25. शैताने यीशु लै परखो

यीशुये बपतिस्मा हंणैं कै बाद तैबी, पवित्र आत्मे स ज़ांगला लै निंयो। यीशु तिदेय चाड़ी दिन अज़ौ चाड़ी राची त। तैवु वक्त यीशुये व्रत कियो, अज़ौ शैतान यिशु बिढै आऐये तैवु कै पाप करावणं लै स परखो।

पैहले, शैताने बोलो, “ज़ै तू परमेश्वरो भाऊ आ तै इन्ना ढोड़ा लै रोटी बडाव ताकि तू खाये सका!”

पर यीशुये शैतान लै बोलो, “परमेश्वरे वचन दी ज़ौ लिखो द आ, ‘ज़िंऊंदे रोणें तैईं आदमी लै सिर्फ रोटीये ज़रूरत नेईं, पर तिन्ना लै हर एक बाते ज़रुरत आ ज़ौ परमेश्वरे तिन्ना लै बोला!’”

तेखो शैतान यीशु लै मांदरै सवी कै ऊष्टै सिरे दी निंओ। तैवुये यीशु लै बोलो, “ज़ै तू परमेश्वरो भाऊ आ तै तू इदा कै हून्दी छलांग मार, किल्हैकि लिखो द आ, ‘परमेश्वरे तोले ऊठाऊणें लै आपणैं स्वर्ग दूता लै हुकम देया कि तेरी टांगा लै ढोड़ा कै ठोकर ना लागा।’”

पर यीशुये तैणों ना कियो ज़ौ शैताने तैवु लै करना लै बोलो द त। ऐथे बज़ाये, तैवुये बोलो, “परमेश्वर सोवी लै बोला, ‘कि तू आपणैं प्रभु परमेश्वरा लै ना परख।’”

तेखो शैताने यीशु लै संसारै सारे देश दिखाऊवे। तैवुये यीशु लै दिखाऊव कि सें केतरे शक्ती वाड़ै तै अज़ौ केतरे परीपूर्ण तै। तैवुये यीशु लै बोलो, “मूँ तोले ऐऊ सब देऊं ज़ै तू ज़ानू मैथे वेठियो मेरी आराधना करा।”

यीशुये ज़वाब देनो, “ओ शैताना, मूँई कै दूर भाग! परमेश्वरे वचना दी स लोगा लै हुकम देया। सिर्फ आपणैं प्रभू परमेश्वरे भक्ते करा। परमेश्वरे रूपा दी सिर्फ तैवुये इज्ज़त कर।’”

यीशुये शैताने परखणें कै बी ना फसौ, तैईं शैतान तैवु आगे कै भागो। तेखो स्वर्गदूत आईयो यीशुये सेवा टहल करदे लागे।