23. यीशुओ ज़न्म

यूसुफ नांवे एकी धर्मे आदमी सीथी मरियमे सगाई हुई दै तै। ज़ैबी तेवे शुंणों कि मरियम सकोड़ी लागदी आ। तैबी स ज़ाणां त कि स तैवओ छोटू नेईं आ। पर स मरियमा लै बदनाम न करनो चाहा त, तैई तैवुये तेया मैथे दया की अज़ौ तेया लै च़ौरिये तलाक देणे बारै दी सचो। पर एता कै पैहले कि स एंणो करा त, स्वर्गदूते तैवुये सुपने दी आईयो तैवु कै बात कीये।

तैवु स्वर्गदूते बोलो, “ओ यूसुफ, मरियमा लै आपणैं लाड़ी बणांऊड़ा लै ना ड़रे। तेये पेटा दी ज़ुंण भाऊ आ, स पवित्र आत्मा बिला कै आ। स एकी भाऊ लै ज़न्म देया। तैवुवो नांव यीशु थोये (ज़ेथो मतलब आ ‘यहोवा बचावा’) किल्हैकि स लोगा लै तिन्नै पापा कै बचाऊवा।”

तेखो यूसुफे मरियमा कै ब्याह कियो अज़ौ स आपणीं लाड़ीये बढाऊवेय घरा लै आणीं। पर तेये छोटू लै ज़न्म दैंदी सेके स तैया आगे ना सुत्तो।

ज़ैबी मरियमो सकोड़ीओ वक्त आओ, तैवी तेये अज़ौ यूसुफे बेहतलमो लै एक लाम्बो सफर कियो। तिन्ना लै तिदै भागड़ो ही ज़ा त किल्हैकि रोमी मुलाज़मे इस्राएला दी रोहणें वाड़े सबी लोगे गिन्नते करनी चाहा तै। सें चाहा तै कि सब लोग तिदै भागे ज़िदे तिन्नै पुरख रआ तै। राज़ा दाऊदे ज़न्म बैतलमा दी हुओ द त। अज़ौ स मरियम अज़ौ यूसुफ दीगीय पुरख त।

मरियम अज़ौ यूसुफ बैतलहम नगरी लै भागे, पर तिदै ज़ानबरा लै थोड़े वाड़ी ज़ागा कै अलावा तिन्ना लै रोणां लै कोई ज़ागा ना मिली। स ई ज़ागा ती जिदी मरियमे आपणैं भाऊ लै ज़न्म देनो। तैको स खरला दी थोओ किल्हैकि तैवु लै बिस्तर नेईं त। तिन्नै तैवुवो नांव यीशु थोओ।

तेया राची, तिदी बिदढ़ै ही फुआल आपणीं भेड़ी टोली लै सभाड़ा तै। एकीदमा कै, एक चमीलो स्वर्गदूत तिन्ना मैंथे प्रकट हुओ,अज़ौ सें डरे। तैवु स्वर्गदूते बोलो, “ना डरो, किल्हैकि तुमा लै एक शुभ संदेश आ। बैतलहमा दी, मसीह मालको ज़न्म हुओ द आ!”

तिदै भागेयो तैवु भाऊ लै लोड़ो, तुम्हां लै स भाऊ ज़ुड़कै दी लपेटो द अज़ौ खरल दी सुत्तो द मिला।” एकीदमा कै सरग, स्वर्गदूता कै भारूओ। सें परमेश्वरे ज़य ज़यकार करदै तै लागे दै। तिन्नै बोलो, “सारी महीमा स्वर्गा दी रहणैं वाड़ै परमेश्वरा लै मिलणें चैईं। पृथुवी दी तिन्ना लोगा लै शांते चैईं मिलै, ज़ौआ मैंथे स अनुग्रह करा।!”

तेखो स्वर्गदूत भागे। सें फुआल बी आपणीं भेड़ा लै छाड़ीयो तैवु भाऊ लै शांदे भागे। स्तावी सें तैया ज़ागा दी पहुंचै ज़िदे यीशु त, अज़ौ तिन्ना लै स खरला दी सुत्तो द मिलो, ज़ैणों कि स्वर्गदूते बोलो द त। सें बड़े खुश तै। तेखो सें फुआल वापस तिदै भागे ज़िदे तिन्नी भेड़े ती। तिन्नै ज़ो कुछ बी शुंणो अज़ौ शाओ तेथा सबी लै सें परमेश्वरे जय जयकार तै करदे लागे दै।

पूर्वा दी दूर देशा दी कुछ मर्द तै। सें तारे गड़ना करा तै अज़ौ सें बड़े समझकार तै। तिन्नै एक नोखो तारे सरगा दी शाओ। तिन्ने बोलो कि एथो मतलव आ कि यहूदीय एकी नोवे राज़ेय ज़न्म हुअ दआ। तिन्नै भाऊ लै शाणां लै आपणैं देशा कै सफर करनेओ फैसलो लेओ। एकी लाम्बे सफरा बाद सें बैतलहम पहुंचै अज़ौ स घर शाऔ ज़िदे यीशु अज़ौ तैवुये आम्मा बाप्पू रहा तै।

ज़ैबी इन्ना मर्दे यीशु लै आपणीं आम्मा सीथी शाओ। तिन्नै ज़ानु मैंथे बैठियो तैवुये भगती की। तिन्नै यीशु लै मैहंगे तोफे देने, तेखो सें वापस भागे।