16. छुड़ावणैं वाड़े

यहोशू मरने बाद इस्राएली लोगे परमेश्वरो अपमान कियो। तिन्नै परमेश्वरे हुकम ना माने अज़ौ तिन्नै तैवु सोह किये दै देशा दी बचै दै कनानी लोग बैहरे ना गाढ़ै। इस्राएली आपणैं सच्चे परमेश्वरे लै छाड़ेयो, कनानी देवते पूज़ा पाठ करने शुरू किये। इस्राएलीये लोगा आगै कोई वी राज़ो नेईं त, तैईं ज़ौआ लै ज़ौ बी बढिया लागा त स सोये करा त।

परमेश्वरो हुकम ना मानणें कै इस्राएलीये एक तरीको शुरू हुअ ज़ुंण केई बैरे दोहराऊ त। ज़ौ तरीको ऐणें करे चालो, कुछ बर्षा सेके इस्राएली लोग परमेश्वरो हुकम ना माना तै, स परमेश्वर तिन्ना लै तिन्नै दुश्मना कै हरावेय तिन्ना लै सज़ा देया त। सें दुशमन इस्राएली कै तिन्नी चिज़ा लूटा तै, तिन्नै ज़ैदाता लै नाश करा तै, अज़ौ तिन्ना माझी खास्से लोगा लै मारा तै। तेखो ज़ैबी इस्राएली दुशमन तिन्ना मैंथे केई बर्षा सेके अत्याचार करा तै, तेथा बाद इस्राएली आपणैं पाप कै पश्ताव करा तै अज़ौ परमेश्वरा कै तिन्ना लै बचावड़ा लै प्रार्थना करा तै।

हर बैरे ज़ैबी इस्राएली पश्ताव करा तै, तेखो परमेश्वर तिन्ना लै वचावा तै। स एकी छुड़ावड़े बाड़े कै एंणों करा त- एक ऐणों ज़ण ज़ुंण तिन्नै दुश्मना खलाफ लड़ा त, अज़ौ तिन्ना लै हरावा त। तेखो देशा दी शानते होआ तै, अज़ौ स छुड़ावड़े वाड़ै तिन्ना मैथे बांक्के कै राज़ करा त। परमेश्वरे तिन्ना बचावडे लै खास्से छुडावडे वाड़े भेजे। परमेश्वरे बिढ़े रोहणें वाड़ी एक दुशमन ज़ाते, मिद्यान कै इस्राएली सेना लै हरावेय फैर ऐणों कियो।

मिद्यानी लोगे साता बर्षा तैईं इस्राएली लोगे फसल लूटी। इस्राएली लोग बड़े डरे दै तै, अज़ौ सें डवारा दी चोरिया तै, ताकि मिद्यानी लोग तिन्ना लै लोड़ी ना सका। आखरीकार सें, आप्पू लै बचणां लै परमेश्वरा लै चिंज़ुवे।

गिदोन नांवो एक इस्राएली मर्द त। एक दिन, स गुप्त ज़ागा दी गिंहूँ छांड़द त लागदो ताकि मिद्यानी लोग तेया फसला लै चोरे ना सका। यहोवा बिलै कै एक स्वर्ग दूत गिदोन बिलै आये तैवु कै बोलो, “जौ ताकड़े योध्दो आ, परमेश्वर तौईं सीथी आ। भाग अज़ौ इस्राएली लोगा लै मिद्यानी कै बचाव।”

गिदोने बाप्पू आगे मूर्ती लै देने दै एक बेदे तै। सोवी कै पेहले बात ज़ौ परमेश्वरे गिदोना लै करने लै बोलो, स तेया बेदी लै चोडनो त। पर गिदौन लोगा कै डरा त , तैईं सह राच हंणां लै पखौ रहणो। तेखो तैवुये तैया बेदीये टुकड़े टुकड़े किये। तेखो तैवुये तेया बेदी कै एक नोवे बेदे बड़ाऊवे, अज़ौ तेया दी परमेश्वरा लै बले चढ़ाऊवे।

आगली दोती लोगे शाओ कि कोईये वेदी चोड़िय टुकड़े टुकड़े की दी ती, तेखो सें बड़े गुस्से हुये, सें गिद्योना लै मारने लै, तेवे घरा लै भागे, पर गिद्योने बापूये बोलो,“तुमा किल्ले आपणैं देबते मदद करने कोशिश करदे लागे दै आ? ज़ै स देबतो आ तैवु लै आपणैं रक्षा आप्पूई करने देयो!” किल्हैकि तैवे एंणों बोलो तैईं लोगे गिद्यान ना मारो।

तेखो इस्राएली लोगा लै लूटड़े लै मिद्यानी लोग फैर आये। सें एतरे सारै तै कि तिन्ना गिणीं बी ना सका तै। गिदोने इस्राएली लोग तिन्नै खलाफ लड़ाना लै कठ्ठै किये। गिदोने परमेश्वरा कै दि न्शाणींये मांग कीये ताकी तैवु लै पूरो विश्वास होआ कि परमेश्वर तैवु लै सची लै इस्राएली लोगा लै बचाऊणां लै बोलद लागद आ।

पैहली न्शाणीं दी, गिदोने भैड़े ऊन माट्टै मैथे थोये परमेश्वरा लै बोलो कि ओश सिर्फ ऊंना मैथे चैईं पड़े बाकी माट्टै मैथे ना चैईं पड़े। परमेश्वरे एंणो ही कियो। दुई राची, तिन्नै परमेश्वरा लै बोलो कि माट्टो सीनो चैईं हुअ पर भैड़े ऊन शुक्कै चैईं रोणीं। परमेश्वरे एंणो बी कियो। इन्ना दिया न्शाणीं बज़ा कै गिदोने विश्वास कियो कि परमेश्वर सची लै चाहा कि स इस्राएली लै मिद्यानी कै बचाऊवा।

तेखो गिदोने सिपाई आप्पू बिलै बेदे, बत्ती हज़ार मर्द आये। पर परमेश्वरे तैवु लै बोलो कि ज़ैं ता बड़े भारी आ। तेखो गिदोने सें बाई हज़ार घरे बापस भेज़े ज़ुंण लड़ने कै डरा तै। परमेश्वरे गिदोना लै बोलो कि ज़ै मर्द अज़ौ बी खास्सै आ। तेखो गिदोने चन्न शौ सिपाई छाड़ेओ बाकी सब घरे भेज़े।

तेया राची परमेश्वरे गिदोना लै बोलो, “मिद्यानी ड़ैरे लै भाग अज़ौ तिन्ना लै चपड़दे बैरी शुंण। ज़ैबी तू तिन्ना लै शुंणां कि सें खै लागे दै बोलदे, तेखो तू तिन्ना मैथे हामलो करने कै ना डरा।” तैईं तेया राची गिदोन ऊंन्धी तिन्ने ड़ैरे लै भागो अज़ौ तैवुये एक मिद्यानी सिपाई लै आपणैं दोस्ता लै तेया बात बोलदी बैरे शुंणो, ज़ुंण तैवुये सुपन्नै दी बी ती शाई दी। तैवु मर्दे आपणैं दोस्ता कै बोलो, “एऊ सुपन्नेओ मतलब आ कि गिदोने सिपाई हामा मिद्यानी सिपाई लै हराऊवा!” ज़ैबी गिदोने ज़ो शुंणों तेखो तैवुये परमेश्वरे अराधना कीये।

तेखो गिदोन आपणैं सिपाई बिलै भागो अज़ौ तिन्नै सोवी लै एक एक करनाड़, एक माट्टेअ औखर, अज़ौ एक मशाल दैनी। तिन्ने स ड़ैरो घेरो ज़िदै मिद्यानी सिपाई सुत्तै दै तै। गिदोने चन्न शौ सिपाई आपणीं मशाला लै औखरा कै ढको द त, ताकी सें मिद्यानी लोग मशाले प्रैशे लै ना शाई सका तै।

तेखो तिन्ना सब सिपाईये एकी बैरे तिन्ना औखरा लै चोड़ीय तिन्ना मशाले आग दिखाऊवे। तिन्नै सें करनाड़ी फुकरी अज़ौ हाक्कै पाई, “यहोवे तलवार अज़ौ गिदोने तलवार !”

परमेश्वरे मिद्यानी डराऊवे, तैई सें एकी दुज़ै लै मारदे काटदे लागे। फटा फटा, गिदोने संदेश भेज़े वाडै लै, दुज़ै खास्से इस्राएली लै मिद्यानीओ पिछो करना लै तिन्ने मदद करना लै बेदै। तिन्नै तिन्ना मांझी कै सारे मारे अज़ौ बाकी पिछो करिय इस्राएल देशा कै बैहरे गाड़े। तैवु दिन एक लाख बीह हज़ार मिद्यानी मारे। एंणें करे परमेश्वरे इस्राएली लोग बचाऊवो।

सें लोग गिदोना लै आपणों राज़ो बणांऊणो चाहा तै, “पर गिदोने तिन्ना लै एंणो करने ना दैनो, लेकिन तैवुये तिन्ना कै सुन्ने ज़ैवर मांगे ज़ुंण तिन्ना सवी ये मिद्यानी कै लुटेअ तै आणैं दै। तिन्ना लोगे बड़ी भारी सुन्नो गिदोना लै देनो।

तेखो गिदोने तैवु सुन्ने कै एक खास्स ज़ुड़को बड़ाऊवो, ज़ैणं कि महा पुरोहित भिड़ा त। पर लोगे तेथे पूज़ा पाठ करनी शुरू कीये ज़ैणी कि स एक मूर्ती ती। तेखो परमेश्वरे फैरे इस्राएली लै सज़ा देनी किल्हैकि तिन्नै मुर्तिये पुज़ा पाठ किये। परमेश्वरे तिन्नै दुशमना लै, तिन्ना लै हराऊणें काबिल बणांऊवो। आखिरकार दुज़ी बैरे परमेश्वरा कै मदद करना लै प्रार्थना किये, अज़ौ परमेश्वरे तिन्ना बिलै तिन्ना लै छुड़ाऊणां लै एक दुज़ो छुड़ाणें वाड़ो भेज़ो।

ज़ौ ही बात केई बैरे हुए: इस्राएली लोग पाप करा, परमेश्वरे तिन्ना लै सज़ा देया, सें पश्ताव करा अज़ौ परमेश्वर तिन्ना लै छुड़ावणा लै कोई लै भेज़ा। केई बर्षा सेके, परमेश्वरे सारे छुड़ाऊणैं वाड़े भेजे, ज़ोरे इस्राएली लोगा लै तिन्नै दुशमना कै बचाऊवो।

आखिरीकार तिन्नै, तिन्ना दुज़ै देशा साई परमेश्वरा कै राज़े मांग कीये। सें एक ऐणों राजो चाहा तै, जुण लाम्बो, ताकड़ो होआ अज़ौ ज़ुंण युद्धा दी तिन्नै अगवाए करे सका। परमेश्वरा लै ज़ौ विनती पसंद ना आई, पर परमेश्वरे तिन्ना लै तैंणो ही राज़ो दैनो ज़ैणों तिन्नै मांगो द त ।