2. पाप संसारा दी आऔ

आदम अज़ौ तैवुये लाड़े परमेश्वरे बणाऊंवे दै बांकै बगीचे दी बड़ी खुशी कै रहा तै। तिन्ना मांझी कोई वी ज़ुड़कै ना भीड़ा तै, तेखो बी तिन्ना शर्म ना लागा तै। किल्हैकि संसारा दी पाप नेईं त। आदम अज़ौ तैवुये लाड़े तैवु बगीचे दी सदा ही हांढदै - फिरदै रहा तै अज़ौ परमैशरा सीथी चपड़ा तै ।

पर तैवु बगीचे दी एक साप बी त। स बड़ओ चलाक त। तैवुये तेया छैऊड़ी लै पुछो, “कै सची लै परमेश्वरे तमा लै ऐवु बगीचे सब फड़ा खांणां लै माना कीयद आ?”

तेया छैऊड़ीये ज़बाब देनौ, “परमेश्वरे हामा लै बोलो द कि हाम्में तैवु भले-बूरैअ ज्ञयाना दैणें आड़े बूटे फड़ा छाढ़ेय कोये बी बुटे फड़ा खाई सकीं। परमेश्वरे हामा लै बोलो द कि ज़ै थारे तैवु बुटो फड़ा खाओ या स छुंओ बी, तै तुमा मरने।”

तैवु सापे छैऊड़ी लै ज़बाब देनौ, “ज़ो सच नेईं आ! तुम्मे ना मरनैं आथी। परमैशर ज़ाणां कि ज़ैणें तुम्मा तैवु फड़ा खाआ, तुम्मे बी परमैशरा ज़ैं बणनैं अज़ौ तैवु ज़ैंय भले-बुरैअ ज्ञयानैं समझण आणें।”

तेया छैऊड़ीये शाऔ कि स फड़अ मना खुश करने वाड़ो त अज़ौ खांणां लै बढीया लागा त। स छैऊड़े बी समझकार बढ़नो चाहा ते, तैई तेये स फड़ चोड़े खाओ। तेखो तेया आपणैं लाड़े लै ज़ुंण तेया सीथी रहा त, तैवु लै बी देनो, तैई तैवुये बी खाओ ।

अज़ौ ज़ै ही फड़अ खाअो,एक दमा कै, तिन्नै आखी खुल्ही,अज़ौ तिन्ना लै ठैऊ लागो कि सें नांगे तै। तिन्ने पाचा लै तुन्निओ तेथा कै ज़ुड़कै बड़ाऊवे। अज़ौ तेथा कै आप्पणैं शरीरा लै बुदणैं कोशिश कीये।

तेखो ज़ैबी आदम अज़ौ तैवुये लाड़ी बगीची दी घुमदे तै लागे दै तिन्नै परमेश्वरे आवाज़ शुणें। तेखो सें दिगै परमैशरा कै चोरुये। तेबे परमेश्वरे आदमा लै चिंज़ुओ,“तू किधे आ?” आदमे परमेश्वरा लै ज़बाब देनौ,“मेरे तुमा लै बगीचे दी घुमदी बैरे शुंणो अज़ौ मूँ ड़रौ, किल्हैकि मूँ नांगो त। तैईं मूँ चोरूओ।”

तेखो परमेश्वरे पुछो, “तोल्ले कोरे बोलो कि तू नांगो आ? तै कै तेरे स फड़अ ता ना खाअो ज़ोआ लै खाणां लै मेरे मन्ना तै किये दै ?” आदमे परमैशरा लै ज़बाब देनो?,“थारै ज़ुंण छैऊड़ी मुलै दैनी देया तेया छैऊड़ीये स फड़अ मुलै खांणां लै देनो।”तेखो परमेश्वरे तेया छैऊड़ी कै पुछो,“तेरे ज़ो खै कीयो?” तेया छैऊड़ीये ज़बाब देनौ,“ऐवु सापे मुलै धोखो देनो।”

परमेश्वरे सापा लै बोलो, “तल्ले मूँ शाराप दैऊं! तू ऐबै कै आपणैं पेटा कै हांड़ा अज़ौ माट्टो चाटा। तू अज़ौ ज़ौ छैऊड़े एबै कै एकी दुज़ै कै नफरत करा, अज़ौ तेरी लवादा,अज़ौ तेवे लवादा एकी दुज़ै कै नफरत करा। एआ छैऊड़ीये वंश तेरे मुंड़ा लै फैचा,अज़ौ तू तेये फेने लै डाम मारा।”

तेखो परमेश्वरे तेया छैऊड़ी लै बोलो, “मूँ एबै कै तेरे लवादा-पैदा करने तखलीफ खास्सी बड़ाऊं। तेरे आश तेरे लाड़े दी हंणें, अज़ौ स तौंईं मैथे हक थोआ ।”

परमेश्वरे आदमा लै बोलो,“तेरे आपणीं लाड़ीये बात शुणें अज़ौ मेरो हुकम ना शुंणों। तेई ज़ो माट्टअ शाराप वाड़ हुअ, एबै तोल्ले नाज़ बोऊणां लै बढ़े मेहनत करने ज़ा। तेबै तू मरनो,अज़ौ तेरो शरीर माट्टे मांझी मिलणों।” तेखो आदमे आपणीं छैऊड़ी नांव हव्वा थाओ, तेथो मतलब आ “ज़िंदगी दैणें वाड़े, किल्हैकि स सबी ज़ातीये आम्मा हंणें। अज़ौ तेखो परमेश्वरे आदम अज़ौ हव्बा लै ज़ानबरे खाल्टै कै बणैं दै ज़ुड़कै बड़ेऊवे।

तेखो परमेश्वरे बोलो,“एबै भले–बुरैअ ज्ञयान ज़ाणींओ आदमी हामा ज़ै गै बणें, तैई एबै इन्ना लै ज़िंदगी दैणें वाड़ै बूटो फड़ ना खाणैं दैंणो चैईं। ऐणों ना चैईं हुओ कि सें ऐवु फड़ा खाये अज़ौ सें सदा लै ज़िंऊदै रहे।” तैई परमेश्वरे आदम अज़ौ हव्वा तैवु बगीचे कै बैहरे गाढ़ै। अज़ौ परमेश्वरे कोई लै बी तैवु ज़िंगदी दैणें वाड़े बुटे फड़ खाणैं कै रोकणें तैईं तैवु बगीचे, भितरै भागणैं वाड़ै दुआरा दी शक्तिशाली स्वर्गदूतो पैहरो लाओ।