30. यीशु पांज़ हज़ार लोग लै रोटी खिलावा

यीशुये आपणैं प्रेरिता लै प्रचार करने अज़ौ लोगा लै शिक्षा देणां लै सारै अलग-अलग ग्रांवा लै भेज़ो। ज़ैबी सें तिदे आये ज़िदे यीशु त, तेखो तिन्नै बोलो कि तिन्नै खै-खै कियो त। तेखो यीशुये तिन्ना लै सौरे दुज़ी बिलै तैवु सीथी एक शान्त ज़ागा दी भागेय कुछ वक्त आराम करना लै बैदो। तेखो सें किश्ती दी बेठे, अज़ौ सौरे दुज़ी बिलै भागे।

पर तिदे बड़े भारी लोग तै, ज़ौरे यीशु अज़ौ चैले लै किश्ती दी भागदी बैरे शाऔ द त। ऐणों ज़ाणिय लोग बी दुज़ी बिलै भागणां लै सौरे कुंणें दी पैदल दौड़ेय अज़ौ तिन्ना कै पैहले पहुंचे। ज़ैबी यीशु अज़ौ तैवे चैले पहुंचे तैवी इन्ना लोगो एक बड़ै भीड़ तै तिन्ना पोखेय तिदै पैहले कै तै।

तेया भीड़ा मांझी छैऊड़ी अज़ौ छोटू छाड़ेय पाँज़ हज़ार कै ज़्यादै मर्द तै। यीशुये तिन्ना लोगा मैंथे रैहम खाओ। किल्हैकि यीशु लै सें लोग तिन्ना भेड़े साही लागा तै, ज़ौरो कोई फुवाल ना होआ। तैईं तैवे तिन्ना लै शिक्षा देने अज़ौ तिन्ना मांझी ज़ुंण बीमार तै सें ठीक किये।

बैड़कै वक्ता दी, चैले यीशु लै बोलो, “एबे बैरूवे गेयो अज़ौ ओरै-पौरे कोये ग्रांव बी नेईंया। इन्ना लोगा लै भागड़े दै ताकी ज़ै लोग आप्पू लै भागय कुछ खाणेंय इन्तज़ाम करी सका।”

पर यीशुये चैले लै बोलो,“ तुमा इन्ना लै खाणां लै कुछ दैयो!” तिन्नै ज़वाव देनो, “हामे ऐणों ना करी सकी? हामा आगे सिर्फ पाँज़ रोटी अज़ौ दी माच्छली आ।”

यीशुये आपणैं चैले लै बोलो कि सें तिन्ना लोगी भीड़आ लै, खोड़ू मैंथे पचासे-पचासी टोली दी बैठणें लै बोलो।

तेखो यीशुये पाँज़ रोटी अज़ौ दी माच्छली लै चुगेय स्वर्गा बिलै शाऔ। अज़ौ तिन्ना रोटी लै परमेश्वरे शुकर कियो।

अज़ौ यीशुये रोटी चोड़ेय चैले लै देई लाई कि सें लोगा लै बांटा, अज़ौ सें दि माच्छली बी तिन्ना सोबी मांझी बाटां। चैले तिन्ना रोटी लै बांटदे रोये, अज़ौ स केबी खत्म ना हुओ। सें सब लोग खाएय रज़ै।

तेथा बाद, चैले बचै दै टुकड़ै लै कठ्ठै कियो ज़ुंण खाये दै नेईं तै अज़ौ तिन्नै रोटीये टुकड़े दै भरी दी बारा टोकरी चुंगी। ज़ैं सारी रोटी तिन्ना पांज़ रोटी अज़ौ दीया माच्छली कै आई दी ती।