28. ज़वान सेठ राज़ करने वाड़ो

एक दिन, एक ज़वान सेठ राज़ करने वाड़े यहूदी अगुवे यीशु आगे आयेय तैवु कै पुछो, औ उत्तम गुरू, सदा रोणैं वाड़ै ज़िंदगी पाणां लै मुलै खै करनो चैईं?” यीशुये तैऊ लै बोलो, “तू मुलै ‘उत्तम’ किऊ लै बोला? सिर्फ एके उत्तम आ अज़ौ स परमेश्वर आ। पर ज़ै तू सदा रोंणैं वाड़ी ज़िंदगी पाणों चाह, तै तू परमेश्वरे कानूना लै मान।”

तैवे यीशु कै पुछो “मुलै कुंण कुंण ज़ैं हुकम मानणे ज़रूरै आ?” यीशुये ज़वाब देनो, “खून ना करनअ, व्यभिचार ना करनअ। चोरे ना करने। झूठ ना बोलणो। आपणैं आम्मा- बाप्पूये इज्जत करने अज़ौ आपणैं पड़ोसी कै आप्पू ज़ैंओ प्यार थोणौ।”

पर तैवु ज़वान मर्दे बोलो,“ मूँ ओछनी बैरे कै ही इन्ना सबी हुकमा लै मानद लागोद आ। मुलै सदा लै ज़िंवदै रोंणा लै अज़ौ बी खै करने ज़रूरत आ?” यीशुये स शाऔ अज़ौ तैवु कै प्यार कियो।

तेखो यीशुये ज़वाब देनो,“ज़ै तू सिद्ध हंणों चा तै भागय आपणों सब कुछ बेच़ अज़ौ तिन्ना पैसे गरीबा मांझी बांट, अज़ौ तौईं लै स्वर्गा दी पैसे मिला। तेखो आयेय मूँ पिछै हो।”

ज़ेबी तैवु ज़वान मर्दे यीशुई बाते शुंणीं तेखो स खास्सो नराज़ हुओ, किल्हैकि स बड़ो सेठ त अज़ौ आपणीं सारी ज़ैयदाद लै देड़ो ना चा त। स मुड़ेय यीशु आगे कै भागो।

तेखो यीशुये आपणैं चेले लै बोलो, “सेठा आदमी लै परमेश्वरे राज़ा दी भागणो आ सबी कै कठण! हाँ, एक सेठ मर्दो परमेश्वरे राज़ा दी भागणये ज़ागा दी कोई ऊंटो सिंऊणींये मुंड़ा कै होय निकड़नो आसान आ।”

ज़ैबी चैले यीशुये बाते शुंणीं, तेखो सें हैरान हुये। तिन्नै बोलो,“ ज़ै ऐणों आ तै परमेश्वर कोआ लै बचाऊवा?”

यीशुये आपणैं चैले लै शाऔ अज़ौ बोलो, “लोगा आप्पू लै ना बचाऊवे सका। ऐणों करनो नामुमकिन आ। पर परमेश्वरा लै कुछ बी नामुमकिन नेईं आ।”

पतरसे यीशु लै बोलो, “हामा ज़ुंण तेरे चैले आ, आपणो सब कुछ छाड़ीय तोईं पिछे आये दै आ। तेखो हामा लै खै मिलणों?”

यीशुये ज़वाब देनो, “हर एक ज़न जौरे मुंईं तैईं घर,भाऐ, बैंण,बाप्पू, आम्मा, छोटू या ज़ैयदाता लै छाड़ो द आ, स तेथा कै शौ गुणां पाआ अज़ौ सदा रोणैं वाड़े ज़िदगे पाआ। पर ऐवु वक्ता दी सारै लोग आप्पू लै बड़े समझा, सें लोग परमेश्वरे नज़रा दी छोटे हंणें। अज़ौ ज़ौआ लै एऊ वक्ता दी संसार छोटो समझा, सें लोग परमेश्वरे नज़रा दी बड़े होंणें।”