़े’ बोलणों, किल्हैकि ज़ौ मर्दा कै बढ़ाऊवे दै आ।” ऐथी बज़ा कै मर्द आपणैं आम्मा-बाप्पू छाढेय आपणीं लाड़ी सीथी कठ्ठै रहा।

परमेश्वरे मर्द अज़ौ छैऊड़े आपणैं रूपा दै बढ़ाऊवे। तैवे तिन्ना लै बर्गत दैनी अज़ौ तिन्ना लै बोलो,“खास्से लवादे अज़ौ नाती -पोते पैदा करो अज़ौ पृथुवी दै भरिय!” अज़ौ परमेश्वरे शाऔ कि ज़ुंण कुछ मेरे बढ़ाऊव द आ स सब बढीया त, अज़ौ स इन्ना सवी कै बड़ो खुश त। ज़ौ सब कुछ संसार बढ़ाऊंणें छाऊये दिन हुअ।

ज़ैबी सातुओ दिन आऔ तैबी परमेश्वरे तिन्ना सब कामा कै ज़ुंण स करदो त लागद, सें सब काम खात्म किये। तैवे सातुवे दिनां लै बर्गत दैनी अज़ौ स दिन पवित्र कीयो, किल्हैकि तैवु दिन परमैशरे संसारे सबे च़िज़े बढ़ाऊवेय छैक्की। ऐणं करे परमेश्वरे संसार अज़ौ ज़ौ कुछ तेथा दै आ सें सबे चिज़ा बढ़ाऊवे।