27. दयालु सामरीये कांड़ै

एक दिन, मूसे कानूना लै शकैऊंणें वाड़ो यीशु बिलै आऔ। स सवी लै दिखाऊणों चा त कि यीशु गलत रीति कै शकैवदो लागो द आ। तैई तैवे बोलो, “औ गुरू, सदा रोणें वाड़ी ज़िंदगे पाणैं तैई मूँ खै करूं? यीशुये बोलो” मूसे कानूना दी ज़ुंण परमेश्वरे देने दै आ, तेथा दी खै लिखो द आ?”

तैवु आदमीये ज़बाब देनो, “तेथा दी ऐणों लिखो द आ कि, तू आपणैं परमेश्वरा कै सारै मन, प्राण, ताकत, अज़ौ अक्ली कै प्यार थौ।” अज़ौ आपणें पड़ोसी कै आप्पू साही प्यार कर।” यीशुये ज़वाब देनो, “तेरे ठीक बोलो! ज़ै तू ऐणों करा, तैईं तोले सदा रोणें वाड़ै ज़िंदगे मिलणें।”

पर स कानूनो ज़ाणकार लोगा लै दिखाऊंणो चाहा त कि तैवे ज़िंऊणें तरीको ठीक त। तैईं तैवे यीशु कै पुछो, “ठीक आ, तै मेरो पड़ोसे कुंण आ?”

यीशुये तैवु कानूने ज़ांणकारा लै कणें सुनावेय ज़वाव दैनो। “एक यहूदी आदमी त ज़ुंण एकी सड़की कै होय यरूशलेम नगरा कै यरीहो नगरी लै भागदो त लागो द।”

“पर कुछ ड़ाकूये स शाऔ अज़ौ तैवु मैंथे हामलो कियो। तिन्नै तैवो सब कुछ निंयो अज़ौ तिन्नै स मारो पिटो अज़ौ अधमरो करेय छाड़ो।”

“तेथा बाद, एक यहूदी पुरोहित तेया सड़की कै भागौ। तैवु पुरोहिते स आदमे सड़की दी पड़दो शाऔ। ज़ैबी तैवे स शाऔ तेखो स सड़कीये दुज़ी बिलै भागेय आगे नीकड़ो। तैवे स आदमी ना शाअद ज़ैंओ कियो।”

“ऐथे कुछ ही बक्ता बाद, एक लेवे तेया सड़की दी आऔ। (लेवे यहूदियो एक गोत्र त ज़ुंण मांदरा दी पुरोहिते मदद करा तै।) तैवु लेवीये बी स अधमुंये पड़े दै आदमी लै शाऔ अज़ौ शाऐय सड़कीये दुज़ी बिला कै निकड़ो। तैवे वी स आदमी ना शाऔ द ज़ैंओ कियो।”

“आगलो आदमे ज़ुंण तेया सड़की दी आऔ स सामरीयो देशो एक मर्द त। (सामरी लोग अज़ौ यहूदी लोग एकी दुज़ै कै नफरत करा तै।) तेखो बी तैवु सामरी आदमीये ज़ैबी सड़की दी पड़े दै। तैवु यहूदी आदमी लै शाऔ, तैवु दिल घिंणां कै भारूओ। तेखो स तैवु आदमी बिढ़ै आऔ अज़ौ तैवे ज़ख्मा दी पाटी बानीं।”

“तेखो तैवु सामरी आदमीये स आदमे आपणैं गाधे मैंथे पाओ अज़ौ स तेया सड़की कै एक आश्रमा लै निंयो। ज़िदै तैवे निगराणीं किये लाये।”

दुज़ै दिन, तैवु सामरी लै आपणैं सफरा दी भागणों त। तैवुये आश्रमे मालका लै कुछ पैसे दैने। तैवे तैवु लै बोलो, “ऐवु आदमीये निगराणे करे। ज़ै इन्ना पैसे कै ज्यादो अज़ौ खर्चो होआ तै वापस आन्दी बैरे मूँ तेरे इन्ना खर्चेयो बी हिसाब दैऊं।”

तेखो यीशुये कानूने ज़ांणकारा कै पुछो, “कि तू खै सोचा? इन्ना चन्ना आदमी मांझी कै तैवु आदमीये पड़ोसी कुंण आ ज़ौआ लै लुटो अज़ौ मारो द त?” तैवुये ज़वाव दैनो, “सोये ज़ौरे तैवे मैंथे घिंण कीये।” तेखो यीशुये तैवु लै बोलो, “तू बी भागीये ऐणों ही कर।”