18. बांटो द देश

दाऊदे चाड़ी बर्षा सेके इस्राएला दी राज़ कियो। तेखो स मरो, तेखो तैवुये भाऊ सुलैमाने इस्राएला मैंथे राज़ करनो शुरू कियो। परमेश्वरे सुलैमान कै बात कीये अज़ौ तैवु लै पुछो कि स सबी कै ज़्यादो खै चाहा कि परमैशर तैवु लै देया। सुलैमाने परमेश्वरा कै मांगो कि तैवु लै खास्सो अकलबन्द वड़ाव। ऐया बाता कै परमेश्वर खुश हुओ। परमेश्वरे सुलैमाना संसारा दी सवी कै ज़्यादो अकलबन्द बणांऊवो। सुलैमाने सारी बाते शिखी अज़ौ स एक अकलबंद राज़ो त। परमेश्वरे स बढ़ो सेठ बड़ाऊवो।

यरूशलेम नगरी दी सुलैमाने तैवु लै स मांदर बड़ाऊवो ज़ैथा लै तैवुये बाप्पूये तरकीब ती बड़ाऊवी दी अज़ौ समान त कठ्ठो कियो द। ऐबे सब लोग मिलाप वाड़े ताम्बूये ज़ागा दी मांदरा दी परमेश्वरे भगते करा तै। अज़ौ तैवु लै बली चढाऊवा तै। परमैश्वर तैवु मांदरा दी आईय करे हाज़िर रोआ त, अज़ौ स तिदै आपणैं लोगा सीथी बास करा त।

पर सुलैमाने दूज़ै देशे छैऊड़ी कै प्यार कियो। तैवुये सारी, तकरीबन एक हज़ार छैऊड़ी कै ब्याह करेय परमेश्वरो अपमान कियो! इन्ना माझी कै खास्सी छैऊड़ी दुज़ै देशा कै आई। तिन्नै आप्पू सीथी आपणैं देबते बी आंणैं अज़ौ सें तिन्ना पुज़ा पाठ करदी रही। ज़ैबी सुलैमान बुढ़ो हुअ तैवुये बी तिन्नै देबते पुज़ा पाठ किये।

ऐया बज़ा कै परमैश्वर सुलैमाना कै गुस्सो त। परमेश्वरे बोलो स इस्राएला देशा लै दिया भागा दी बांटेय परमेश्वर तैवु लै सज़ा देया। स सुलैमाने मरने बाद ऐणं करा।

सुलैमाने मारने बाद, तैवुवो भाऊ रहबाम राज़ो बणों। इस्राएली देशे सब लोग तैवु लै राज़े साई मानणां लै एकी सीथी काठ्ठै हुये। तिन्नै रहबामा कै शिकायत कीये कि सुलैमाने तिन्ना कै काठ्ठो काम कराऊवो, अज़ौ ज़्यादो ब्याज़ लेओ। तिन्नै रहबामा कै बिनते कीये कि तिन्ना कै कम काम करावे।

पर रहबामे बड़े मूर्खता कै ज़बाब दैनो, “तुमा बोला कि मेरे बाप्पू सुलैमाने तुम्मा कै काठ्ठो काम कराऊवों। पर मूँ तुमा कै तैवु कै बी काठ्ठो काम करवाऊं, अज़ौ मूँ तुम्मां कै तैवु कै बी ज्यादै दुखदेऊं।”

ज़ैबी लोगे स ऐणं बोलदी बैरे शुंणों, तिन्ना मांझी कै कई लोगे तैवुये खलाफ बगावत कीये। स दसा गोत्रे छाढ़ो; तैवुये सीथी ऐबे दिये गोत्र बचे। इन्ना दिये गोत्रे आप्पू लै यहूदा देशा दी मानों।

बाकी दसा गोत्रे यारोबाम नांवे एकी मर्दा लै आपणों राज़ो बणांऊवो। ज़ै गोत्र देशे उत्तर-पूर्वा दी तै। तिन्नै आप्पू लै इस्राएली देश बोलो।

पर यारोबामे परमेश्वरे खलाफ बगावत कीये अज़ौ लोगा कै पाप कराऊवो। तैवुये आपणैं लोगा लै पूज़ा पाठ करने लै दी मूर्ती बड़ावी। सें ऐबे यहूदा देशे यरूशलेम नगरी दी परमेश्वरे मांदरा दी तेवे भगती करना लै ना भागा तै।

यहूदा अज़ौ इस्राएली देश आप्पू मांझी दुशमन बणें, अज़ौ सें सदा एकी दुज़ै खलाफ लड़दे लागे।

इस्राएल नांवे देशा दी सब राज़े दुष्ट तै। इन्ना मांझी कै केई राज़े, तिन्नै ज़ागा दी राज़े बणंने चाहा थोणें वाड़ै, दुज़ै इस्राएली लोगे हाथा कै मरे।

इस्राएली देशे सब राज़े अज़ौ ज्यादै लोग मूर्तीये पूज़ा पाठ करा तै। ज़ैबी तिन्नै ऐणों कियो, तेखो सें ज्यादातर सें वैश्या सी सुत्तै, इदे सेके कि केई बैरे मूर्ती आगे लवादे बली बी देनी।

यहूदा देशे राज़े, दाऊदे वंशज़ तै। इन्ना राज़े माझी केई लोग भले आदमी तै, ज़ौरे न्याय सीथी राज कियो अज़ौ परमेश्वरे भगती कीये। पर यहूदे ज्यादातर राज़े दुष्ट ही तै। तिन्नै दुष्टता सीथी राज़ कीयो, अज़ौ मूर्तीये पूज़ा पाठ कीये। इधा सेके कि कुछ राज़े झुठे देबते आगे आपणैं लवादे बली बी देनी। यहूदे ज्यादातर लोगे बी परमेश्वरे खलाफ बगावत कीये अज़ौ दुज़ै देबते पूज़ा पाठ बी कीये।