32. यीशु दुष्टात्मा लागे दै एकी आदमी लै अज़ौ एक बीमार छैऊड़ी लै ठीक करा

यीशु अज़ौ तैवे चैले आपणीं किश्ती दी चढ़ेय तेया ज़ागा लै भागै ज़िदै गिरासेनी लोग रोहा तै। सें तेया ज़ागा दी भागेय किश्ती कै ऊतरै।

तिदै एक आदमी त ज़ौ दी दुष्टात्मा लागो द त।

स आदमे एतरो ताकतवर त कि कोए बी तैवु लै काबू ना आणें सका त। केई बैरे लोगे तैवी टांगे-बाई शांगड़ी कै बी बानी, पर स तिन्ना बी चोड़ा त।

स आदमी तैया ज़ागा दी कब्रा दी रोहा त। ज़ौ आदमी पूरे दिन अज़ौ पूरी राची हाक्का मारा त। स ज़ुड़कै ना भिड़ा त अज़ौ आप्पू लै ढोड़ा कै घायल करा त।

ज़ैणेंई ऐवु आदमीये यीशु लै शाऔ तेखो स दौडेय यीशु बिलै भागो अज़ौ तैवु आगे ज़ानूं मैंथे बेठो। तेखो यीशुये तैवु आदमी भितरे दुष्टात्मा लै बोलो, “एऊ आदमी कै बैहरे निकड़!”

तैवु दुष्टात्मा ज़ोरे ज़ोरे हाक्का मारी, “औ यीशु, परम प्रधान परमेश्वरे भाऊआ, तेरो मुंईं कै खै काम आ? कृपा करेय मुलै ना सताव!” यीशुये दुष्टात्मा कै पुछो,“ तेरो नांव खै आ?” तैवे ज़वाव देनो, “मेरो नांव सेना आ, किल्हैकि हामै खास्से आ।” (रोमी सेना दी केई हज़ार सिपाईये टोले एक “सेना” होआ तै।)

तिन्नै भूत प्रैते यीशु कै बिनती कीये, “मेहरवाने करिय हामा लै एया ज़ागा कै बैहरे ना भेज़!” तिदै बिढ़ै धारा दी सुंगरे एक टोले चरदै तै लागी दै। तैई तिन्नै दुष्टात्मा यीशु कै विनते कीये,“ मेहरवाने करिय हामा लै इन्ना सुंगरा दी भेज़!” यीशुये बोलो, “ठीक आ, तिन्ना दी भागौ!”

तेखो सें दुष्टात्मा तैवु आदमी कै निकड़ेय तिन्ना सुंगरा दी भागी। सें सुंगर दोड़ेय एक खड़े टीले मैंथे कै सौरा दै छलांग मारे अज़ौ डुवेय मोरे। तैया टोली दी तकरीबन दिया हज़ार सुंगर तै।

तिदै तिन्ना सुंगरे निगराणें करने वाड़े लोग तै। ज़ौबी हुअ द त,ज़ैबी तिन्नै शाऔ तेवी सें ग्रांवा दी भागे। यीशुये ज़ौबी किय द त तिदै तिन्नै सोवी लै बोलो। तैव ग्रांवे लोग निकड़े अज़ौ स आदमी शाऔ ज़ौआ दी दुष्टात्मा लागे द त। स शांती कै, ज़ुड़कै भिडीये त अज़ौ एक बांक्कै आदमी साही बर्ताव करिय बेठो द त।

सें लोग बड़े भारी ड़रै दै तै अज़ौ तिन्नै यीशु लै भागणैं लै बोलो। तेखो यीशु किश्ती दी बेठो। स आदमी ज़ौआ दी दुष्टात्मा लागे दै तै तैवे यीशु सीथी भागणैं विनते कीये।

पर यीशुये तैवु लै बोलो, “नां। मूँ चाहूँ कि तू घरै भागिय सोवी लै बोल कि परमेश्वरे तोईं सीथी खै किय द आ। तिन्ना लै बोल कि कैंणें करे परमेश्वरे तोईं मैंथे दया कीये तै।”

तैई स आदमे भागो अज़ौ सोबी लै एथे बारै दी बोलो ज़ौ यीशुये तैवु लै कियत। तैवी काणें शुंणींय हर एक ज़न हैरान होआ त।

यीशु सौरे दुज़ी बिलै भागो। तैवे तिदै पहुंचणैं बाद, एक बढे भीड़ तैवे आगे कठ्ठै हुये अज़ौ तैवु लै दवाऊंगे लागे। तैया भीड़ा दी एक छैऊड़े तै ज़ुंण बारा बर्षा कै खुनु बैहणें समस्या कै बिमार तै। तेये आपणैं सारे पैसे वैदा लै देनी गेये तै। ताकि सें तैया लै ठीक करे सका, पर तेये बिमारे अज़ौ बी बिगड़े गेये तै।

तेये शुंणों त कि यीशुये केई बीमार लोगा लै ठीक कियो द त अज़ौ स सोचा ती कि, “मुलै पुरौ पतअ आ ज़ै मूँ सिर्फ यीशुये ज़ुड़कै लै छुंऊं, तेखो मूँ बी ठीक होऊं!” तैईं स यीशु पिछै आये अज़ौ तैवे ज़ुड़कै छुंये। ज़ैणें ई तेये स छुंओ, तेयो खुन बैहणों बंद हुओ।

एकीदमा कै, यीशुये ज़ांणो कि तैवु कै शक्ते निकड़े। तैईं तैवे पिछे मुड़िय पुछौ, “मुलै कोरे छुंओ?” चैले ज़वाव देनो,“ इदै एतरे सारै लोग तेरे चारी बिलै भीड़ लाये दै आ, अजौ तोईं लै धाक्को दैंदे लागे दै आ। तेखो तेरे किले पुछौ कि मुलै कोरे छुंओ?”

तेखो स छैऊड़े यीशु आगे काम्बदै अज़ौ डरै दै आपणैं ज़ांनूं मैंथे बैठे। तेखो तेये तैवु लै बोलो कि तेये खै कियो द आ, अज़ौ ज़ौ बी कि स ठीक गेये होये। यीशुये तेया लै बोलो, “तेरे विश्वासे तोईं लै ठीक किय द आ। शांति कै भाग।”