20. बंधुआये अज़ौ बापस आणों

इस्राएले देशे अज़ौ यहूदा देशे दीगिये परमेश्वरे खलाफ पाप कियो। तिन्नै तैया वाचा लै चोड़ो ज़ुंण परमेश्वरे तिन्ना सीथी सिनै पर्वता मैथे बाने तै। परमेश्वरे तिन्ना लै पशताव करना अज़ौ दुवारे कै तैवुये भगती करना लै द्वारा कै परमेश्वरे ज़ांणकार लै भेज़ो, पर तिन्नै परमेश्वरे ज़ांणकार बाते मानणें कै इन्कार कियो।

तैई परमेश्वरे तिन्ने दुशमना लै तिन्नो नाश करने काबील बड़ाऊईओ दुवारा कै तिन्ना इस्राएली अज़ौ यहूदा देशा लै सज़ा देने। अश्शूर एक दुज़ो देश त। ज़ुंण बढो ताकतवर गेयो त हुए। सें दुज़ै देशा लै बढे निर्देई बी तै। तिन्नै आईयो इस्राएले देशा लै नाश कियो। अश्शूरी लोगे आईयो इस्राएली देशा दी सारै लोग मारे, ज़ौ बी चाहो स ही लुटो ,अज़ौ देशे कई हिस्से आगी कै ड़ोये।

अश्शूरी लोगे सब अगुवे, सेठ लोग, अज़ौ एणैं लोग ज़ुंण मैहंगी चिज़ा बणांऊई सका तै। एकी सीथी काठ्ठै किये अज़ौ तिन्नै सें अश्शूर देशा लै निंये। इस्राएला दी सिर्फ गरीब लोग ही बच़े।

तेखो अश्शूरी लोगे तैवु देशा दी रहंणां लै कुछ विदेशी लोग आणैं। तिन्ना विदेशी लोगे तिन्ना नगरा लै दुवारा कै बणांऊवो। तिन्नै ज़ुंण इस्राएली तिदे बचै दै तै तिन्ना सीथी गैर ज़ातीओ ब्याह कियो। इन्ना लोगे वंशा लै सामरी बोला।

यहूदा देशे लोगे शाओ कि केणे परमैश्वरे तैवु मैथे विश्वास ना करने वाड़े अज़ौ तैवु बाते ना मानणें बज़ै कै इस्राएली देशे लोगा लै सज़ा देने तै। पर तेखो बी तिन्नै मूर्तीये भगती अज़ौ कनानीये देबते मूर्तीये भगती बी कीये।परमेश्वरे तिन्ना लै चेतावनी देणें लै परमेश्वरे ज़ांणकार भेज़े, पर तिन्नै शुणंने कै इन्कार कियो।

अश्शूरी लोग दुवारा कै इस्राएली देशो नाश करने तकरीबन सौ बर्षा बाद, परमेश्वरे बेबीलोने राज़े, नबूकदनेस्सर लै यहूदा देशा दी हामले करना लै भेज़ो। बेबीलोन एक ताकतवर देश तो। यहूदा देशो राज़ो नबूकदनेस्सरो गुलाम बणना लै अज़ौ हर बर्ष खास्से पैसे दैणां लै राज़ी हुओ।

पर कुछ बर्षा बाद, यहूदा देशे राज़े बेबीलोने खलाफ बगावत कीये। तैई बेबीलोने लोगे बापस आईयो यहूदा देशा मैंथे हामलो कियो। तिन्नै यरूशलेम नगरा दी कब्ज़ो कियो, मांदरा लै नाश कियो, अज़ौ नगर अज़ौ मांदरे खज़ाने लुटे।

बगावत करने बज़ा कै, यहूदे राज़े लै सज़ा देणां लै, नबूकदनेस्सरे सिपाईये राज़ेओ भाऊ, तैवु सामने ही मारो अज़ौ स आंन्धो कियो। ऐथा बाद, तिन्नै स राज़ो आप्पू सीथी निंयों ताकि स बेबीलोने कैदखाने दी मरा।

नबूकदनेस्सरे अज़ौ तैवु सेना यहूदे देशे तकरीबन सब लोग बेबीलोना लै निंये, सिर्फ सबी कै गरीब लोग ही तिदे थोये ताकी सें ढोखरै दी फसल उगावे सका। तैवु वक्ता लै बंधुंआये बोला ज़ोरै परमेश्वरे लोगा लै सोह खाई दै देशा कै निखड़ना लै मज़बूर किओ त।

बेशक परमेश्वरे आपणैं लोगा लै, तिन्नै पापा बज़ा कै बंधुवा बड़ाऊवेय तिन्ना लै सज़ा देने। तेखो बी परमैश्वर तिन्ना लै या आपणीं सोह ना बिसरूवो। परमेश्वरे आपणैं लोगे निगरानी ज़ारी थोये अज़ौ परमेश्वरे ज़ांणकार तिन्ना कै चपड़दे रहे लागी। तैवुये सोह खाई की, सतर बर्षा बाद, सें सोह खाये दै देशा लै बापस भागा।

तकरीबन सतर बर्षा बाद, फारसो राज़ो कुस्रूये बेबीलोन हराऊवो, तैई ऐबे बेबीलोन सम्राज्य ज़ागा दी फारसे सम्राज़्य केई देशा दी राज़ करा त। इस्राएली लोगा लै एबै यहूदी बोला तै। तिन्ना मांझी कै खास्से लोगे आपणीं पूरी ज़िंदगी बेबीलोना दी बिताऊई। सिर्फ दक्क ज़ै बुडढ़े यहूदी लोगा लै यहूदा देशे याद तै।

फारसी लोग बड़े ताकतवर तै, पर तिन्नै आपणैं जीते दै लोगा मैंथे दया कीये। फारसी लोगे राज़े बणंने कुछ वक्ता बाद, कुस्रूये एक आदेश देनो कि कोई बी यहूदी लोग ज़ुंण यहूदा लै भागणों चाहा। स फारसा कै निकड़ीय बापस यहूदा लै भागे सका। इदे सेके तैवुये तिन्ना लै मांदर बड़ाऊंणां लै धन बी देनो। तेखो बंधुवाईये सतर बर्षा बाद, यहूदीयो एक छोटो ज़ैयों झुंड़ यहुदा देशे यरूशलेम नगरा लै आओ।

ज़ैबी सें यरूशलेम नगरा दी अाये तेखो तिन्नै मांदर अज़ौ नगरे चारी बिलै दिवाल दुवारा कै चिंणीं। फारसी लोग एबी बी तिन्ना मैंथे राज़ करा तै। पर एकी बैरे सें दुवारा कै सोह खाये दै देशा दी रोहंदे लागे दै तै। अज़ौ मांदरा दी भगती करदे लागे दै तै।