22. यूहन्नो पैदा हंणों

पुराणैं ज़माने दी, परमेश्वरे आपणैं परमेश्वरे ज़ांणकार कै बात किये तै ताकि सें तैवुये लोगा कै बात करी सका। तेखो चार सौ बर्षा सेके मौन वक्त आओ ज़ैता दी परमेश्वरे आपणैं लोगा कै बात ना कीये। तेखो परमैश्वरे ज़कर्याह नांवे पुरोहिता बिलै एक स्वर्गदूता लै भेज़ो। जकर्याह अज़ौ तैवुये लाड़ी एलीशिबा परमेश्वरे इज़्जत करा तै। सें काफी बुढ़ड़े गेये तै हई, अज़ौ तिन्नै कोई लवाद नेई तै।

स्वर्ग दूते जकर्याह लै बोलो, “तेरी लाड़ीये एक भाऊ पैदा हआ। तू तैवुओ नांवे यहून्ना थोओ। परमेश्वर तैवु लै पवित्र आत्मा कै भरा, अज़ौ यहून्ना लोगा लै मसीह लै ग्रहण करना लै तैयार करा।” जकर्याहे ज़बाब देनो, “मूँ अज़ौ मेरे लाड़े लवाद पैदा करना लै सारे बुढ़ड़े आ! मूँ केंणे केरे ज़ाणूं कि तुमा मुलै सच्च लागेदे बोलदे?”

तैवु स्वर्गदूते जकर्याह लै ज़बाब देनो, “तोईं आगे मूँ एऊ शुभसंदेशो दैणां लै भेज़ो द आ। किल्हैकि तेरे मुंई मैंथे विश्वास ना कियो, तैई तू छोटूये पैदा हंणैं सेके तू बोले ना सका।” एकीदमा कै जकर्याह बोलणें दी असमर्थ हुओ। तेखो सह स्वर्गदूत जकर्याह आगे कै भागो। तेथा बाद, जकर्याह घरे आओ अज़ौ तैवुये लाड़े सकोड़ी लागदे हुई।

ज़ैबी एलीशिबे छ: महीने त, तेखो स ही स्वर्गदूत अचानक एलीशिवे रिश्तेदार आगे प्रकट हुओ, ज़ोरो नांव मरियम त। मरियम कुंवारी ती अज़ौ ब्याह हंणैं लै यूसुफ नांवे एकी आदमी सीथी तेये सगाई हुई दी ती। स्वर्गदूते बोलो, “तेरी सकोड़ लागा अज़ौ एक तोईं कै एक भाऊ हआ। तू तैवुओ नांव यीशु थोये। स सर्व शक्तिमान परमेश्वरो भाऊ हआ अज़ौ स सदा लै राज़ करा।”

मरियमे ज़बाब दैनो, “ज़ो केणें करे होआ, किल्हैकि मूँ ता कुंवारी आ?” स्वर्गदूते स समझाऊवे, “पवित्र आत्मा तोईं मैथे आ, अज़ौ परमेश्वरे शक्ते तोईं दी छाया करा। तैई स भाऊ पवित्र होआ अज़ौ स परमेश्वरो भाऊ होआ।” ज़ैती बी तैवु स्वर्ग दूते बोलो मरियमे तैवु मैंथे विश्वास कियो।”

एथे एकी एकीदमा बाद कै, मरियम भागेय एलीशिबा कै मिले। ज़ैणें ही मरियमे तेया लै नमस्ते कीये, एलीशिबो भाऊ तेये पेटा दी ऊछड़ो। तिन्ना लै परमेश्वरे ज़ौ बी कियो त तेथे बारै दी सें छैऊड़ी बड़ी खुशी हुई। एलिशिवा सीथी चना मीने रणें बाद, मरियम घरे भागे।

ऐथा बाद, एलीशिबे आपणैं भाऊ लै ज़न्म देनो। जकर्याह अज़ौ एलिशिबे तैवु भाऊओ नांव यूहन्ना थोऔ, ज़ैणों स्वर्गदूते आदेश देनो द त। तेखो परमेश्वरे ज़कर्याह लै चपड़ने लायक बडाऊवो। जकर्याहे बोलो, “परमेश्वरे ज़य ज़यकार हो किल्हैकि तैवुये आपणैं लोगा लै मदद करना लै याद थौआ! औ मेरे भाऊ, तू सर्व शक्तिमान परमेश्वरो ज़ांणकार हंणों। तू लोगा लै बोला कि केणें करे तिन्ना लै आपणैं पापा कै माफी मिला!”