31. यीशु पाणीं मैंथे हांढ़ो

पाँज़ा हज़ारा लोगा लै रोटी खिलाऊंणें बाद, यीशुये आपणैं चैले लै किश्ती दी चढ़ना लै बोलो। तैवे तिन्ना लै सौरे दुज़ी बिलै भागणां लै बोलो। ज़ैबी कि स आप्पू धक घड़ी लै तिदे रूको। अज़ौ चैले भागे अज़ौ यीशुये भीड़ा लै बिदा कियो कि सें आपणैं घरे भागे सका। एथा बाद, यीशु प्रार्थना करना लै एकी धारा मैंथे भागो। तिदै स एकेली त, अज़ौ तैवे राची काफी देरी सेके प्रार्थना किए।

तैवु वक्त, चैले किश्ती लै चलाऊये निंदै तै लागे दै, पर हवा ऊल्टी बिलै बढ़ै ज़ोरा कै चाले दी तै। खास्से राच हुईय बी सें सिर्फ सौरे मांझी पहुंचे तै।

तैवु वक्त यीशुये प्रार्थना खत्म कीये अज़ौ आपणैं चैले बिलै भागणों शुरू कियो। स किश्ती बिलै भागणां लै पाणीं मैंथे हांढदो लागो।

तेखो चैले स शाऔ। सें बड़े भारी ड़रै किल्हैकि तिन्नै सोचो कि कोये भूत आ। यीशु ज़ाणां त कि सें भी डरी गेये तै, तैई तैवे तिन्ना लै आवाज़ लाऐय बोलो, “ड़रौ ना, “मूँये आ!”

तेखो पतरसे यीशु लै बोलो, “ओ प्रभु, ज़ै तू आ तै मुलै पाणीं मैंथे हांढिय तोईं आगे आणेंय हुकम दै।” यीशुये पतरसा लै बोलो, “आ!”

तेखो पतरस किश्ती कै ऊतरो अज़ौ यीशु बिलै भागणां लै पाणीं मैंथे हांढदो लागो । पर धकै आगे भागणें बाद, तैवे आपणीं आखी यीशु कै फैरी अज़ौ पाणीये लेहरा लै शांदो लागो अज़ौ तेज़ हवा लै मेहसूस करदो लागो।

तेखो पतरस डरो अज़ौ स पाणीं दी डुबदो लागो। तैवे हाक्के मारी, “औ प्रभु, मुलै बचाऊ!” यीशुये तैवी वक्ता दी हाथ आगे करिये स पाकड़ो। तेखो तैवे पतरसा लै बोलो,“ तेरो विश्वास खास्सो कम आ! तोईं लै बचावेय थोणां लै तेरे मूंईं मैंथे भरोसो किल्है ना कियो?”

तेखो यीशु अज़ौ पतरस किश्ती मैंथे चढ़े, अज़ौ तेवीये हवा चालन्ने बंद हुये। पाणीं शांत हुओ। चैले हैरान हऐय यीशु आगे ज़ांनूं मैंथे बेठे। तिन्नै तैवे अराधना कीये अज़ौ तैव लै बोलो, “सची लै तू परमेश्वरो भाऊ आ।”