5. सोह किय द भाऊ

अब्राम अज़ौ तैवुये लाड़ी सारै कनान देशा दी पहुंचणैं दसा बर्षा बाद बी, एबी सेके तिन्नै कोई बी भाऊ नेंई त हुओ द। तैई, अब्रामे लाड़े सारै तैवु लै बोलो, “परमेश्वरे एबी सेके कोई बी लवाद नेंई देने दी। अज़ौ मूँ ऐबे लवाद पैदा करने लै खास्सी बुढ़ड़े गेय होई। ऐबे शुणं, मेरे नोकराणें हाज़िरा इदेय। तेया कै बी ब्याह कर ताकि स मुंईले लवाद पैदा करी सका।”

तेवे अब्रामे हाज़िरा कै ब्याह कीयो। हाजिरे एक भाऊ हुओ, अज़ौ अब्रामे तैवुवो नांव इश्माएल थोओ। पर सारै हाजिरा कै ज़ड़दे लागे। ज़ैबी इश्माएल तैरा बर्षो त, परमेश्वरे फैर अब्रामा कै बात कीये।

परमेश्वरे अब्रामा लै बोलो, “मूँ आ परम प्रधान परमेश्वर। मूँ तौंईं सीथी एक वाचा बानूं।” अब्रामे माट्टे माथै लाम्बे पडीओ दंडबत कियो। परमेश्वरे अब्रामा लै ऐणों बोलो कि, “तू खास्सी ज़ातिओ बाप्पू हंणो। मूँ तोल्ले अज़ौ तेरे लवादा लै कनान देश दैऊं, तिन्ने निज़ ज़ागा हंणां लै दैऊं अज़ौ मूँ सदा लै तिन्नो परमेश्वर हंणो। तोल्ले हर एक घरे आदमीय खतनो करावणों ज़ा।

“तेरी लाड़ी सारै कै एक भाऊ पैदा हआ - सोये हंणो सोह कीय द भाऊ। तैवु नांव इसहाक थोये। मूँ तैवु सीथी वाचा बड़ाऊवेय थौऊं अज़ौ स एक बढ़े जाते बणां। मूँ इश्माएला लै बी एक बढ़े ज़ाते बणाऊं, पर मेरे वाचा इसहाका सीथी रणें।” तेखो परमेश्वरे अब्रामो नांव बदलेय अब्राहम थोओ, ज़ेथो मतलब आ “खास्से देशो, सबी कै पेलअ बाप्पू”। परमेश्वरे सारै नांव बी बदलेया सारा थाऔ, ज़ेथो मतलब हआ “सबी कै पेलअ कै आम्मा”।

तैवु दिन अब्राहमे आपणैं सबी घरीओ खतनो कीयो। तकरीबन एकी बर्षा बाद, ज़ैबी अब्राहम शो बर्षो हुओ अज़ौ सारा नाब्बे बर्षे तै। तेबी सारा अब्राहमा लै एक भाऊ पैदा कीयो। ज़ेंण परमेश्वरे बोलदो त तिन्नैं तैवु नांव इसहाक थोओ।

ज़ैबी इसहाक ज़वान हुओ, तेखो परमेश्वरे ऐणों बोलिओ तेवो विश्वास परखो । परमेश्वरे बोलो,“ कि तू आपणैं एक लौते भाऊ लै निंऊं, अज़ौ तेवे मुलै बले चढ़ाअ।” तेखो बी आब्राहमे परमेश्वरे हुकम मानो अज़ौ आपणैं भाऊये बले चढाऊणां लै तैयार हुओ।

ज़ैबी अब्राहम अज़ौ इसहाक बले चढ़ाऊणी वाड़ी ज़ागा लै चालै। तेबी इसहाके पुछो, “औ मेरे बाप्पू आ, हाम्मे आगे बली करना लै ज़ुकड़ै ता आसा, पर बली करना लै च़ैलटू किया?” अब्राहमे ज़बाब देनो,“औ मेरे भाऊआ, परमेश्वर बली करना लै च़ैलटूओ इन्तज़ाम आप्पुई करा।”

ज़ैबी सें बली चढ़ाऊंणें वाड़ी ज़ागा दी पहुंचै, तेखो अब्राहमे इसहाक बांनेय बेदी मैथे लाम्बो पाओ। स आपणैं भाऊ लै मारनै ही वाड़ो त कि परमेश्वरे बोलो,“अब्राहमा थाक्क ! आपणैं भाऊ लै नुकसान ना पहुंचाऊ! एबै मूँ ज़ाणीं गेयो कि तू मेरो ड़र माना किल्हैकि तेरे आपणैं एकलौते भाऊ लै बी मूईं कै बी बचावीय ना थोओ।”

तेखो अब्राहमे आप्पू बिढ़ै ही एक च़ैलटू झाखड़ा दी फसो द शाऔ। इसहाके बदले परमेश्वरे आप्पु ई च़ैलटूओ इन्तज़ाम कीयो। अब्राहमे बढ़ी खुशी कै च़ैलटुये बले देने।

तेखो परमेश्वरे अब्राहमा लै बोलो कि, “तू मुलै सब कुछ दैणां लै तैयार हुओ, इदा सेके कि आपणों एकलौतो भाऊ बी, तैईं मूँ तोल्ले बर्गत देणें सोह देंऊं तेरे वंश सरगे तारे कै बी ज़्यादै हंणैं। किल्हैकि तेरे मेरो हुकम मानो, तैईं मूँ तेरे टबरा कै संसारे सब कुला लै बर्गत देऊं।”