33. एकी ज़मीदारै काणें

एक दिन, यीशु सौरा बिढ़ै त। स लोगी एक बड़ी भीड़ा लै शिकैऊंदो त लागो द। तैवु लै शुंणदे ऐतरे सारे लोग आये कि यीशु आगे तिन्ना सबी कै चपडना लै ज़ागा न रोहे। तैई स पाणी मैंथे खड़ी किश्ती दी भागो। तिदै स बेठो अज़ौ लोगा लै शिकैऊंदो लागो।

यीशुये तिन्ना लै ज़ौ काणें सुनावे, “एक ज़मीदार बियु बोंदो बैहरे निकड़ो। ज़ैबी स हाथा कै बियु बिखेरद त लागो द, तेवे कुछ बियु पेंढ़े आगे पोढ़ो। पर चडकुवे आये स सारो बियु खाओ।”

“दुज़ौ बियु शाकरैले माट्टे दी पोढ़ो, ज़िदी माटो खास्सो कम त। शाकरैले माट्टे दी पोढ़ो द वियु स्ताबी फुटो, पर तिन्नै ज़ड़ै माट्टे मैंथे ढूगी ना भागी सकी। ज़ैबी सूरज़ निकड़ो अज़ौ गर्मे पड़े तेखो सें पौधे शुकै अज़ौ मरे।”

“तेखो बी कुछ बियु झाखड़ा मांझी पोढ़ो। स बियु बड़दो लागो, पर कांड़े स दबाऊवो। तैई कांड़े मांझीये माट्टे दी पढ़े दै बियु कै ज़ुंण पौधे निकड़े, तिन्ना मांझी कै कोये बी नाज़ ना देये सको।”

“दुज़ौ बियु बाक्कै माटै मैंथे पड़ो स बियु बढ़ो अज़ौ ज़ैतरो बियु बोय द त तैथा कै तीअ, साठ, अज़ौ इदै सेके कि शौ गुणां नाज़ पैदा कियो। ज़ुंण बी परमेश्वरा पिछै हांढ़णो चा, स ऐया बात मैंथे ध्यान देया, ज़ुंण मूँ बोलदो लागो द आ!”

ऐया काणें शुणींय चैले ऊलझना दी पड़े। तैईं यीशुये समझाऊवे कि, “स बियु परमेश्वरो वचन आ। स पैंढो ऐणौं आदमी आ ज़ुंण परमेश्वरे वचना लै शुणां, पर तेथा लै समझा ना आथी। तेखो शैतान तैवु कै वचन चोरा । अर्थात शैतान तैवु लै वचन समझणां कै दूर थोआ।”

“स शाकरैल माटो ऐणों आदमी आ ज़ुंण परमेश्वरे वचना लै शुंणां अज़ौ खुशी कै तैवु वचना लै ग्रहण करा। पर ज़ैवी मुश्किल वक्त आ, या ज़ैबी दुज़ै लोग तैवु लै सतावा, तेखो स परमेश्वरा कै दूर भागा। मतलव सें परमेश्वरा मैंथे भरोसो थोणों बंद करा।”

“ स कांड़े वाड़ो माट्टो ऐणों आदमी आ ज़ुंण परमेश्वरे वचना लै शुंणां। पर स खास्सी बाता मैंथे सोचणों शुरू करा, अज़ौ स खास्से पैसे कमाऊंणैं कोशिश करा, अज़ौ खास्सी चिज़ा पाणैं कोशिश करा। कुछ वक्ता बाद, स परमेश्वरा कै प्यार ना करी सका, तैईं तैवे ज़ौ कुछ बी परमेश्वरे वचना कै शिखो द त, तेथा कै स परमेश्वरा लै खुश ना करे सका। स गिंहूँ डंठला साही आ ज़ुंण कोये नाज़ पैदा ना करे सका।”

“पर बाक्कैं माट्टे मैथे स आदमी आ ज़ुंण परमेश्वरे वचना लै शुंणां, तैवु मैंथे विश्वास करा, अज़ौ फड़अ आणां।”