24. यूहन्ना यीशु लै बपतिस्मा देया

एलीशिबा अज़ौ जकर्याह भाऊ यहन्ना बढ़े हुएये एक परमेश्वरो ज़ाणकार बणों। स ज़ांगला दी रोआ त, अज़ौ ज़ांगली मों अज़ौ थाड़े खा त अज़ौ ऊंटे चामड़े कै बणें दे ज़ुड़कै भिड़ा त।

बड़े भारी लोग यहून्नी बाते शुंणना लै ज़ांगला दी आये। तैवुये ऐणं प्रचार कीयो, “पश्चतावा,किल्हैकि स्वर्ग राज़ बिढै आ!”

ज़ैबी लोगे यूहन्नो प्रचार शुंणों, तेबी तिन्ना मांझी सारै आदमीये आपणैं पापा कै पश्चतावे, अज़ौ यहून्नै तिन्ना लै बपतिस्मा देनो। यूहन्ना लै शान्दे धर्मी अगुवे बी आये, पर तिन्नै आपणैं पाप ना माने अज़ौ पश्ताव ना कियो।

यूहन्ने धर्मी अगुवे लै बोलो, “ओ ज़हरीले सापो! पश्तावो करो अज़ौ आपणैं बर्ताव लै बदलो। परमेश्वर तैवु हर एक बूटा लै काटा ज़ुंण बांको ना फड़ा, अज़ौ स तिन्ना लै आगी दी फैंका।” ज़ौ परमेश्वरे ज़ाणंकारे बोलो द त स यूहन्नै पूरो कियो, “शाऐ, स्ताबीऐ मूँ तोईं कै आगे आपणैं संन्देशे देणें वाड़ै लै भेजू ज़ुंण तोईं लै पेंढअ बढ़ावा।”

कुछ धर्मी अगुवे युहन्ना कै पुछो की खै सोऐ मसीह आ। यहून्ने ज़बाव देनो, “मूँ मसीह नेई, पर स मूँ बाद आन्दो लागदो आ। स एतरो महान आ की मूँ तेवे लाटे तस्मे खोलणें लायक वी नेई आ।”

दुज़ै दिन, यीशु बपतिस्मा लैंड़े लै यूहन्ना बिलै आवो। ज़ैवी यूहन्ने स शाओ, तेवी तेवे बोलो, “शाऔ! परमेश्वरे चैलटू ज़ुंण संसारे पापा लै चुंगीओ निंया।”

यूहन्नै यीशु लै बोलो, “मूँ तल्ले बपतिस्मा देड़े लायक नेईया। ऐथे बज़ाये कै ज़रूरे आ की तू मुलै बपतिस्मा दै।” पर यीशुये बोलो, “तोले मुईं लै वपतिस्मा देणों चैईं, किल्हैकि करने लै बांको काम ज़ोई आ।” तेखो यहून्ने तैवु लै बपतिस्मा देनो, ज़ेबी की यीशुये कोई बी पाप नेईं त कीयो द।

बपतिस्मा लैणें बाद, ज़ैबी यीशु पाणीं कै बैरे निकड़ो, तेबी परमेश्वरे आत्मा कबूतरे रूपा दी प्रकट हुई अज़ौ हून्दी आएय तैवु मैंथे बेठी, तैवु वक्त दी परमेश्वरे स्वर्गा कै बात कीये। परमेश्वरे बोलो, “तू मेरो भाऊ आ, मूँ तौईं कै प्यार करूं, मूँ तौईं कै बढ़ो खुश आ।”

परमेश्वरे यूहन्ना लै बोलो द त, “पवित्र आत्मा हुन्दी आएय कई मैंथे बेठा, ज़ोआ लै तू वपतिस्मा देया। स ही परमेश्वरो भाऊ आ।” परमेश्वर एके ई आ। पर ज़ेबी यहून्ने यीशु लै बपतिस्मा देनो, तेबी तेवै बाप्पू परमेश्वरा लै बाते करदी बैरे शुणों, भाऊ परमेश्वरा लै शाऔ, ज़ुंण की यीशु आ, अज़ौ तेवे पवित्र आत्मा लै शाऔ।