3. बढ़ी बाड़ा कै संसारो नाश

बड़े लाम्बे वक्ता बाद, संसारा दी बड़े भारी लोग रआ तै। सें बड़े दुष्ट अज़ौ झगड़ै करने वाड़े गेये तै बणैं। सब लोग एतै नैंढ़े गेये तै होये कि परमेश्वरे आखरी बचार किओ कि एक बढ़े बाड़ा कै पूरै संसारो नाश करनो चैईं।

पर परमेश्वर नूहा कै बढ़ो खुश त। स धर्मे आदमी त, ज़ुंण दुष्टा आदमी मांझी रहा त। परमेश्वरे नूहा लै बोलो कि स एक बढ़े ताकड़ी बाढ़ बैज़णे वाड़ आ। तेथी बज़ा कै, परमेश्वरे नूहा लै एक बढ़े किश्ते बड़ावणां लै बोलो।

परमेश्वरे नूहा लै एक किश्ते बड़ावणां लै बोलो, ज़ुंण कम से कम एक शौह चाढी मीटर लाम्बे अज़ौ तेहीस मीटर चौढ़े अज़ौ 13.5 मीटर ऊशटे बणांवणें। नूहा लै स किश्ते ज़ुकड़ै कै बड़ाऊणें तै अज़ौ तेथ दी चन्न मंज़ले, खास्से कमरै, एक छैप्पर अज़ौ एक खीड़के बढ़ावणें तै। स किश्ते नूहा लै, तैवुये टबरा लै, अज़ौ माट्टै मैथे ज़ैतै रंगै बी ज़ानबरा आ तिन्ना सवी लै तेया बाड़ा कै बचावणां लै तै।

नूहे परमेश्वरो हुकम मान्नो। तैवुये अज़ौ तैवुये चन्नैं भाऊये तैणें ही किश्ते बड़ाऊवे ज़ैणों परमेश्वरे तैऊ लै बोलो द त। किल्हैकि स किश्ते सारे बढ़ी तै, तैही तेथा बणांऊणां लै खास्से बर्ष लागे। नूहे लोगा लै आणैं बाढ़ी बाढ़े बारै दी चेताऊये। अज़ौ तिन्ना लै परमेश्वरे बाते मानणां लै बोलो, पर तिन्नै तेवे बातौ विश्वास ना कीयो।

परमेश्वरे नूहा लै अज़ौ तैवुये टबरा लै अज़ौ सबी ज़ानबरा लै ड़टिओ नाज़ कठ्ठै करनेओ आदेश देनो। ज़ैबी सब कुछ तैयार गेयो त हये, तेखो परमेश्वरे नूहा लै बोलो कि एबै तेबो, तेवी लाड़ीओ, अज़ौ तैवुये चन्नै भाऊओ, अज़ौ तिन्नी लाड़ीओ – कुल मिलावेय आठा आदमीओ किश्ती भितरै भागणैंओ वक्त आही गेय त।

परमेश्वरे सवी रंगैं ज़ानबर अज़ौ चड़कुये नर अज़ौ मादा सब नूहा बिलै भेज़े ताकि सें किश्ते भितरै, ज़ैबी बाढ़ आछा तेवी बचे सका। परमेश्वरे सबी रंगै ज़ानबरे सात नर अज़ौ सात मादा भेज़ै ज़ौ लै स बली चढ़ाऊवी सका त। ज़ैबी सें सब तेया किश्ते दी चोढ़ै तेथा बाद परमेश्वरे आप्पुई तेया किश्तेओ दुआर हुढ़ौ।

तेखो पाणीं पढ़नो शुरू हुओ, अज़ौ पाणीं पढ़दो लागो, अज़ौ पढ़दो ही रणौं। धरती दी पाणीं कबल्लअ ही लागदो रह चाहड़ी दिन अज़ौ चाहड़ी राची सेके। धरतै भितरा कै बी पाणीं फुटे फुटेयो बैहरे निखढदो लागो। संसारी सब कै सब चीज़ा पाणीं मांझी डुबी, इदे तैईं कि ऊष्टे कै ऊष्टे धार बी पाणीं मांझी डुबी।

सिर्फ तिन्ना आदमी अज़ौ ज़ानबर ज़ुंण किश्ते भितरै तै, तिन्ना छाढेय हर एक च़ीज़ ज़ुंण शुक्की धरते मैथे रणें वाड़ै तै स हर एक च़ीज़ खत्म हुये, पर ज़ेतरै लोग अज़ौ ज़ानबर किश्ती भितरै तै सें सब बचै। स किश्ते पाणीं मेथे तैरदी रही लागी तेया किश्ते भितरै हर एक च़ीज़ डुबणैं कै बच़ै।

पाणीं कुआशुणैं बाद, पांज़ा मीहने सेके किश्ते पाणीं मैथे तेरदे रहे, ऐथा बाद पाणीं घटदो लागो। तेखो एक दिन स किश्ते एक धारा मैंथे टेक्के। तेखो बी एबी सेके संसारा दी भरी पाणीं त। चन्ना महीने बाद, ऊष्टे ऊष्टे धारै टिरा धिषदी लागी।

तेखो चाहड़ी दिना बाद, नूहे एक काऊढ़ो बैहरे छाढ़ो शांणां लै कि पाणीं शुक्को की ना शुक्को। स काऊढ़ो शुक्की धरते लोड़ेओ औरे-पौरे उड़दो रहो, पर तऊ लै किदरै बी ज़ागा ना मिले।

तेखो नूहे एक कबूतरे बैहरे छाढ़े। पर तेया लै बी शुक्कै धरते किदरै ना मिले, तैई स कबुतरे नूहा बिलै बापस आये। साता दिना बाद तैवुये सोई कबुतरे बैहरे छाढ़े। तेखो स कबूतरे आपणीं च़ुंज़ा दी एक ज़ैतूने हरे पाचा पायेओ आये। पाणीं शुक्कद गेयो त लागे, अज़ौ बूट झाट फैर लुंगदे गेये तै लागे।

नूह सात दिना पखिओ रहो अज़ौ चन्नुवी बैरे सोई कबुतरे बैहरे छाढ़े। एबकी बैरे तेया लै रूकणां लै ज़ागा मिले एबकी बैरे स बापस ना आई। पाणीं शुक्कदो त लागद।

दिया मीने बाद परमेश्वरे नूहा लै बोलो, “एबै तू अज़ौ तेरे टबर अज़ौ सब ज़ानबर किश्ती कै बैहरे निखड़ो। बड़ी सारी लवादे अज़ौ पोतरू - धोतरू पैदा करो अज़ौ धरती दी भरीओ।” तेखो नूह अज़ौ तैवुये टबर तेया किश्ती भितरा कै बैहरे निखड़े।

किश्ती कै बैहरे निखढ़ने बाद नूहे, एक वेदे बढ़ाऊवे। अज़ौ बली चढ़ाऊणें वाड़ै सब ज़ानबरा मांझी कै कुछ बले चढ़ाऊवे। परमेश्वरे तेया बली कै बढ़ो खुश हुओ अज़ौ नूह अज़ौ तैवुये टबरा लै बर्गत देने।

परमेश्वरे बोलो, “मूँ सोह खांऊं कि आदमीये बुरै कामें बज़ा कै धरते लै केबीये शराप ना दैऊं। अज़ौ नां ही बाढ़ा भेज़ीओ संसारो नाश करूं, किल्हैकि आदमी होछढ़े कै ही पापी हआ।”

तेखो परमेश्वरे आपणैं वाचे निंशाणैं सेके प्ररैड़ी बढ़ाऊवे। ज़ैबी बी सरगा दी प्ररैड़ी धिषिया, तेवी परमेश्वरे लै ज़ुंण तैवुये सोह किये दै तै तेथा लै याद करा अज़ौ तैणें ही तैवुये लोग वी याद करा।