34. यीशु दुज़ी कांड़ै कै शकैवा

यीशुये परमेश्वरे राज़े बारै दी दुज़ी बी खास्सी काणीं सुनावी। उदाहरणां लै, तैवुये बोलो, “परमेश्वरो राज़ एक शैरशेय बियु ज़ैंअ आ। ज़ौआ लै कोरे आपणैं ढ़ोखरै दी बोओ। तुमे ज़ाणां कि शैरशेय बिंयु सोवी बियु मांझी सोबी कै छोटो होआ।”

“ पर ज़ैबी शैरशेय बिंयु बढ़ा, तेखो स बगीचेये सबी बुटा कै बढ़ो बणां। स एतरो बढ़अ कि चौड़कु आयेय तैव बुटी शांणटी दी आराम करा।”

यीशुये एक दुज़ै कांड़ै बी बोले, “परमेश्वरो राज़ सज़ैड़ेय ज़ैंयों आ। एक छैऊड़े सज़ैड़े लै पिठ्ठै मांझी मिलावा, तेखो स सारै पिठ्ठै दी फैला।”

“ स्वर्गो राज़ तैवु खज़ाने ज़ैंयों आ ज़ौआ लै कोईये ढोखरा दी चोरो। कोये दुज़ै आदमी लै स खज़ानो मिलो अज़ौ तैवुये तेथा लै पाणें इच्छा थौये। तैईं तैवे स दुवारा कै आटो। स खुशी कै एतरो भरूव कि तैवे भागेय आपणों सब कुछ बेचो ताकि स तैवु ढोखरा लै लेये सका ज़िदै स खज़ानो त।”

“स्वर्गो राज़ एक खास्से मैंहगे मोती ज़ैअ बी आ। ज़ैबी एक मोतिये लैंण दैंण करने वाड़े लै स मिलो, तेखो तैवे आपणों सब कुछ बैचो ताकि स तैऊ मोती लै लेये सका।”

तिदै कुछ आदमी तै ज़ुंण सोचा तै कि परमेश्वर तिन्ना लै तैईं ग्रहण करा किल्हैकि सें भलै काम करदे लागे दै तै। ज़ै लोग तिन्ना लोगा लै तुछ माना तै ज़ुंण तिन्ना भलै कामा लै ना करा तै। तैईं यीशुये तिन्ना लै कांड़ै सुनावे: “दी आदमी तै अज़ौ दिगे ही मादरा दी प्रार्थना करना लै भागे। तिन्ना मांझी एक चुंगी लैणें वाड़ो त, अज़ौ दुज़ौ धर्मी अगुव त।”

“तैऊ धर्मी अगुवे ऐणेंं प्रार्थना कीये, ‘औ परमेश्वर, तेरो शुकर आ कि मूँ दुज़ै लोगा ज़ैयो पापी नेई आ- ज़ैणों कि डाकू अन्याय करने वाड़े आदमे, व्यभिचार, इदै सेके कि तेवु चुंगी लैणें वाड़े पापी ज़ैयो बी नेईं आ ज़ुंण इदेआ।”

“उदाहरणां लै, मूँ हपतै दी दिया बैरे ब्रत थौऊं, अज़ौ मूँ मुलै मिलणैं वाड़े पैसे अज़ौ समानो दसुअ भाग तोले लै दैऊं।”

“ पर स चुंगी लैणें वाड़ो तैऊ धर्मी अगुवे कै खास्सो दूर खड़े हुओ। तैवे ऊवी स्वर्गा बिलै आखी बी ना खोली। एथी ज़ागा दी, तैवे आपणीं मुठ्‌ठी कै आपणीं छातै पिटै अज़ौ प्रार्थना कीये, ‘औ परमेश्वर,मेहरवाने करेय मूँई मैथे घिंण कर किल्हैकि मूँ पापे आ।'"

तेखो यीशु बोलो, “मूँ तुमा लै सच बोलूँ, परमेश्वर तैवु चुंगी लैणें वाड़े प्रार्थना शुंणें अज़ौ तैव लै धर्मी घोषित कियो। पर तैवु धर्मी अगुवे प्रार्थना पसंद ना आये। तैईं परमेश्वर हर एक ज़ुंण घमंड़ी आ, तिन्ना लै अपमान करा, पर स तिन्ना हर एक आदमीयो आदर करा, ज़ुंण आप्पू लै छोटो समझा।”