29. निर्देयी नौकरे कांड़ै

एक दिन, पतरसे यीशु कै पुछौ, “औ प्रभु, ज़ैबी मेरे खलाफ पाप करा, तै मुलै आपणैं भाई लै केती बैरे माफ करनो चैईं? खै साता बैरे तैईं? यीशुये बोलो, “साता बैरे तैईं ना आती, पर साता कै सत्तर बैरे सेके!” एथा कै यीशुयो मतलव आ कि हामा लै सदा ही माफ करनो चैईं । तेखो यीशुये ज़ौ कथा बोले।

यीशुये बोलो, “परमेश्वरे राज़ कुछ ऐणों आ। एक राज़ो आपणैं नौकरा कै हिसाब किताब लैणं चा त। तैवो एक नौकर पैसे दस हज़ार थोली एक बड़े कर्ज़ेअ कर्ज़दार त।”

पर स नौकर आपणैं कर्ज़े लै भुगतै ना सको, तैई राज़े बोलो, “एवो कर्ज़ भुगतणैं लै ऐऊ मर्दा लै अज़ौ एवे टबरा लै गुलामे साही बेचो।”

“तैवु नौकरे राज़े आगे ज़ानूं मैथे बेठिय बोलो, ‘कृपा करेय मूंई सीथी सब्र थौ अज़ौ मूँ आपणैं कर्जे पूरी रकमो भुगता करूं।’ राज़े नौकरा मैथे दया कीये, तैई तैवे सारै कर्जे लै माफ कियो अज़ौ स भागणैं देनो।”

“पर ज़ैबी स नौकर राज़े आगे कै बैहरे भागौ, तेखो तैवु लै एक साथे नौकर मिलो, ज़ुंण तैवे धक्क ज़ैंअ पैसेअ कर्ज़दार त। तैवु नौकरे आपणैं साथी नौकर लै पाकड़ो अज़ौ बोलो,‘ज़ुंण तोईं मैथे मेरो कर्ज़ो आ मेरे स चैईं!”

“तैवु साथी नौकरे ज़ानूं मैथे बैठेए बोलो, ‘मूंई सीथी सब्र थौ, अज़ौ मूँ आपणैं कर्जे पूरी रकमो भुगतान करूँ।’ पर एथे ज़ागा दी, तैवु नौकरे आपणैं साथी नौकरा लै कैद खाने दी डालो, ज़ैबी सेके कि स तैवुये कर्ज़ेय भुगतान ना करा।”

कुछ दुज़ै नौकरे ज़ौ बी हुय द त तैवु लै शायेय खास्से हैरान हुये। सें राज़े बिलै भागे अज़ौ तैऊ लै सब कुछ बोलो।”

“राज़े तैवु नौकरा लै बैदेय बोलो, ‘औ दुष्ट नौकर! मेरे तेरे कर्ज़ा लै तेईं माफ कियो, किल्हैकि तेरे मुईं कै बिनते कीये तै। तोईं लै बी ऐणों ही करनो चैईं त।’ तेखो राज़ो एतरो गुस्सो हुअ कि तैवे स दुष्ट नौकर कैदखाने दी डालो ज़ैबी सेके स आपणैं सारै कर्ज़े लै ना भुगता।”

तेखो यीशुये बोलो, “मेरो स्वर्गीय बाप्पू ज़ै तुमा आपणैं भाई लै आपणें दिला कै माफ ना करा, तै मेरो स्वर्गीय बाप्पू तुमा मांझी कै सोबी सीथी ऐणों ही करा।”