17. दाऊदा सीथी परमेश्वरे वाचा

शाऊल इस्राएली लोगो पैहलो राज़ौ त। स लाम्बो अज़ौ सुंदर त। ज़ैणों कि लोग चाहा तै बिलकुल तैंण ईं। इस्राएला मैंथे राज़ करने वाड़ै पैहले कुछ बर्षा दी शाऊल एक बड़िया राजो त। पर बादा कै स एक दुष्ट आदमी बणों, ज़ौरे परमेश्वरे बाते ना मानी, तैईं परमेश्वरे एक दुज़ौ आदमी छांटो। ज़ुंण एक दिन तैवुये ज़ागा दी राज़ौ बणां।

परमेश्वरे दाऊद नांवे एक ज़वान इस्राएली मर्दा लै छाटियो एक दिन शाऊले ज़ागा दी राज़ौ बणना लै तैयार कियो। दाऊद फुआल त। दाऊदे रिख अज़ौ बराग दिगी लै मारो द त किल्हैकि तिन्नैं तेवी बाप्पूई भेड़े मैंथे हामलो कियो त, ज़ैबी दाऊद तिन्नै निगराणीं करदो त लागद। दाऊद एक दीन अज़ौ धर्मे आदमी त। स परमेश्वरा मैंथे भरोसो करा त अज़ौ परमेश्वरी बाते शुंणां त।

ज़ैबी दाऊद एक ज़वान मर्द त, तैवुये लाम्बे- चोड़े गोलियते खलाफ लड़ाई कीये। गोलियत एक बढ़ो ताकड़ो सिपाई त। स बड़अ काठ्ठो अज़ौ कम से कम चन्न मीटर लाम्बो त! पर परमेश्वरे गोलियता लै मारने लै, अज़ौ इस्राएला लै बचाऊंणें तैईं दाऊदे मदद कीये तै। ऐथा बाद, दाऊदे इस्राएले दुशमन केई बैरे हराऊवे। दाऊद एक बड़अ सिपाई बणों, अज़ौ तैवुये सारै युद्धा दी इस्राएली सेने अगवाई कीये। लोगे तैवुये बड़े भारी तारीफ कीये।

लोगे दाऊदा कै एतरो प्यार कियो कि शाऊल तैवु कै ज़ड़दो लागो। आखरीकार शाऊल तैवु लै मारनो चाहा त, तैई दाऊद तैवु कै अज़ौ तैवुये सिपाई कै बचणां लै ज़ांगला दी चोहरूओ लै। एक दिन ज़ैबी शाऊल अज़ौ तैवुये सिपाई दाऊदा लै लोड़दै तै लागे दै, तैवी शाऊल एकी ढवारा दी भागो। ज़ौ सोई डवार त ज़िदे दाऊद चोरूव द त, पर शाऊलै स ना शाओ। दाऊद शाऊला पिछा कै तैवु बिढ़ै भागो अज़ौ तैवुये ज़ुड़कै एक टुकड़ो काटो। बादा कै ज़ैबी शाऊल तैवु ढवारा कै निकड़ो, तेखो दाऊद तैवु लै च़िंज़ुओ अज़ौ तैवु पाकड़े दै ज़ुड़केय टुकड़ो तैवु लै खोज़ौ। ऐणें करे शाऊल समझो कि दाऊदे राज़ो बड़ने लै शाऊला ना मारो।

कुछ वक्ता बाद, शाऊल युद्धा दी मरो, अज़ौ दाऊद इस्राएलो राज़ो बणों। स एक बांक्को राज़ौ त। लोगे तैवु कै प्यार कियो। परमेश्वरे दाऊदा लै बर्गत देने अज़ौ तैवु लै कामयाब बड़ाऊवो। दाऊदे केई युद्ध लड़े। परमेश्वरे इस्राएले दुशमना हराऊणां लै दाऊदे मदद कीये। दाऊदे यरूशलेम नगर जितेअ तैथा लै आपणैं राज़धाने बणांऊवे, ज़िदे स रणों अज़ौ राज़ कियो। दाऊदे चाड़ी वर्षा सेके राज़ कियो। ऐऊ वक्ता दी, इस्राएल ताकतवर अज़ौ अमीर देश बणों।

दाऊद एक मांदर बड़ाऊंणो चाहा त। ज़िदे सब इस्राएली परमेश्वरे भगती करी सका तै अज़ौ तैवु लै बली चढ़ाऊवी सका तै। तकरीबन, चार शौ बर्षा कै, सें लोग मूसे बड़ाऊवे दै मिलाप वाड़े तंबू दी परमेश्वरे भगती करदे तै लागे दै। अज़ौ तैवु लै बलीदान चढाऊंवा।

पर तिदै नातान नांवो एक परमेश्वरो ज़ांणकार रहा त। परमेश्वरे तैवु लै दाऊदा लै ऐणों बोलणां लै भेज़ौ: “तेरे सारे युद्ध लड़े देया, तैई तू मेरी तैईं मांदर लै ना बड़ावे। तेरो भाऊ ऐथा लै बड़ाऊवा, तैबी मूँ तल्ले बड़े भारी बर्गत देऊं। तेरो एक वंश सदा लै मेरे लोगा मैथे राज़ो बड़ेय राज़ करा।” स सदा लै राज़ करने वाड़ो दाऊदो सिर्फ एके ही वंश मसीह त। मसीह परमेश्वरो छांटो द ज़ंण त, ज़ुंण संसारे लोगा लै तिन्नै पाप कै वचाऊणें वाड़ो त।

ज़ैबी दाऊये, नाताने संदेशे लै शुंणो तेखो तेवे परमेश्वरो शुक्र कियो अज़ौ तेवे ज़य जयकार कीये। परमेश्वरे तैवुये इज़्जत अज़ौ तैवुवो नांऊ बड़ाऊंद त लागद। अज़ौ तैवु लै सारे बर्गत दैंदो त लागद। बैशक दाऊद ना ज़ाणां त कि परमेश्वरे इन्ना बाता लै केबी पूरो करा। एऊ बगत हामे ज़ाणीं कि इस्राएली लोग एक लाम्बे वक्ता सेके तकरीवन, एक हज़ार बर्षा सेके मसीही लै पोखियो रणें।

दाऊदे केई बर्षा सेके न्याय सीथी आपणैं लोगा मैथे राज़ कियो। तैवुये बड़े विश्वासयोग्य होये करे परमेश्वरे बाते मानी अज़ौ परमेश्वरे तैवु लै बर्गत देने। हालांकि, तेवे आपणीं ज़िंदगीये अंत वक्ता दी परमेश्वरे खलाफ भयंकर पाप कीयो।

एक दिन दाऊदे आपणैं मेहला कै बैहरे शाऔ, तिदै एक सुन्दर छैऊड़ी नैहुंदी बैरी शाई। स तेया लै ना ज़ाणां त, पर तैवुये पतअ लाओ कि तेया नांव बतशेबा त।

आपणीं नज़रा फैरनी ज़ागा दी, दाऊदे तेया लै आप्पू बिलै बेदणां लै कोऐ भेज़ौ। स तैया सीथी सुत्तो अज़ौ स बापस भेज़ी। कुछ वक्ता बाद बतशेबे दाऊदा लै एणों बोलिया संदेश भेज़ौ कि स सकोड़ी लागदी आ।

बतशेबे लाड़ेय नांव ऊरिय्याह त। स दाऊदे बड़िया सिपाई मांझी कै एक त। एऊ वक्ता दी स युद्धा दी भागो द त। दाऊदे ऊरिय्याह लै युद्धा कै बापस बैदेय आपणीं छैऊड़ी सीथी रणां लै बोलो। पर दुज़ै सिपाई युद्धा दी तै तैई उरिय्याहे आपणैं घरे भागणैं कै माना कीयो। तैई दाऊदे ऊरिय्याह लै बापस युद्धा दी भेज़ौ अज़ौ सेनापतिये तैवु लै युद्धा दी एणीं ज़ागा दी भागणां लै बोलो ज़िदे दुशमन सवी कै ज्यादै ताकतवर तै। ताकि स तिदै मरा। ऐणों हुओ कि स युद्धा दी मरो।

ऊरिय्याहे युद्धा दी मरने बाद दाऊदे बेतशेबा सीथी ब्याह कियो। बादा कै, तेये दाऊदे भाऊ लै ज़न्म देनो। दाऊदे ज़ौ बी कीयो तेथा कै परमेश्वर नराज़ त। तेखो परमेश्वरे तैवु नातान परमेश्वरे ज़ांणकारा लै एंणो बोलणां लै भेज़ौ कि तेवे पाप केती नेढ़ै आ। दाऊदे आपणैं पापो पश्चताप कीयो अज़ौ परमेश्वरे स माफ कीयो। आपणीं बाकी ज़िंदगी दी, आपणैं कठ्ठन वक्ता दी बी दाऊद परमेश्वरे पिछै -पिछै हांढ़ो अज़ौ परमेश्वरी बातें मानी।

पर तैवुवो भाऊ मरो। ऐणं करे परमेश्वरे दाऊदा लै सज़ा देने। ऐथे अलावा, दाऊदे मरने सेके तैवुये आपणैं टबरे कुछ लोगे तैवुये खलाफ लड़ाई कीये। तेखो दाऊदे आपणीं ताकत कम गेये तै हये। पर परमेश्वर विश्वासयोग्य त अज़ौ ऐबी बी तैवुये सोये कियो ज़ुंण तैवुये दाऊदा कै करनेय बाईदौ त कियो द कि स करा, बैशक दाऊदे तैवुवो अपमान कियो त। बादा कै, दाऊदे अज़ौ बेतशेबे दुज़ी लवाद हुये, अज़ौ तिन्नै तैवुवो नांव सुलेमान थोओ।