26. यीशु आपणीं सेवा शुरू करा

शैताने परखड़े कै मना करने बाद, यीशु वापस गलील ग्रावां लै आवौ। ज़ौ स ही ज़ागा तै ज़िदै यीशु रोहा त। पवित्र आत्मा तैवु लै खास्सी ताकत देंदो त लागो द। अज़ौ यीशु एकी ज़ागा कै दुज़ी ज़ागा, लोगा लै शिक्षा देणें लै भागा त। सब तैवे बारै दी बढ़िया बाते बोला तै।

तेखो यीशु नासरत ग्रांवा लै भागो। ज़ैई स औच्छड़ो त, तेवी स ऐवी ग्रांवा दी रोहा त। सब्ते दिना दी, स अराधना करने वाड़ी ज़ागा दी भागो। अगुवे तैवु लै यशायाह परमेश्वरे ज़ांणकारे संदेशे एक कताब देने। सें चाहा तै कि स तैया कताबा कै पढ़ा। तेखो यीशुये तैया कताबा लै खोलिये तेथे एक पाठा लै लोगा तैईं पढ़ो।

यीशुये ऐणों पढ़ो, “परमेश्वरे मुलै आपणैं आत्मा देने दै आ ताकि मूँ कंगाड़ लै बाक्कैं खबरो प्रचार करे सकूँ। तैवे मूँ, तैईं भेज़ो द आ, की मूँ, कैदी लै आज़ाद करूँ, आंधे लै दवारा कै शाणैं ज़ोगे बड़ाऊं, अज़ौ तिन्ना लै ज़ौआ लै दुज़ै लोग दवांऊ दै लागे दै तै तिन्ना लै छुटकारो देऊं। ज़ौ स ही बक्त, आ ज़ैबी परमेश्वर हामा मैथे मेहरवाने करा अज़ौ म्हारे मदद करा।”

तेखो यीशु बैठो। सब लोग तैवु लै बढ़े गौरै कै शांदै तै लागे दै। सें ज़ाणां तै कि पवित्र शास्रो ज़ुंण पाठ तैवे ऐबी पढ़ो त स मसीहे बारै दी त। यीशुये बोलो, “ज़ुंण बाते मेरे एबी तुमा आगे पढ़ी, ज़ै आज़- कालै होन्दी लागी दी आ।” सब लोग हैरान तै। तिन्नै बोलो, “खै ज़ौ युसूफो भाऊ नेईं आ?”

तेखो यीशुये बोलो, “ज़ौ बात सच आ कि लोग ऐणें परमेश्वरे ज़ांणकारा लै केबी ना माना ज़ुंण तिन्नै ग्रावां दी पाड़ोद अज़ौ बढ़ो हुऔ द होआ। एलिय्याह परमेश्वरे ज़ांणकारे वक्ता दी, ज़ैबी साढ़ै चन्ना बर्षा सेके पाणीं ना पड़ो तेबी इस्राएला दी सारी बिधवा ती। पर परमेश्वरे एलिय्याहा लै इस्राएलीये कोये विधवे मदद करने ना भेजौ। एथे ज़ागा दी ,तैवे एलिय्याह लै कोये दुज़ै विधवा आगे भेज़ौ।”

यीशु बोलदो रहो लागी, “अज़ौ एलीशा परमेश्वरे ज़ांणकारे वक्ता दी, इस्राएला दी सारे लोगा दी चामड़ीये बिमारे तै। पर एलीशे तिन्ना मांझी कै कोए ठीक ना कियौ। तैवे सिर्फ इस्राएले दुश्मने सेनापती नामान लै ठीक कियो। जुंण लोग यीशु लै शुंणदै तै लागेदे सें यहूदी तै। तैई ज़ैवी तिन्नै स ऐणों बोलदी बैरी शुंणों तैवी सें तैवु मैंथे गुस्से हुये।

नासरते लोगे यीशु पाकड़ो अज़ौ अराधना करने वाड़ी ज़ागा कै घसीटैए बैहरे गाढ़ो। अज़ौ तिन्नै स ढोड़ै धारा मैंथे निंयौ, ताकी सें तैवु लै तिदै कै ऊंधी फैंकिय मारे सका। पर यीशु भीड़ा मांझी कै निकड़ीए अज़ौ नासरत ग्रांवा कै छाड़ेय भागो।

तेखो यीशु सारे गलील ग्रावां दी भागो, अज़ौ एक बड़े भीड़ तैवु बिलै आई। सें ऐणैं, सारे लोगा लै पाय आये ज़ुंण बिमार अज़ौ अपंग तै। तिन्ना मांझी कै कुछ आंधे तै, अज़ौ कुछ दुज़ै लांगड़े, टुण्डे या लाट्टै तै। यीशु सें ठीक किये।

ऐथा कै अलावा, सारै ऐणैं लोग यीशु बिलै आणैं ज़ौ दी भूत-प्रेत तै। यीशुये भूत-प्रेता लै तिन्ना कै निकड़नेओ हुकम देनो। तिन्ना भूत-प्रेते ज़्यादा करै हाक्का मारी, “तू परमेश्वरो भाऊ आ!” भीड़े लोग हैरान तै, अज़ौ तिन्नै परमेश्वरे ज़य ज़यकार कीये।

तेखो यीशुये आपणैं चैले मांझी कै बारा मर्द छांटे कि सें तैवे खास दर्शाऊणें वाड़े बणें। तैवे तिन्ना लै “प्रेरित” बोलो। ज़ै प्रेरित तैवु सीथी हांढ़ा तै अज़ौ तैवु कै शिखिया तै।