4. अब्राहमा सीथी परमेश्वरे वाचा

बाढ आंणैं कै केई बर्षा बाद, संसारा दी सारे आदमे रहा तै, अज़ौ बी सें एबी बी परमेश्वर अज़ौ एकी दुज़ै खलाफ पाप करा तै। सें सब एके भाषा बोला तै, तैई सें सब एके सीथी कठ्ठै हुये अज़ौ एक बस्सते बड़ाऊंदे लागे। ज़ैणों परमेश्वरे हुकम त देनो दो, तैवु साबा दी सें सब संसारा दी ना भरूये।

सें बड़े घमंडी तै, अज़ौ तिन्नै कैणीं ज़िदगी ज़िऊंणीं चैईं एथा बारै दी सें परमेश्वरे हुकम ना मानणो चाहा तै। इदे सेके कि तिन्नै एक ऐणीं कोठे बणाऊणे शुरू किये ज़ुंण स्वर्गा तैईं पहुंचै सका तै। परमेश्वरे शाऔ कि ज़ै सब एकी सीथी मिलिओ नैढ़े काम करदे रहा लागी, तै सें सब मिलिओ अज़ौ बी बड़े भारी पाप वाड़े काम करी सका।

तैईं परमेश्वरे तिन्नै भाषा शिक अलग - अलग भाषा दी बदले अज़ौ सें आदमे सारै संसारा दी फैलाऊये। ज़ुंण बस्सते तिन्नै बड़ाऊणें शुरू तै किये दै तेथा लै बाबेल बोला, तेथो मतलब आ “गड़बड़”।

केई शौ बर्ष बाद, परमेश्वरे अब्राम नांवे एकी आदमी कै बात कीये। परमेश्वरे तैवु लै बोलो, “आपणैं देश अज़ौ टबरा लै छाढ़ीयो तैवु देशा लै भागो ज़ुंण मूँ ताखै खौज़ूं। मूँ तोल्ले बर्गत दैऊं अज़ौ तौंईं कै एक बढे ज़ाते बड़ाऊं। मूँ तेरो नांव बड़ महान करूं। ज़ुंण तोल्ले बर्गत देया मूँ तैवु लै बर्गत देऊं, अज़ौ ज़ुंण तोल्ले शराप देया मूँ तैवु लै शराप दैऊं। संसारे सब कुल तौंईं कै बर्गत पाआ।”

अब्रामे परमेश्वरे हुकम मानो। तैवो आपणैं सब नौकरा अज़ौ सारी ज़ैदादा सीथी आपणें लाड़े सारै पाऐय तैवु देशा लै भागो, अर्थात् कनान देशा लै भागो, ज़ुंण परमेश्वरे तैवु लै खोज़ौ द त।

ज़ैबी अब्राम कनान देशा दी पहुंचो, तै परमेश्वरे तैवु लै बोलो, “आपणीं चारी बिले शाअ। मूँ ऐऊ सारै देशा तोल्ले दैऊं। तेरे वंश सदा लै एथा दी हक थोआ।” तेखो अब्राम तैवु देशा दी बस्सो।

मलिकिसिदक नांवो एक मर्द त ज़ुंण परम प्रधान परमेश्वरो पुरोहित त। एकी बैरे ज़ैबी अब्राहम युद्धा करीय आन्दो त लागद तेबी स अज़ौ अब्राम मिले। मलिकिसिदके अब्राम लै बर्गत देने अज़ौ तैवु लै बोलो “परम प्रधान परमेश्वर ज़ुंण स्वर्ग अज़ौ पृथुईयो मालक आ स तोल्ले बर्गत देआ।” तेखो अब्रामे युद्धा कै ज़ीती दी सबी चिज़ौ दास्सुअ हिस्सो मलिकिसिदकीया लै देनौ।

केही बर्ष बीते, पर एबी बी अब्राम अज़ौ तैवो लाड़ीये कोये बी भाऊ नेंई त। परमेश्वरे अब्रामा कै बात किये अज़ौ दुवारा कै सोह कीये। तैवो एक भाऊ पैदा हआ अज़ौ ज़ैणें सरगा दी तारे आ तैणें ही तैवो शिख वंश हआ। अब्रामे परमेश्वरे सोह मैंथे विश्वास थोओ। परमेश्वरे एक घोशणां किये की अब्राम एक धर्मे आदमे आ किल्हैकि तैवो परमेश्वरे मैंथे विश्वास थोओ।

तेखो परमेश्वरे अब्रामा सीथी वाचा बाने। आम तौरा दी, ज़ौ वाचा दीया मंडली मांझी एक दुज़ै कामा करनेय फैंसलो हआ। परमेश्वरे अब्रामा कै ज़ै सोह तैबी कीये ज़ैबी अब्राम सुत्तो द त, पर तैबी बी स परमेश्वरा लै शुणें सका त। परमेश्वरे बोलो,“मूँ तोल्ले तेरे शरीर कै एक भाऊ दैऊं। मूँ तेरे वंशा लै एऊ कनान देशा देऊं।” पर फैर बी एबी सेके अब्रामे कोये बी भाऊ नेंई त।