19. परमेश्वरो ज़ांणकार

परमेश्वर सदा इस्राएली लोगा बिलै आपणैं ज़ांणकारा लै भेज़दे रोहा त। परमेश्वरे ज़ांणकार परमेश्वरा कै संदेशो शुंणांवा तै अज़ौ फैर तैवु लोगा लै बोला तै।

ज़ैबी अहाब इस्राएली लोगो राज़ो त तैबी एलिय्याह परमेश्वरो ज़ांणकार त। अहाब एक नैढ़ो आदमी त। तैवुये झुठे बाल देबते पूज़ा पाठ करना लै लोगा लै मज़बूर कियो। तैई एलिय्याह अहाब लै बोलो कि परमेश्वर तिन्ना लोगा लै सज़ा देणें वाड़ो आ। एलिय्याह अहाबा लै बोलो, “ज़ैबी सेके मूँ दुज़ी बैरे पाणीं पड़ना लै ना बोलूँ तैवी सेके इस्राएल देशा दी पाणीं ना पड़ा अज़ौ ना ही ओश पड़ा।” ऐया बाते अहाब लै एतरो गुस्सो आओ कि तैवुये एलिय्याह लै मारनेयो फैसलों कियो।

तैई परमेश्वरे एलिय्याह लै बोलो कि ज़ांगला दी भाग अहाबा कै चोरूये रह। एलिय्याह ज़ांगला दी तैवु सोते आगे भागो ज़िदी भागणां लै परमेश्वरे तैवु लै बोलदो त। रोज़ दोती अज़ौ बैड़ी, चोड़कु एलिय्याह लै रोटी अज़ौ मांस आणां तै। एऊ पूरै वक्ता दी, अहाब अज़ौ तैवुये सेना एलिय्याह लै लोड़दे रोहे, पर सें तैवु लै लोड़ी ना सके।

पाणीं ना पोड़ने कै कुछ वक्ता बाद, स पाणींयो सोतो बी शुक्को। तैई एलिय्याह तैवु बिढ़ै एकी देशा लै भागो। तैवु देशा दी एक गरीब विधवा रआ तै ज़ौरे एक भाऊ त। तिन्ना आगे नाज़ तकरीबन खत्म गेय त हई किल्हैकि तिदै कोई फसल ना हुई ती। पर फैर बी, तेया छैऊड़ीये एलिय्याह निगराणीं कीये, तैई परमेश्वरे तेये अज़ौ तेये भाऊये ज़रूरता लै पूरो किये, तेथे बज़ा कै तैवु घरा दी पिठेय औखर अज़ौ तेलुये कुपी औखरा कै केबी खाली ना हुई। तैवु पूरे काड़ा दी तेया आगे नाज़ त। एलिय्याह चन्ना बर्षा सेके तिदै रणों।

साढ़ै चन्न बर्षा बाद, परमेश्वरे एलिय्याह कै बोलो कि स दुवारा कै पाणीं भेज़ा। तैवुये एलिय्याहा लै बापस इस्राएल देशा दी भागियो अहाब कै बाते करना लै बोलो। तैई एलिय्याह अहाबा आगे भागो। ज़ैबी अहाबे सो शाओ तेखो तैवुये बोलो, “आच्छा तूये आ, आफत पैदा करने वाड़ो!” एलिय्याहे ज़बाब देनो,“ आफत पैदा करने वाड़ो ता तूये आ! तेरे यहोवा लै छाड़ो। सोये ही सच्चो परमेश्वर आ, पर तू बाल देबते पूज़ा पाठ करदो लागो दो आ। ऐबे तल्ले इस्राएल देशे सोवी लोगा लै कर्मेल पर्वता दी आंणो ज़ा।”

तेखो सब लोग कर्मेल पर्वता लै भागे। सें मर्द बी आये ज़ुंण बोला तै कि सें बाले देबते संदेशा लै बोलने वाड़े आ। ज़ै बाल देबते ज़ांणकार तै। ज़ै चार शौ पज़ास तै। एलिय्याहे लोगा लै बोलो, “केबी सेके तुमा आपणैं मना लै बदलदे रआ लागे? ज़ै यहोवा परमेश्वर आ तै तैवे भगती करो! ज़ै बाल देबतो परमेश्वर आ तै तेवे पूज़ा पाठ करो!”

तेखो एलिय्याहे बाल देबते ज़ांणकारा लै बोलो, “एकी ज़ानबरा मारो अज़ौ तैवुये मासुये टुकड़े बलिदान करना लै एकी बेदी मैथे थोअ, पर आग ना ज़ाणें। तेथा बाद मूँ बी तेणो ई करूं एक अलग बैदी दी मूँ तैवु मांसु लै थौऊं। ज़ै परमेश्वर तैया बेदी दी आग ज़ाड़ा तै तुमा ज़ाणां कि सो ही सच्चो परमेश्वर आ।” तेखो बाल देबते ज़ांणकारे एक बले तैयार कीये पर आग ना ज़ाड़े।

तेखो बाल देबते ज़ांणकारे बाल देबते कै प्रार्थना कीये, “ओ बाल दैऊआ, मआरे शुंण!” पूरे दिन तिन्नै प्रार्थना कीये अज़ौ हाक्कै मारी अज़ौ इदा सेके कि तिन्नै आप्पू लै छुरै कै बी काटो, पर बाल देबते ज़वाब ना देनो,पर तैवुये कोई आग ना ज़ाड़े।

बाल देबते ज़ांणकारे बाला कै प्रार्थना करना लै लगभग पूरो दिन काटो। तेखो तिन्नै प्रार्थना करने बन्द कियो। तेखो एलिय्याहे दुज़ै ज़ानबरो मांस परमेश्वरे बेदी दी थोओ। तेथा बाद, तैवुये लोगा लै बारा बड़े औखर तैवु बली मैंथे दी तैबी सेके पेरना लै बोलो ज़ैबी सेके मांस, ज़ुकड़ै अज़ौ इदे सेके कि तेथा बेदीओ चारी बिलो माट्टो बांको करो ना भिज़ा।

तेखो एलिय्याहे प्रार्थना कीये, “औ यहोवा, अब्राहम, इसहाक अज़ौ याकूब अ पमरेश्वर, हामा लै खोज़ कि तूये इस्राएलो परमेश्वर आ, अज़ौ ज़ौ कि मूँ तेरो गुलाम आ। मुल्लै ज़बाब दै ज़ेण करे ज़ै लोग ज़ाणां कि तू ही सच्चो परमेश्वर आ।”

एकी दमा, कै सरगा कै आग आईऐ, अज़ौ तेवे मांस, झुकड़ै, बढ़े ढोड़, माट्टो अज़ौ इदे सेके कि वेदिये चारी बिलै पाणीं वी ज़ोड़ो। ज़ैबी लोगे स शाऔ, सें माट्टे मैथे लाम्बे पड़े, अज़ौ बोले, “यहोवा ही परमेश्वर आ! यहोवा ही परमेश्वर आ!”

तेखो एलिय्याहे बोलो, “बाल देबते ज़ांणकारा लै एक बी बचीओ भागणों ना चैईं!” तैई लोगे बाले ज़ांणकार लै पाकड़ै अज़ौ तिन्ना लै तिदै कै अलग कियो। अज़ौ सें सब मारे।

तेखो एलिय्याह अहाब राज़े लै बोलो, “स्तावी घरा लै भाग, किल्हैकि पाणीं पड़ने वाड़ो आ!” स्तावी ही बादल घणें फिरे, अज़ौ ताकड़ो पाणीं पड़नो शुरू हुओ। यहोवा तैवु शुक्कै लै खत्म करदो त लागो द। एथा कै पतो चालो कि यहोवा ही सच्चो परमेश्वर आ।

ज़ैबी एलिय्याहे आपणों काम छेक्को, तेखो परमेश्वरे एलीशा नांवे एक मर्द लै परमेश्वरो ज़ांणकार बणंना लै छांटो। परमेश्वरे एलिशा कै बड़े भारी चमत्कार किये। एक चमत्कार नामान सीथी हुओ। स एक दुशमनी सेनो सरदार त, पर तैवुये चामड़ी दी एक नैढ़ो रोग हुओ द त। नामाने एलीशा बारै दी शुंणो द त, तैई सो एलिशा आगे आओ। अज़ौ तैवु लै ठीक करनेये विनते कीये। एलीशे तैवु लै बोलो भागिया यरदन दरियावे पाणीं साता बारै डुब।

नामान बढ़ो गुस्सो हुओ। तैवुये ऐणों करने कै माना कियो, किल्हैकि तैवु लै ज़ौ मुर्खा वाड़ो काम लागा त। पर बादा कै तैवुये आपणौं मन बदलो अज़ौ भागेय यरदन दरियावा दी साता बैरे डुबकी लाई। ज़ैबी आखरी डुबकी लाईयो स बैहरे निखड़ो तैबी परमेश्वरे स ठीक कियो।

परमेश्वरे इस्राएली लोगा आगे दुज़ै बी परमेश्वरे ज़ांणकार भेज़े। तिन्ना सोवी लोगा लै मूर्तीये पुज़ा पाठ बन्द करना लै बोलो। एथी बज़ाये, तिन्ना लै एकी दुज़ै सीथी बांक्कै करे रणों चैईं अज़ौ एकी दुज़ै मैंथे दया करनी चैईं। तिन्ने परमेश्वरे ज़ांणकारे लोगा लै चेताबनी देनी कि तिन्ना लै नैढ़े काम करने बन्द करने चैईं अज़ौ एथे बज़ाये परमेश्वरे बाते मानणीं चैईं। ज़ै तिन्ना लोगे ऐणं ना कियो तै परमेश्वर तिन्ना लै दोषी मानियो तिन्नो न्याय करा, अज़ौ तिन्ना लै सज़ा देया।

ज्यादातर, तिन्ना लोगे परमेश्वरो हुकम ना मानो। सदा तिन्ने परमेश्वरे ज़ांणकारे सीथी नैढ़ो बरताव कियो अज़ौ इदा सेके कि केई बैरे सें मारे बी। एकी बैरे तिन्नै यिर्मयाह परमेश्वरो ज़ांणकार शुक्कै कुंये दी ड़ालो अज़ौ स तिदै मरना लै छाड़ो। स कुंये तलोआ दी चीकरा दी फसो। लेकिन तैवुये राज़े तैवु मैथे दया आये अज़ौ तैवुये आपणैं सिपाई लै आदेश देनो कि यिर्मयाह लै मारने कै पैहले तैवु कुंये कै बैहरे खिंचो।

परमेश्वरे ज़ांणकार परमेश्वरे बिलै कै बोलदे रहे लागे। बैशक लोगे तिन्ना कै नफरत कीये। तिन्ने लोगा लै चेतावनी देने की ज़ै सें पश्ताव ना करा तै परमेश्वर तिन्ना लै नाश करा। तिन्नै लोगा लै बी याद दिलाऊवो कि परमेश्वर तिन्ना आगे मसीहा लै बैज़णें सोह खाई दी आ।