21. परमेश्वरे मसीहे सोह खाये

ज़ैबी परमेश्वरे संसार बणाऊवो त, स ज़ांणां त कि तैवु लै बादा कै कोई दिन मसीहा लै भेज़णों ज़ा। तैवुये आदम अज़ौ हव्वा कै सोह खाये तै कि स ऐणों करा। तैवे बोलो कि हव्वा कै एक वंशज़ ज़न्म लेया ज़ुंण सापे मुंड़ा लै फैचा। निसन्देह स शैतान त ज़ोरे सापे रूपा दी आईय हव्वा लै दोखो देनोद त। परमेश्वरो मतलब त कि मसीह पूरी तरहा कै शैताना लै हराऊवा।

परमेश्वरे अब्राहमां कै सोह खाई कि तैवु कै संसारी सारी ज़ाति बर्गत पा। परमेश्वर बादा कै कोई वक्ता दी मसीहा लै भेज़ैय एया सोह पूरो करा। स मसीह संसारे हर एक ज़ाति मांझी कै लोगा लै तिन्नै पाप कै छुड़ावा।

परमेश्वरे मूसा कै सोह खाई कि भविष्य दी स मूसा ज़ेओ एक दूज़ो परमेश्वरो ज़ांणकार भेज़ा। ज़ौ परमेश्वरो ज़ांणकार मसीह होणों। एया रीति कै, परमेश्वरे द्वारा कै सोह खाये कि स मसीहा लै भेज़ा।

परमेश्वरे राज़े दाऊदा कै सोह खाई कि तेखो तैवुव एक वंश मसीह होणों। स राज़ो हंणों अज़ौ परमेश्वरे लोगा मैंथे सदा लै राज़ करा।

परमेश्वरे यिर्मयाह परमेश्वरो ज़ांणकार कै बात कीये अज़ौ बोलो कि एक दिन स नांवै वाचा बाना। स नांवै वाचा इस्राएला सीथी सिनै पर्वता दी बाने दै पुराणे वाचा ज़ैंई ना हंणे। ज़ैबी लोगा सीथी आपणीं नवी वाचा बाना, तैबी स आप्पू लै तिन्ना लोगा आगे प्रकट करा। हर एक जन तैवु कै प्यार करा अज़ौ तैवुये व्यवस्था मानणैं आशा थोआ। परमेश्वरे बोलो कि ज़ौ तैवुये कानूना लै तिन्ने दिला दी लिखणो ज़ैंय हंणो। सें तैवुये लोग हंणैं, अज़ौ परमेश्वर तिन्नै पापा लै माफ करा। स मसीह होणों ज़ुंण तिन्ना सीथी तेया नांवी वाचा लै बाना।

परमेश्वरे ज़ांणकारा लै बी बोलो कि मसीह एक परमेश्वरो ज़ांणकार, एक पुरोहित अज़ौ एक राज़ो होणों। एक परमेश्वरो ज़ांणकार स आदमी आ ज़ुंण परमेश्वरे वचना लै लोगा लै सुनावा अज़ौ लोगा मैंथे परमेश्वरे वचने घोषणां करा। ज़ोआ लै भेज़णे परमेश्वरे सोह ती खाये दै स मसीहो एक सिद्ध परमेश्वरो ज़ांणकार होणों। अर्थात् स मसीह परमेश्वरे वचना लै बांक्कै करे शुणां अज़ौ तेथा लै बांक्कै करे समझा, अज़ौ स लोगा लै तिन्ना संदेशा बांक्कै करे सिखाऊवा।

इस्राएली पुरोहते लोगा तैईं परमेश्वरा आगे बलिदान चड़ाऊवो ज़ारी थोओ। ज़ौ बलिदान लोगे पापे लै तिन्ना लै परमेश्वरे कै सज़ा पाणैं ज़ागा दी चढ़ाऊवा तै। पुरोहित लोगा लै प्रार्थना बी करा तै। पर, स मसीह सिद्ध माहा पुरोहित होणें, ज़ुंण परमेश्वरा लै दैणां लै एक सिद्ध बलीये साही आप्पू लै देया। मतलब स कैविये पाप ना करा। अज़ौ ज़ैबी स आप्पू लै बली होणों लै दैया। तेखो, पापा लै संसारा दी कोई बी दुज़ै बली देणें ज़रूरत ना होणें।

लोगे मंड़ली मैथे राज़े अज़ौ प्रधान राज़ करा, अज़ौ केबी बी सें गलती करा। राज़े दाऊदे सिर्फ इस्राएली मैथे राज़ कियो। पर राज़े दाऊदो वंशज़ पूरै मसीह संसारा मैथे राज़ करा, स सदा लै राज़ करा। एथा कै एलावा स सदा न्यायपूर्ण रीती कै राज़ करा, अज़ौ ठीक फैंसलो करा।

परमेश्वरे ज़ांणकारे लोगा लै मसीहे बारै दी सारी बाते बोली। उदाहरणां लै मलाकी ये बोलो मसीह आणैं कै पेहले एक दुज़ो परमेश्वरो ज़ांणकार आ। स परमेश्वरे ज़ांणकार बढ़ो ज़रूरी होणों। एथे अलावा, यशायाह परमेश्वरे ज़ांणकारे लिखो कि स एक कुंवारी कै पैदा हआ। अज़ौ मीका परमेश्वरो ज़ांणकारे बोलो कि स बेतलहम नगरा दी पैदा हआ।

यशायाह परमेश्वरे ज़ांणकारे ऐणों बी बोलो कि मसीह गलील लाक्कै दी वास करा। ज़ुंण लोग खास्से दुखी आ मसीह तिन्ना लै शांती देया। स कैदी लै अज़ाद करा। मसीह बीमारा लै अज़ौ ज़ुंण शुणीं ना सका, शाई ना सका, बोली ना सका त, या हांढी ना सका तिन्ना लै बी ठीक करा।

यशायाह परमेश्वरे ज़ांणकारे ऐणं बी बोलो कि लोग मसीह कै नफरत करा अज़ौ तैवु लै मानणें कै इन्कार करा। दुज़ै परमेश्वरे ज़ांणकारे बोलो कि मसीहो एक साथी ही तैवुये खलाफ ऊठा। जकर्याह परमेश्वरे ज़ांणकारे बोलो कि तेवो साथे ऐणं करना लै दुज़ै लोगा कै तीस चांदीये सिक्कै लेया। एथे अलावा, कुछ परमेश्वरे ज़ांणकारे बोलो कि लोग मसीहा लै मारा, अज़ौ कि सें तैवुये ज़ुड़कै लै ज़ुआ खेला।

परमेश्वरे ज़ांणकारे ऐणों बी बोलो कि मसीह कैणें करे मरा। यशायाहे बोलो कि लोग मसीह मैंथे थूका, तैवुवो मज़ाक ऊड़ाऊवा अज़ौ तैवु लै मारा। सें तैवु लै छैदा अज़ौ स बढ़े पीड़ा यातना कै मरा, ज़बकी तैवुये कुछ बी ना कियो।

परमेश्वरे ज़ांणकार ऐणो बी बोलो कि मसीह पाप ना करा। स सिद्ध होणों। पर स तैई मरा किल्हैकि तैवु लै दुज़ै लोगे पापा तैईं सज़ा देया। तैवुये मरना कै लोग परमेश्वरा सी मेल करने काबील बणां। तैई, परमेश्वरे तरकीबा दी मसीहा लै मरनो ही ज़ा।

परमेश्वरे ज़ांणकारे ऐणों बी बोलो कि परमेश्वर मसीहा लै मरदे मांझी कै ज़िंऊंदो करा। ऐथा कै पत्तो चाला कि ज़ौ सब, यीशुये मौत अज़ौ ज़िंऊदे हंणीं नांवी वाचा लै बानड़ा लै परमेश्वरे तरकीब तै, ताकि स तिन्ना लोगा लै बचाऊई सका, ज़ोरे परमेश्वरे खिलाफ पाप कियो द त।

परमेश्वरे ज़ांणकारे मसीह बारै दी सब बाते प्रकट की, पर मसीह तिन्ना परमेश्वरे ज़ांणकारा मांझी कै कोईये बी ज़िंऊंदे बैरे ना शाओ। इन्ना भविष्यवाणीं बोलणें कै चार शौ कै ज्यादै बर्ष बाद, ठीक वक्ता दी, परमेश्वरे मसीहा लै एऊ संसारा दी भैज़ो।